1 Msambu wa Solumoni wuvelili mnofu pitu misambu yosi.

2 Ngiba mlomu waku wunoneli,

nongwa utami waku wuva pitu difwayi.

3 Mafuta vaku vakunungilila finofu,

litawa lyaku kucha mafuta va kunungilila yivapunguliwili.

Ndi nongwa vakavali vakukutama yuwi.

4 Undoli tuwuki kalopu,

mutwa kanyingisha muchumba gati chaki.

Datusekileli na kunemilela kwanongwa yaku,

datuwujumi utami waku pitu difwayi.

Ndi nongwa vadadala vava nakaka kukutama yuwi!

5 Yumwi vadadala va Yelusalemu nenga mtitu lakini mayila,

kucha mibudi ya Kedali,

kucha mipayi yivelili mumibudi ya Solumoni.

6 Mkotoo kunolesha kwanogwa mtitu,

nongwa lijuva livalila nenga.

Valongu vangu vangalalilili,

na kugola nenga kuva mdimi wa fitava fya misabibu.

Lakini chitava changu cha misabibu ndagolishelili ha.

7 Yuwi yindikutama ung'ombeli,

dawuvadimili koti vafungami vaku?

Davapumulilili koti lijuva palikalipa?

Nongwa liki ndikusaki kufuma mufipinga fya vayaku?

8 Yuwi yiwuvayilili pitu vadadala vosi, leki kumanya ng'odu goli naha.

Kovikeli njapu sha vafungami,

vadimi vameni vaku,

pabehi na mibudi ya vadimi.

9 Yuwi kuva kucha fwalasi lidadala,

yakuluwula mbutuka sha Fwalawu.

10 wushu waku wuvayila,

na ngulu yaku yimelimetishiwa kwa mikufu yitalamili.

11 Lakini datukugoleli mikufu ya chumang'andu,

yimelimetishiwili nyanyi na madini va mbiya.

12 Mutwa pavelili muchiti chaki cha yonyayonya,

mafuta vangu va kunungilila vakunungilila finofu.

13 Yindikutama kuva kucha mafuta va kunungilila kwa nenga,

pasaghamila maveli vangu.

14 Yindikutamili kuva kucha uluva wa mibiki yiiyalula,

mufitava fya misabibu aku Engedi.

15 Nakaka yuwi yingutamili kuvayila,

nakaka kuvayila, mesu vakulimbulila.

16 Nakaka kuvayila yuwi yindikutama, kuvayila munu!

Midasi midodi dayivi ulili wetu,

17 Mivanga dayivi siki sha nyumba yetu,

na mivali dayivi dali yaki.