1 Pambeli Ayubu kayangula,

2 Findu nga afi ndifipikanila fitangalili munu,

mwavosi yumwi ndi vandu mungajila kujakwa kuvasiva vandu.

3 Wuli, ndili damufileki filongu fyenu fingajila kujakwa?

Wuli, chindu liki chivakuvilisha kuyangula?

4 Nenga ningaweshili kudeta nga yumwi,

leki yumwi mungavelili nga nenga,

ningaweshili kukasha filongu fyangu kwa yumwi,

na kuvalakalila yumwi.

5 Ningaweshili kukuvilisha ndima shenu kwa filongu fyangu,

na filongu fyangu fingavasikishili.

6 Lakini hata leki ngudeta, gobuleku yangu yikusika ha,

na pandiyikala jii kutama kukuwuka ha.

7 Nakaka Chapanga kunsakasha,

kaya yangu yonda kayiwulagha.

8 Kagola nyali, awu ndi utovileli wangu.

vandu vakung'ona ng'andadoli,

Ng'andilu yangu yikulangusha kucha ndiva na mbatiwa.

9 Chapanga akuhomukela na akumbundangila kwanongwa kakalala,

maya vaki kucha ng'ongolu wa kumidasi, mweni kava chimdwama wangu.

10 Vandu vakubedala na kuseka nenga,

mipinga kwa mipinga yishengitela na kundova mbandi.

11 Chapanga kagola nemwi kwa vafimdwama vangu,

na kugola vandu yivaveli na sambi vangamuli.

12 Ndayikalili kwa kusika,

lakini kabajanga,

na angamili pangulu na kudakanga,

kagola ndivi chindu cha kulingila misali yaki.

13 Vandu vagombili na kugumanga misali,

kabalula litima lyangu ngajila lusungu,

na mwasi wangu kawumwaya pasi.

14 Akubajanga chibita,

akumbundangila kucha ngandawu yanyekwili munu.

15 Nila na kufwala milobota,

nemwa na kwikala mulifu.

16 Wushu wangu wubyughala kwa kulila,

na ngopi shangu siva nditu pii,

17 Hata leki ndamteshili ha kwa mawoku vangu,

na dadavu yangu kwa Chapanga yiva nyanyi.

18 Yuwi mlima, kotoo kufifa wafu wuvagolilili,

na chivembu changu chipwililiki kosi.

19 Hata ponopa, manya kucha ndina mtovilela kumbindi kwa Chapanga,

mweni ndi yandashila aku kumbindi kwa Chapanga.

20 Vaghanja vangu vakubedala,

ngwitika misosi kumdadava Chapanga.

21 Ngumdayila mundu yandashila kwa Chapanga,

nga wuyigoleka kwa mundu yamwitashila ghanja mundu.

22 Nakaka, yisighala myaka midokwa hela,

danyendi aku dang'uyi kandi ha.