1 Mumwaka wa tatu wa utavala wa mutwa Koleshi wa Pelisia, Danieli wuwula wula vamkeli Beliteshesa, agayiliwili ugubutulu. Ugubutulu awu wavelili wa nakaka, lakini wadindalili munu kumanyika. Hata amanyili ugubutulu awu kwanongwa ayimanyili milotu.

2 Chipindechi nenga Danieli ndavelili ngulila chivembu kwa chipindi cha majuma matatu.

3 Ndalili ha filivi finofu, wala nyama, wala difwayi, wala ndayishaghili ha mafuta kwa chipindi chosechi cha majuma matatu.

4 Lijuva lya milongu mivili na mchechi va mwesi wa kwaa, ndavelili ng'oloka muluwongu ya lweni Tigili. 5 Panolili kuulongolu ndamuwonili mundu kafwala fwali ya yingwa ngeli na muchiwunu kayiwopa lufunga lwa chumang'andu. 6 Njimba yaki yang'alili kucha madini va sabalajadi nofu. Wushu waki wayifwanili na umemi, na mesu vaki vayakili kucha myengi ya motu. Mawulu na mawoku vaki vang'alili kucha chumang'andu yisingiwili munu. Na lishu lyaki lyayovili kucha mashu va lipinga likomi lya vandu.

7 Nenga Danieli weka yangu ndi ndawonili milotu ayi. Vala vandu yivavelili pamu na nenga vayiwonili ha, lakini vakoliwili na chipwembwi chikomi, vatuva vayififa. 8 Topi vaneka weka hela ndalotili milotu ayi mikomi. liwovi linyangila na nepisiwa, hogoya nakamu. 9 Pambikanilili lishu lyaki ndiwa pasi wifuma, ng'onja dabwa. 10 Pambeli liwoku ligufya, ling'olosha na kudindasha mawulu na mawoku vangu.

11 Kang'ombela, "Danieli, yuwi yiwutamiwa munu, woloki chimimi tegheli filongu dafideti, nongwa nayishiwa kwa yuwi." Pang'ombeleyi filongu afi nenga ng'oloka kunu pabagama.

12 Topi kang'ombela, "Danieli, kotoo kutila. Chapanga apikanilili chiwuluvili kukandila lijuva lilila lila lya kwaa pawulamulili kuva mshishamoyu pawulongu ya Chapanga waku ili upati umanyi. Nenga nyisa kwanongwa ya achi chiwuluvili. 13 Lakini mkomi wa wutwa wa Pelisia animbili kwa chipindi cha majuva milongu mivili na limu. Lakini Mikaeli yumu wa vakomi kayisa kundanga, topi ndimuleka aku pamu na mkomi mwa wutwa wa Pelisia. 14 topi nyisa kukugayila milotu kwilata fila dafivafivafumbukili vandu vaku chipindi yichiyisachi."

15 Paghaveyi akung'ombela findu afi ndagondamilili pasi ngajila kuywanga chindu. 16 Pambeli mundu yumu yavelili nga mundu, agufyili mlomu wangu na ndi pangandili kuywanga, ndimuwombela yula yawolukili paehi na nenga, "Bambu, milotu ayi yinyeghela gobuleku ngomi mbaka hogoya nakamu. 17 Bambu, nenga mvanda waku nguwesha wuli wuli kuwombana na yuwi? Ndivahela liwovi na mfuki wupela."

18 Yula yavelili na mundu kagufya na kundaya liwovi. 19 Kang'ombela, "Kotoo kutila yuwi yiwutamiwa munu, kusika kuvi na yuwi. Dindali na wuvi hwadali."

Pawombanili na nenga ndapatili liwovi ndimuwombela, "Bambu wangu deti kwanongwa kugayila liwovi."

20 Mweni kang'ombela, "Kumanya nongwa liki ngwisila? Ponopa kudayiliwa kuwuya kuleva na makungu mdimi wa Pelisia. Pandimuwesha, makungu mdimi wa mutwa wa Ugiliki dayisi. 21 Lakini dandikumanyishi tanila fila yifiyandikiwili muchitabu, kwahela wingi wa kundanga ila kuvawesha ava ila Mikaeli weka, makungu mkomi waku."