1 Topi Ayubu kayangula,

2 Yina, manya yumwi ndi vandu va luhunja,

luhunja dalupepi pamusova!

3 Nenga wuwowu ndiva na luhunja kucha yumwi,

nenga mundu muna luhunja ludokwa kwa yumwi.

Fyosi fimudetili kila mundu kafimanya.

4 Nenga ndiva mundu wa kusekiwa na vajofi vangu,

ndamuluvili Chapanga na mweni kanyangula,

yimelili goleki na ngajila mbatiwa ndiva chiloja kwa vandu.

5 Mundu pasikili akuva muna mbendalu kwa vala yivavelili na chivembu,

akulola kuteshiwa kwa vala yivagobuleka munu.

6 Lakini vapoki vakwiwona vasika,

na vala yivamkalalisha Chapanga vava nyanyi,

liwovi lyawu liva mlungu wawu.

7 Ponopa muvadashi vambongu na vang'ongolu davakuwuli,

awu wuvadashi vambongu davakuwombeli.

8 Wuwula wulu wudashi mlima na weni dawukuwuli,

muvaleki vasomba va mubahali vavapi unjagila.

9 Gati ya filumbi fyose afi chilumbi liki chingajila kumanya kucha Bambu Chapanga ndi yagolili afi?

10 Mweni ndi muna unofu wa vang'ongolu vanda,

akuvagayila ufuki vandu ili vayikali.

11 Wuli, lijeji likulinga duhu filongu,

nga lulimi wuluyesha filivi?

12 Vavaha ndi yivavelili na luhunja,

na ngalilu ya majuva vatangalili ndi yikuyegha umanyi.

13 Luhunja na liwovi ndi fya Chapanga,

mweni kana luhala londa na kamanya kila chindu.

14 Pabowola kwahela yawesha kujenga kandi,

pamvika mundu muchijaka, kwahela yawesha kumfumisha.

15 Palimba ndonya, mlima ukuyumu,

palekishela ndonya, mlima ukuva na lilava.

16 Chapanga kana liwovi na luhunja,

yivajanga na yivajangiwa vonda vaki.

17 Chapanga akuvagola vanaluhunja kuva na chindipa,

akuvagola valamula kuva vapufi.

18 Mweni akuvawushila vatwa ukomi wawu,

akuvagola vawoneki kucha vavanda.

19 Akuvagola vatambika vapati chindipa,

akuvawisha pasi vandu yivavelili na liwovi.

20 Akuvabwisha vala yivamanyikili,

akuvapoka luhunja lwawu vavaha.

21 Akuvapa chindipa vatavala,

akuvawopola fyewu yivaveli na liwovi.

22 Akugubutula fila yififisiwili muchisi

akuvika lipala fila fifisiwili.

23 Akuvagola vandu va milima kuva na liwovi, pambeli akuvadanganyisha,

akuvagola vandu va milima vatangali pambeli akuvapwililisha.

24 Akuvawushila filongosi va mlima umanyi wawu,

na kuvagola vayeleji kuchivala kungajila deha.

25 Vakupapata papata kuchisi kungajila ngesha, na kuvagola vaveveli kucha vanjayila.