1 Pamihi pandiva pawulili wangu,

nota ngumsaka yindimtamili mundima yangu,

ndamsakili lakini ndimuwona ha.

2 Ndandamuka ndiyishengeta mbwani,

mudeha na fishalila,

ngumsaka yula yindimtamili mundima.

Ndamsakili lakini ndimuwona ha.

3 Yivadima mbwani vang'ona chipindi pashengiteyi mumbwani.

Topi ndivadasha, "Wuli, mumuwona yula yindimtamili mundima?"

4 Tepu hela patulekanili na veni ndimuwonili yindimtamili.

Ndamkamlili ndamlekili awuki ha,

ndamyeghili kaya kwa mawangu,

mbaka muchumbagati cha yula yanelili.

5 Nguvakayika vadadala va Yelusalemu,

nguvalaipi kwa kaputa na mbavala mukoto kukuvilisha bayulilu ya kwitama,

mbaka chipindi chaki pachifika.

6 Chindu liki achi chifuma kucheja kucha chidimililu cha lyosi,

yichinungilila kucha mafuta va kunungilila na ubani,

yifinungilila na kunadishiwa na mchulusi.

7 Loli! Ndi milotu ya Solumoni,

kayeghiwa muchigoda chaki cha wutwa,

kashengitiwa na vadimi valulumi milongu sita yivavelili vakomi va Isilaeli.

8 Kila mundu kakamula limayi,

kila mundu mmanyi wa mgoha.

Kila mundu mukuwoku kakamula limayi,

kava ndemindemi kumtuvila chimdwama pamihi.

9 Mutwa Solumoni ayigolililili muwombangu,

kwa mibiki ya myelesi kufuma Lebanoni.

10 Siki shaki sigoliwa kwa madini va mbiya,

muwongu waki kwa chumang'andu,

mahali pa kwikalila pagubikiwa na fitambala fya salabati,

chivatotili kwa utami wa mdadala wa Yelusalemu.

11 Mwisi yumwi vadadala va Sayuni,

mkamloli mutwa Solumoni.

Kafwala likokoma lyafwalishiwili na mamundu,

lijuva pagolili lihungu lyaki lya kuheta,

lijuva ali asekililili munu.