1 Topi Sofali mundu wa mlima wa Naamati kamuyangula,

2 Wuli, filongu fyosi fiwudetili fikotoo kuyanguliwa?

Wuli, mundu ayu yavelili na filongu fitangalili kavahela mbatiwa?

3 Wuli, filongu fyaku fivagoli vandu vanyamali jii?

Wuli, kwahela mundu wa kukubwisha, hata leki ukudeta fya usisighi?

4 Yuwi kumuwombela Chapanga kucha, Chideta ndi nakaka,

na kuva goleki kwa Chapanga.

5 Leki Chapanga angadetili,

angakuyangulili!

6 Angakulangushili luhunja lufisikili,

nongwa mweni kana umanyi utangalili,

na umanya kucha, Chapanga kakuvalangila ha vifyu shaku shonda.

7 Wuli yuwi ukuwesha kuumanya fisu sha Chapanga?

Wuli, ukuwesha kumanya chingomeku chaki mweni Chapanga munaliwovi?

8 Ukomi wa Chapanga pitu kululanga, yuwi dawugoli liki?

Ukomi waki uyenda pasi pitu kumambi,

Weshi ha kumanya chindu chochosi?

9 Ukomi wa Chapanga pitu mlima wonda,

ukupita hata upana wa bahali.

10 Leki Chapanga papita na kumkamula mundu na kumtaya muchijaka na kukuyegha kuchitemela

ghani yawesha kumkanisha?

11 Chapanga kavamanya vandu vafyangu,

mweni kamanya vifyu shonda.

12 Lakini mpufi akuwesha ha kuva na umanyi,

kucha chihongu dasi, akuwesha ha kulela mundu.

13 Lakini yuwi Ayubu, pawumjumila Chapanga,

pawudadava kwa Chapanga,

14 leki kuna uvifyi uuleki.

Kotoo kujumila wafu wuvi munyumba yaku.

15 Leki pawugola findikuwombilili, dawuwoneki kuvahela soni,

dawuwoloki kwa chiganu ngajila kwipwelesha.

16 Gobuleku shaku shonda dawusivasughi,

dawusikumbuki kucha lilava lipitili.

17 Ngalilu yaku daying'ali kucha lijuva lya pamusi,

na chisi dachivi kucha pamalavila puti.

18 Na yuwi dawuvi na lyogha ha, nongwa kuva na shuvililu,

dawudimiwi na kupumulila nyanyi.

19 Dawuwonji libu ngajila kukapushiwa na mundu,

vandu vatangalili davakuluvi utangi.

20 Lakini mesu va vandu vawafu davakuwoni ha,

deha shonda sha kunyelipukila davasiwoni ha,

na shuvililu yawu ya mbelu dayivi kusova!