1 Nenga ndi uluva wa Shaloni,

ndi unanga wa kundamba.

2 Kucha unanga pagati ya misomi,

ndi wavelili yindimtamili gati ya vakavali.

3 Kuva kucha libiki lya fivelekwa pagati ya lisaku,

ndi wavelili yindikutamili pagati ya fijana.

Nguva na seku kwikala pasi ya lumbwepwa lwaki,

pawuva pabehi na nenga yiva kucha kulya chivelekwa chinovili.

4 Andolili mbaka mumdamwa wa lihungu,

kila mundu aloli ndambu wandama.

5 Wugoli ndiyikuti kwa misabibu yiyumili,

na kufwamusha kwa mindopi!

nongwa ndiva msosuvafu kwa utami waki.

6 Mutwi wangu wusaghamila liwoku lyaki lya mkighi,

na kangusikila kwa liwoku lyaki lya mlilua.

7 Nguvakayika yumwi vadadala va Yelusalemu,

kucha vavelili sheshi awu mbavala wa kumidasi,

mukotoo kukuvilisha milandu ya dubu,

mbaka chipindi chaki pachifika.

8 Ngupikana lishu lya yandamili.

Akwisa mbilu kufuma kuchidunda,

akufipita mbilu fidunda.

9 Yandamili kava kucha sheshi,

kucha mwana wa mbavala.

Kawoloka behi na chibali chetu.

Akushungulila palilanga,

akulola pawulili.

10 Yandamili kang'ombela naha.

tepu tandamuki yuwi yingutamili,

wisi kwa nenga.

11 Loli chipindi cha lupepu chipita kala,

na ndonya sikutonya kandi ha,

12 uluva uyalula ngengileka shosi.

Chipindi cha kusomola chifika,

lisu lya njiva likupikanika mufitava fyetu.

13 Mibiki ya mitini yikanda kuveleka,

na misabibu yiyalula.

Wisi yuwi,

wisi kwa nenga, yuwi yindikutamili.

14 Yuwi kucha njiva yuwuyififili mumigonguveli,

leki ndiwuloli wushu waku.

Leki mbikani lishu lyaku,

nongwa lishu lyaku lyanyanyi na wushu waku wuvayila.

15 Kuna vandu vamonga kucha fingekembi vadokwa,

vala yivadanganyisha misabibu yetu yiyalula.

16 Bambu wangu ndi wangu na nenga ndi waki,

mweni akuvadima vafungami vaki muliyungiyungi.

17 mbaka lijuva palifuma,

na lumbwepa kukanda kuwuka.

Wuyi kucha sheshi bambu wangu,

kucha mwana wa mbavala kumbindi ya chidunda cha Beteli.