1 Vadadala va Yelusalemu vadasha,

yiwumtamili munu kayenda koti?

tuwombeli kalola koti yiwumtamili,

ili tukutangi kumsaka?

2 Mwehi wangu kalola muchiwunga chaki,

pala yipanemunila fitalu fyaki,

mweni akuvadima vafungami vaki,

na kukungasha unanga.

3 Nenga ndi waki yula yindimtamili, na mweni wangu,

mweni akuvadima vafungami vaki kuunanga.

4 Yuwi yindikutamili kuva kuvayila kucha mbwani ya Tilisa,

kuvayila kucha mbwani ya Yelusalemu,

ukapusha kucha lingandawu livelili na bendela.

5 Deku, ngukuluva loli pambali,

pawunola mvili ukujilima.

Fwili shaku kucha chipinga cha meni,

yivasunuka muchidunda cha Giliadi.

6 Menu vaku vambuleti kucha fungami vadadala,

yivasunuka kufuma kuyovishiwa.

Kila fungami kalela mambila,

na kwahela hata yumu yaveli weka hela.

7 Makanja vaku vavayila kucha mbiliwa sha mikomamanga kushetu ya shela yaku.

8 Vakuwesha kuva vahumbu milongu sita,

fidumu milongu nani,

na vakavali yivangajila kuvalangika.

9 Ila ngunda wangu,

ndi yumu hela,

mamundu akumtama munu

mweni ndi wapaweka kwa mamundu.

Vakavali vakumlola na kumkema kanemiliwa,

vahumbu na fidumu vakusomola jumu shaki.

10 Ghani yasosumoka kucha ngesha?

yamelimeta kucha mwesi,

yajumika kucha lingandawu livelili na bendela.

11 Nyingila muchiwunga cha milosi,

ili kulola muhali wa kubondi,

kulola kucha misabibu yitomola,

na mikomamanga yiyalula.

12 Tepu, ngajila kwihola yindimtamili,

kamika mumbutuka ya mkomi.

13 Dingi, dingi yuwi kamwali Mshulami.

Dingi, dingi tukuloli.

Wuli mukudayila kunola,

kucha mukulola msambu wa Mahanaimu?