1 Mawulu vaku mumikobasi yaku yiva nyanyi munu!

yuwi kamwali wa mutwa, mawulu vaku yivavelili filifili kucha madini va johali.

2 Lugufu lwaku luva kucha bilika,

lingajila kupota difwayi.

chiwunu chaku kucha chisughulu,

mumbalimbali livashengiteshili unanga.

3 Maveli vaku kucha mimbila ya sheshi,

kucha mbavala vavili.

4 Ngulu yaku kucha chindangawala chigoliwili kwa menu va ndembu,

mesu vaku kucha mitanda mumbwani ya Heshiboni,

pabehi na migeleli ya Beti labi.

Mbula yaku kucha chindangawala cha Lebanoni,

pawulola mbwani ya Damasku.

5 Pambindi ya mutwi waku kucha chidunda Kalimeli,

fwili shaku sivayila munu,

kuvayila munu hata mutwa akuwesha kukutama.

6 Loli wuuvayilili na kuva penu,

yuwi kamwali wuvelili nyanyi.

7 Kuva kucha libiki lya litendi,

maveli vaku kucha fivelekwa fya libiki lya litendi.

8 Ndadetili dangweli libiki lya litendi,

na kukonyola chikonywa fyaki.

Kwa nenga maveli vaku kucha fivelekwa fya misabibu,

pawupumulila ukunungilila nyanyi kucha tofaa,

9 na mlomu waku kucha difwayi yinovili.

Topi difwayi yisululi mbaka kwa yindimtamili,

yipiti kumbindi ya mlomu waki na menu vaki.

10 Yula yindimtamili nenga ndi waki,

na mweni akubayulila nenga.

11 Wisi yuwi yindikutamili, tuyendi kufitava,

tuyendi tukawonji kukoku kufijijeku.

12 Datuyimuki ngengi tuyendi kufitava fya misabibu,

tukaloli kucha liveleka na kunemuna,

na kucha uluva wa misabibu utuma kala,

wuwula wula na mikomamanga yikanda kala kutuma.

Aku ndi dandikupi utami wangu.

13 mindopi yikunungilila nyanyi,

pamlyangu wetu kuna fivelekwa fya nyanyi,

fyosi fyashonu na fya dahili,

ndikuvikila yuwi yindikutamili.