1 Nguyingila muchiwunga changu,

yuwi yindikutamili.

Ngusamba manimani na lihani,

ngulya njuki yangu yivelili mulisegha,

ngulanda difwayi yangu na masiva vangu.

Mulyi na kulanda yumwi vaghanja vangu.

2 Ng'onja lakini ndima yangu yiwonja ha.

Lishu lya bambu wangu lipikana akukuta mlyangu.

uvuwulili yuwi yindikutamili.

njiva wangu yangajila uvifyi,

mutwi wangu wunyapa mitungwi, na fwili shangu sinyapa lupepitela lwa pamihi.

3 Ng'oposola lihabiti lyangu,

wuli, fwali kandi?

Nava kala mawulu vangu,

Wuli, mbighali kandi?

4 Yindimtamili kavika liwoku lyaki palivanga,

ndima yangu yasisimukili kwanongwa ya mweni.

5 Ndatandamukili kumfuwulila yindimtamili.

Mawoku vangu vamemili manimani,

na fyala fyangu fikuponesha mafuta va kunungulila va manimani,

pangamulili komewu kufuwula mlyangu.

6 Ndimfuwulila mlyangu,

lakini mweni avelili kawuka kala.

Ndima yangu yavelili na seku ha pawukili!

Ndamsakili, lakini ndamuwonili ha,

ndamkemili, lakini kayitikila ha.

7 Vadima mbwani vang'ona,

Pavaveghi vakushengeta mumbwani,

vadula na kugobola, na vamboka fwali yangu.

ava vadimi va luviwu

8 Nguvakayika yumwi vadadala va Yelusalemu,

leki pamumuwona yindimtamili,

mumuwombeli ngutamika kwa nongwa ya utami.

9 Vadadala va Yelusalemu vamdasha, wuli, yiwumtamili kavayila pitu vamonga,

mweni kavayila pitu vadadala vengi?

hata utusivi ndambu ayi?

10 Yindimtamili kavayila na kana liwovi,

mweni kamanyika gati ya valulumi elufu lilongu.

11 Mutwi waki wuvayila kucha chumang'andu nofu,

fwili shaki siva kucha ngeleka sha mdaba,

nditu tyoo.

12 Mesu vaki vava kucha ngunda yaveli mumbalimbali ya mbengu sha machi,

na kucha njiva yivayova majiva mumbalimbali ya mbengu.

13 Makanja vaki kucha chiwunga,

kucha chiwunga chimemili yifinungilila.

Mlomu waki kucha unanga,

wunyapili mafuta yivanungilila va manimani.

14 Mawoku vaki vava filifili nga chumang'andu,

kafwala lihabiti lya Talishishi.

Mvili waki kucha menu va ndembu,

limelimetishiwili kwa findu fitalamili fya langi ya kangungu.

15 Mawulu vaki kucha siki sha migonguveli ya alabasta,

yisiwolushiwili kumbindi ya chikandilu cha chumang'andu.

Akuwoneka kucha chidunda cha Lebanoni,

chivelili na mibiki ya myelesi.

16 Mlomu waki mumema filongu fya nyanyi,

nakaka kava nyanyi.

Topi, ndi kava naha,

yina ndi wavelili yindimtamili,

yumwi vadadala va Yelusalemu.