1 Nakaka yuwi yingutamili kuvayila!

Mesu vaku manofu yivalimbulila kucha yivagubikiwili na chihaluma chaku cha lihungu.

Fwili shaku sikupulika kucha lipinga lya meni,

yivasunuka kufuma kufidunda fya Giliadi.

2 Menu vaku vava mbuleteee kucha vafungami vadadala yivavamoghiwili wagi,

yivafuma mukuyovishiwa.

Kila meni kalela mambila,

na kwahela hata meni yavelili weka hela.

3 Milomu yaku kucha luwoyi ludwifu,

mlomu waku wanyanyi munu.

Kumbeli ya yingwa yaku ya lihungu,

makanja vava kucha mikomamanga.

4 Ngulu yaku kucha chindangawala cha Dawudi,

chijengiwili finofu kwa nongwa ya kivikila fidumu,

aku kusitumbikiwili ngawu elufu yimu sha valulumi

5 Maveli vaku kucha chali cha mbavala,

yivadimiwa pagati ya unanga.

6 Danyendi kuchidunda yichifuma manimani,

na kuchifuma ubani,

mbaka pamalavila chisi pachiwuka.

7 Nakaka yuwi yingutamili kuvayila munu,

kwahela hata pamu pavifyikili.

8 yuwi yingutamili wisi kunu Lebanoni,

wisi kwa nenga Lebanoni.

Sunuki kuchinepunepu cha chidunda Amana,

kufuma kuchinepunepu cha chidunda Senili na Helimoni,

kufuma mumibuku ya majabi na kufuma mufidunda fya duma.

9 Yuwi yingutamili kuyifwamusha ndima yangu,

pawunolili mwanja wumu hela,

na kwa ukufu waku wuvelili mungulu.

10 Yuwi kundama munu,

yuwi yiwundamili, kamwali wa lihungu lya kuheta.

Utami waku unova kupitu difwayi,

na mafuta vaku va kunungilila vava pitu chindu chochosi chila.

11 Milomu yaku yikusulusha njuki, yuwi yingutamili,

pasi ya lulimi lwaku kuna njuki na masiva.

Yingwa shaku sikunungilila nyanyi kucha mlima wa Lebanoni.

12 Yuwi yindikutamili kuva chiwunga chivelili muluviwu,

chiwunga chigoliwiliwi na kuvikiwa fimbwitu yifivikiwili chilangushilu.

13 Mvili waku wuva kucha chiwunga cha mikomamanga,

yivelili na fivelekwa fya nyanyi pitu fyosi,

na mibiki ya hina na nalido,

14 na nalido na safalani na michayichayi,

mdalasini na manimani na udi,

na midasi yingi yinungilila uswanu.

15 Kuva chimbwitu muchiwunga,

litepu lya machi yivavelili na unofu,

fibosi yifisesa machi kufuma Lebanoni.

16 Puliki yuwi liyegha lya kalihingila,

wisi yuwi liyegha lya kundamba,

puliki kumbindi ya chiwunga,

mlimemeshi lulanga fya kunungilila.

Bambu ayisi muchiwunga chaki,

ghalyi fivelekwa yifivelili nyanyi pitu fyosi.