1 Nguyinyekwa ngalilu yangu,

lung'ong'u lwangu,

dadeti ngimu ya lihingili mundima yangu.

2 Dandimuwombeli Chapanga akotoo kuhigha,

lakini ang'ombeli chindimvifyili.

3 Wuli, yikunovela kundesha?

Kuneka nenga yimelili chichuku cha mawoku vaku?

Kunu pawusekilela fila fivayilatili kugola vandu vawafu?

4 Wuli, yuwi kuna mesu?

Ukuhigha kucha vandu wuvahigha?

5 Wuli, yuwi ukwikala majuva madokwa hela nga mundu?

Awu myaka yaku ya kwikala yiva nga ya mundu?

6 Mbaka ukudashikishila vifyu shangu,

ukusakisakila liki sambi shangu?

7 Yuwi kumanya kucha nenga ndivahela mbatiwa,

wala kwahela mundu yawesha kunowola kufuma kwa yuwi.

8 Mawoku vaku ndi yivadakili na kung'umba,

ponopa kung'alambuka na kudanganyisha.

9 Kotoo kwivasuwa kucha wanumbili kufuma muuganga,

wuli, dawufyoghi ng'uyi ndivi lifu?

10 Wuli, yuwi nda wambungulili nenga kucha majiva,

na wagolili ndiyigami kucha mafuta va majiva?

11 Wawumbili mvili wangu kwa mipava na mihembahemba

na kwilumba kwa njimba na ngwembi.

12 Kunyimba unofu na utami wungajila chingomeku,

ndambu wuudimili kunanisha mfuki wangu.

13 Lakini manya kucha findu afi wafifisili mundima yaku,

na nenga manya kucha afi fyavelili natilu yaku kwa nenga.

14 Wavelili ukuvetela uloli leki dagoli sambi,

ili ulemi kumbomela livifyu lyangu.

15 Leki ndina vifyu, pishu nenga!

Hata leki ndiva goleki, ndiyijumi ha,

nongwa mema chindipa, pandiyilola ngobuleku shangu.

16 Leki pandiyijuma hela

ukundendela kucha majabi,

na dawubajangi kwa filoja fyaku.

17 Yuwi ukunyeghela vatovilela vanimbi,

na maya vaku vakuyongisheka kwa nenga,

ukunyeghela vafimdwama vagoboli.

18 Nongwa liki yuwi Chapanga walekili nenga ng'oneki kwa mawangu?

Ngiba ningasovili ngajila vandu kung'ona.

19 Ngiba ningawonikili ha,

ningatoliwili kufuma muyinda ya mawangu na kuyeghiwa kusembi.

20 Wuli, majuva vangu va kwikala vasighala madokwa hela?

Uneki padokwa fwamuki.

21 Chipindi ngalihela kuyenda aku dang'uyi kandi ha,

kumlima wuvelili na chisi tyoo na lung'ongu,

22 mlima wuvelili chisi, na lumbwepwa lwa chisi

aku ngesha yaki chisi chikomi.