1 Pambeli Elifwasi mundu wa mlima wa Temani kayangula,

2 Wuli, mundu munaluhunja akuwesha kuyangula kwa filongu fya chisisihi?

Wuli, mundu ayu kamema filongu fya hela?

3 Wuli, munaluhunja akwitasha kwa filongu fingajila kujakwa,

awu kwa filongu fingajila kumanyika?

4 Lakini yuwi ukumbedala Chapanga,

na ukulema hata kumwihola Chapanga.

5 Wafu waku ndi ukukuwula yuwi,

na yuwi ukushawula kudeta ngimu vavifyi.

6 Filongu fyaku umweni ndi fikukuhigha,

na detelu yaku yikukutovilela umweni.

7 Wuli, yuwi kuva wa kwaa kuwoneka?

Wuli, wawonikili fidunda fikalihela kuva?

8 Wuli, wapikanishili hoshu sha chifisu sha Chapanga pachitemela?

Wuli, yuwi weka hela ndi muna luhunja?

9 Yuwi kuchimanya chindu liki yituchimanyili ng'odu yufwi?

Wuli, choti chiwudabulili yuwi yufwi tungajila kuchimanya?

10 Gati ya yufwi kuna vavaha yivaveli na luhunja,

yivavelili na myaka yitangalili pitu tati waku.

11 Wuli, Chapanga pakusikisha ukukwila ng'odu?

Wuli, chilongu chaki cha ushishamoyu kwa yuwi chindu ng'odu?

12 Nongwa liki ukuwoneka kukalala munu,

na kukikinala kuwushu?

13 Mbaka ukumuleka Chapanga,

na kudeta filongu fya wafu nga afi?

14 Mundu chindu liki, mbaka aweshi kuva goleki?

Awu yula yawonikili na mdadala, mbaka aweshi kuva ngajila uvifyi?

15 Leki Chapanga akuvajumila ha hata vamakuku vaki,

topi mbindi siva sha usangi ha pawushu yaki.

16 Dayivi wuluwuli kwa mundu yavelili mwafu na yayaghamilili,

yagola wafu kucha wula akulanda machi!

17 Ponopa Ayubu umbikanishi na nenga dandikulangushi,

dandikuwombeli fila findifiwonili.

18 Ng'ulilu ya vanaluhunja yivadetili nenga,

vavifili ha chindu kufuma kwa vavaha vawu.

19 Chapanga avagayilili vambuyi vetu yivavelili na luhunja mlima awu,

wala kwahela muhenja yapitili gati ya veni.

20 Mundu mwafu akuva na gobuleku majuva vaki vosi,

myaka yosi yivavikiwili vandu yivavatesha vamonga.

21 Mashu va kukapusha vakupikanika mumatu vaki,

pala payihola pasika vapoki vakumuhomukela. 22 Mundu mwafu kana shuvililu ha lya kufuma kuchisi,

mbelu yaki akusova kwa upanga.

23 Akuyeleje yeleja kusaka chilivi

padeta, Chiva koti? Kamanya kucha lijuva lya chisi likwisa.

24 Gobuleku na lung'ong'u fikumkapusha,

vakumuwesha kucha vadimi va mutwa wuvawomukela.

25 Kwanongwa kanyasula liwoku kamlimba Chapanga,

akwihola kucha kanaliwovi lya kumuwesha Chapanga munaliwovi.

26 Limkola ligafugafu ampundangilili Chapanga,

kunu kava na ngawu, yidindalili.

27 Hata leki wushu waki waveli filifili kwa kulyamunu, na chiwunu chaki chiyikala filifili.

28 Kayikala mumibowubowu yingajila vandu,

lakini dayikali munyumba sivelili mibowubowu.

29 Mundoyu daghavi mlundamali ha,

na ulundamali waki dawikali jola ha.

Na findu fyaki fyosi dafiyaghamili.

30 Dayilyepi ha na chisi cha njifwa,

Daghavi kucha mibiki yiyumishiwa,

uluva waki dawuyeghishiwi na uyegha.

31 Ngiba aleki kushuvilila usisighi na kwijanga mweni

nongwa usisii ndi dayivi fupu yaki.

32 Dahombiwi wuyidayiliwa akalihela mnofu,

na chileli chaki dachiyikali majuva vatangalili ha.

33 Daghavi kucha libiki lya lisabibu yililaghasha misabibu midodi,

nga libiki lya liseyutuni yiliponesha uluva waki.

34 Na vosi yivamlema Chapanga davafwi mbendi,

na motu dawunyanyi mibudi ya vala yivadayila kupokela swinda.

35 yivayima yinda sha udesi na kulela wafu,

ndima shawu simema ujangi.