1 Topi Ayubu kamuyangula Elifwasi,

2 leki lihingili lyangu lingalingiwili,

na gobuleku yangu yingalingiwili,

3 fingasitapili pitu muhanga wa muluwongu,

ndi nongwa ngulesha hela filongu fyangu.

4 Yina, mivanu ya Chapanga Munaliwovi yinsoma,

na ndima yangu yilanda usungu waki,

mikapusha ya Chapanga ying'ona.

5 Wuli, chihongwi dasi akulila paghava na midasi?

Awu senga akulila kundilu?

6 Wuli, filivi fichapukili ukuwesha kulya ngajila munyu?

Awu lulendi lwa liyi luna chinosi liki?

7 Ndivahela bayililu ya kuyesha filivi afi,

filivi fya nahawu ndima yangu yiva fuliii.

8 Chapanga anganyangulili chinuvili,

anganyimbili chila yichidayila.

9 Leki Chapanga angadayilili kudanganyisha nakamu,

topi angang'ulayili mweni!

10 Leki angangolili mawoku munu,

ningasekililili mugobuleku ngomi,

ningasekili mugobuleku yingajila lusungu

kwanongwa ndifileka ha filongu fyaki fing'alili.

11 Wuli, ndiva na liwovi liki lya kuyendilela kwikala,

nongwa liki ndiyikali ngajila shuvililu?

12 Wuli, nenga ngumbiwa kwa migonguveli?

Awu njimba yangu yiva kucha shaba?

13 Nakaka ndivahela chindu cha kundanga,

utangi wonda wuwushiwa kwa nenga.

14 Leki mundu kana gobuleku ngomi angashuvilili vaghanja vaki vamutangi,

hata leki kaleka kumjuma Chapanga munaliwovi.

15 Vaghanja vangu mundanga ha, muva kucha mbengu sha chipindi,

mujanga kucha mbengu singajila machi.

16 Mbengosi sigubikiwa na balafu,

na seluji yiififa mugati yaki.

17 Lijuva paliyaka yikuyangaluka,

na chipindi cha luhutu hutu mbengu sikuyuma.

18 Vachulusi vakuyaghamila kwa kusaka machi,

vakushengeta kucheja na kufwila kuku.

19 Vanamwanja vachulusi va Tema vayaghamila pavasaka machi,

na vanamwanja va Sheba vakushuvilila kupata machi.

20 Valepisiwa kwanongwa vashuvililili machi,

pavafikili vabungunyuka fisingu.

21 Yumwi muva kucha mbengu asi,

mukuwona gobuleku yangu na mkutila.

22 Wuli, ndadetili munyimbi fupu?

awu muhombi swinda ili nenga nani?

23 Awu munowoli na vafimdwama?

Awu mugomboli na ayu yang'onela?

24 Mung'uli, na nenga danyamali,

mung'ombeli pala pamifyili!

25 Filongu fya nakaka fina liwovi likomi!

Lakini fimdeta fivahela maana kwa nenga?

26 Wuli, mukwihola kucha mukuwesha kughalambula filongu fidetili,

filongu fya mundu yalepisiwili fiva kucha liyegha.

27 Yumwi mukuwesha hata kuvagolela do vangalekwa vavi venu,

na kuvahemesha vaghanja venu!

28 Lakini ponopa munoli kuwushu,

nenga dadeti fyahela ha.

29 Deku, muwuleki wafu,

ponopa muneki kwanongwa nenga goleki.

30 Wuli, mukwihola kucha deta ufyangu?

Wuli, mukwihola nenga manya ng'odu kutama?