1 Lijuva lililalila mutwa Ahasuelu amupili muhumbu Esta ulundamali wonda wa Hamani chimdwama wa Vayawudi. Na Modikayi ajumishiwili kwingila kwa mutwa nongwa Esta amuwombilili kucha avelimlongu waki. 2 Mutwa awoposolili peti yaki ya lihundu yila yampokili Hamani, amupili Modikayi. Pambeli Esta amamgolili Modikayi ghavi mkomi wa findu fyonda fila fiveyi fya Hamani.

3 Pambeli Esta aywangili kandi na mutwa, kunu paghalafuka mumawulu vaki na kulila. Kamuluva mutwa apeji milandu ya wafu ya Hamani, Mwagagi wayilatili kwa Vayawudi. 4 Pambeli mutwa amusonyilili Esta lukweku lwaki lwa wutwa lwa chumangandu, Esta katandamuka na kuwoloka pawulongolu yaki kadeta, 5 "Leki payikunowela mutwa, leki pawundama na pawuwona nyanyi, deku deku, landushi lilawu lya kuyasila kutali cha yandikili Hamani mwana wa Hamedati, Mwagagi kwilata kuvawulagha Vayawudi mumikowa yonda ya wutwa waku. 6 Kwanongwa dang'weshi wuliwuli kwiwunishila kulola njifwa ya vandu vangu, na kulola valongu vangu pavawulayiwa?"

7 Mutwa Ahasuelu kamuwombela muhumbu Esta na Modikayi Muyawudi, "Pikani! Ndimugayila Esta mali sha Hamani, kwanongwa avapundangilili Vayawudi. 8 Mukuwesha kuvayandikila Vayawudi lilawu lila limudayila na kuvika lihundu lya wutwa, limanyiki kwa litawa lyangu lya wutwa, dayighalambuliwi kandi ha."

9 Tepu mulijuva lya milongu mivili na tatu ya mwesi wa tatu wuvawukema Siwani, Modikayi avakemili chiyandika vonda va mutwa, kavalayisha vayandiki baluwa kwa Vayawudi vonda na vakomi, vatavala na vakomi va mikowa mya na milongu mivili na saba, kukandila Indiya mbaka kushi. Mayandiku vayandikiwa kwa kila mkowa kwa detelu yawu na mayandiku vawu na Vayawudi kwanyandikilu yawu na detelu yawu. 10 Modikayi ayandili mayandiku kwa litawa lya mutwa Ahasuelu, avikili lihundu kwa peti ya mutwa. Avayeghilili vandumindumi yiva kwelili fwalasi yivavelili na liwovi na yivatuva kalopu, yivawonikili muligoma lya mutwa.

11 Kwa mayandiku ava mutwa avajumishili Vayawudi mukila mbwani kwikungasha na kuyidima veni. Vajumishiwili kubowola, kuwulagha ngajila lusungu na kulivika munjifwa likungashu lyolyonda lya vandu au mbwani, yivelili yikuleva kwa fidumu pamu na vadadala na vana vawu, na kutola kwa mgogha ulundamali wawu. 12 Milandu ayi yingagolikili mumbwani shonda sha mutwa Ahasuelu, mulijuva lya lilongu na ndatu lya mwesi wa lilongu na mbili yivawukema Adali. 13 Mayandiku va kulandusha vafumishiwili kucha malawu mukila mkowa, na yiweshi kumanyika kwa kila vandu mumilima yonda, ili lijuva palifika Vayawudi vayitalishi kugola lugotu kwa vafimdwama vawu. 14 Kwa lishu lya mutwa, vala vanjagila yivakwela fwalasi vavelili na liwovi yivatuva munu, vawukili mbilu vayenda aku kuvalandulila mbaka mubwani ngomi yivelili na luviwu ya Shushani.

15 Modikayi pafumili munyumba ngomi ya mutwa, afwalili yingwa sha wutwa sha kangungu na ngeli, lihabiti lya kitani lya nyanyi lya langi ya salabati na likokoma likomi lya chumang'andu, vandu va Shushani vamemili seku na filumbi. 16 Kwa Vayawudi chavelili chipindi cha fwamuku seku, filumbi na ndundamilu. 17 Mumikowa yonda na mbwani shonda, na pala posi payifikili baluwa ya mutwa kwavelili na seku na filumbi gati ya Vayawudi, pamu na lihungu na kunemilela, na vandu vatangalili va milima yimonga vayigolili Vayawudi, kwa nongwa vavatilili munu Vayawudi.