1 Topi Elifwasi mundu wa mlima wa Temani,

akandili kudeta,

2 Wuli, leki mundu padayila kuywanga na yuwi dawukalali?

ghani yawesha kwiwunishila akotoo kudeta?

3 Pikani! Yuwi kuvawula vandu vatangalili,

na kuvatanga vandu vasosuvafu vavi na liwovi.

4 Filongu fyaku fikuvadindsha yivamlekili Chapanga,

vayikali ngimu wuyidayiliwa.

5 Ponopa gobuleku ayi yikuwona yuwi, wuli, ukulepusiwa,

Gobuleku sikutova na yuwi ukulemwa kwiwunishila.

6 Yuwi ukumwidumba Chapanga,

ukudayiliwa kuva goleki na wuvi na shuvililu.

7 Wiholi, ghani yangajila mbatiwa yadanganyishiwili?

awu yivavelili goleki vawulayiwa?

8 Chimanyili nenga, yagola wafu ndi fikumuwona fya wafu, 9 Chapanga akuvawulagha kwa ufuki waki, davadanganyishiwi kwa maya vaki.

10 Vandu va wafu vakubuluma kucha majabi mkali,

lakini minu yawu yikuketuliwa.

11 Likakasimba akusova kwa kupota cha kukamula,

na vana va majabi lidala vapwililika chaka chaka hela.

12 Mundu kanyeghela chilongu kwa chifisu,

mbikana chivapwepwili.

13 Chilongu chinyisila pamihi mumilotu,

pandiveyi mung'onju libu,

14 chipwembwi chingola mbaka bagama,

chindikanyisha mvili wonda.

15 Ng'ona uyegha wukupita pawulongolu yangu,

na mvili wangu wonda wujilima.

16 chishuka chila chiwoloka jii,

panolili ndichimanya ng'odu,

kwaveli jii, pambeli mbikana lishu,

17 "Wuli, mundu akuwesha kuva goleki pawulongolu ya Chapanga?

Wuli, mundu akuwesha kuva msangi pitu yamulumbili?

18 Chapanga akuvajumila ha vandumindumi vaki,

na vamakungu vaki akuvawona vavifyi.

19 Chapanga davajumili ha vandu yivalumbiwili kwa uganga,

vandu ava vonda yivalumbiwili kwa milifu, vakuwesha kufyoyiwa kucha finyi!

20 Pamalavila tukuva vakomu, na mbungamihi payifika tukusova,

vandu vakuyaghamila jola kwahela mundu yamanya kwilata ava.

21 Fyosi fitalamili fitukusikila dafitoliwi,

pambeli vakusova ngajila kuva na luhunja."