1 Ayubu, kemi pawudayila, leki kuna mundu yakuyangula?

Yoti gati ya ava makungu dakutangi? 2 Ligafugafu likumuwulagha mundu msisii,

kunyekwa kukumdanganyisha mundu mpufi.

3 Nenga ng'ona mundu mpufi akufwamuka,

lakini tepu kayaki yilapiliwa.

4 Vana vaki vava unofu ha,

hata pavayeghiwa kuchitemela vakusulumiwa kwanongwa kwahela wa kuvayitashila.

5 Yivaveli na njala vakulya filivi fivabenili,

vakutola hata fila fivelili pagati ya misomi,

yivaveli na dobukelu vakudobukela ulundamali waki.

6 Nongwa tabu sikufuma muwuganga ha,

wala gobuleku sikumela muuganga ha.

7 Ila mundu akuwoneka agobuleki, ngimu mivalivali wuyivavalika.

8 Leki ningavelili yuwi, ningamsakili Bambu,

ningamuwombilili gobuleku yangu.

9 Mweni yagola findu fikomi, fingajila kumanyika,

yagola fya kwikang'anika fingajila kuvalangangika.

10 Mweni yatonya ndonya pamlima,

na ya yegha machi kufitava.

11 Yavagola vashishamoyu vayinuliwi,

na vala yivalila akuvagola vasekileli.

12 Mweni akulimba

fila fivadayila kugola vandu vawafu,

mweni akulimba hoshu sha vamanyi.

13 Mweni akuvakamula vala yivayiwona vanaluhunja,

na fila fivayilata vandu vadindalili fikudanganyika kalopu.

14 Chisi chikuvawona chipindi cha pamusi,

vakupapata kucha pamihi.

15 Lakini Chapanga akuvalowola vagaju vakotoo kuwulayiwa,

akumkombola mgaju kufuma mungonji sha vandu yivadindalili.

16 Topi, mgaju kana shuvililu,

pambeli wafu wukupejwa.

17 Kanemiliwa mundu yasekilela padetiwa na Chapanga,

kotoo kubedala Bambu Chapanga muna liwovi pakuwomba.

18 Kwanongwa mweni yatutesha na mweni ndi yatunanisha,

mweni ndi yatugobola na kwa liwoku lyaki akutunanisha.

19 Kwahela gobuleku dasitufiki,

hata gobuleku pasikufumbukila kwahela wafu dawutufiki.

20 Chipindi cha njala ngomi daatulowoli,

hata mumgoha mkomi daatulowoli na njifwa.

21 Dakudimi hataleki pavakujowola,

vandu pavavapundangila dawutili ha.

22 Dawuseki payisa gobuleku na njala,

wala dawutili ha vang'ongolu vakali va mumlima.

23 Migonguveli ya kufitava dayikulimbi ha kulima chitava,

na vang'ongolu va kumidasi davakuhomukeli ha.

24 Mukaya yaku dakuvi na kusika,

dawukawuli ligoma lyaku, dawuchiwoni ha chiyangilili.

25 Kandi dawumanyi kucha chileli chaku chitangala,

na fileli fyaku davavi ngimu midasi ya mumlima.

26 Dawusovi chipindi kuva mgogolu munu,

ngimu ng'anda ya nganu yiikungashiwa chipindi chaki.

27 Afi tufilembesha na ndi wufivelili nakaka,

fipikani na kufikola kwa fwayida yaku.