1 Pambeli Ayubu kakanda kudeta kunu palilapila lijuva lila lyawonikili. 2 Ayubu kadeta, 3 lilapiliwa lijuva lila ling'onikili,

na mandandu vala yivadetili yinda ya mwana mlulumi yiyingili!

4 Lijuva lila livi chisi,

Chapanga yavelili kumbindi akotoo kuliwona,

Wala ngesha yoyonda yikotoo kung'alika kandi.

5 Lijuvali livi chisi tyoo,

ligubikiwi na lifundi, na pamusi pagubikiwi na chisi tyoo.

6 Pamihi pagubikiwi chisi tyoo,

na likotoo kumanyika kucha mumwaka wula kwavelili lijuva ali,

wala lijuva ali likotoo kuvalangiwa mulijuva lya mwesi wowonda.

7 Lijuvali kukotoo kuyima yinda yoyonda,

mulijuvali kukotoo kuva na mundu munaseku.

8 Vandu yivamanya kulapila, topi valilapili lijuva lila

na linjoka liyikemiwa Lewiyatani lipundangili lijuva lila.

9 Yimang'andu dalivi chisi mulijuva ali,

daligoli lijuva likotoo kulangasha pamalavila,

na chisi dachipeli haa.

10 Kwanongwa pamihi yila yativili ha yinda ya mawangu,

lyagolili nenga ng'oneku nakuwona gobuleku ayi yosi.

11 Ngongwa liki ndafwili ng'odu chipindi pang'onikili?

Awu mbona ndadanganyikili ng'odu chipindi pang'onekeyi?

12 Nongwa liki mawangu anelili?

Na nongwa liki ndayongili maveli vaki?

13 Leki ningafwili,

ponopa ningawonjili na kupumlila kwa kusika,

14 pamu na vatwa na vatavala va mlima,

yivajengili nyumba nofu, ponopa yiva mibowu bowu.

15 Awu ningapumulilili na vakomi yivelili na chumang'andu,

na yivamemishili nyumba shawu madini va mbiya.

16 Awu ndalemwili liki kuva ndengu,

nga mwana chali yangajila kuwona ngesha nakamu.

17 Aku kungajila kuyashiwa na vandu vawafu

aku kuvapumulila yivatofyili.

18 Yivawopiwili muchijaka vakufwamuka muchipindi cha kusika,

vakupikana kandi ha kulaka kwa machonda.

19 Amu muvaveli yivavelili na uwesu na yivangajila uwesu

na vavanda vava pekesu kwa bambu mundu.

20 Nongwa liki ukumng'alikila ngesha mundu yavelili mugobuleku?

Nongwa liki ukuvagayila unofu yivavelili na lung'ong'u mundima?

21 Vala yivadayila kusova vakusova ha,

na vakusaka sembi pitu lusanja lufisikili.

22 Vandova vakunemilela na kusekilela,

mbaka pasova na kusikiwa.

23 Nongwa liki nguyendilela kwikala,

Chapanga kang'oma kuyendilela na unofu.

24 Badili ya kulya nenga ngulila,

na misosi yangu yikuvilivita kucha machi.

25 Chila yindichitila ndi nguchiwona,

na chila yichinyimba ufoghi ndi chimvika

26 Ndivahela pausi, wala sika ha,

lakini gobuleku hela yinyisila.