1 Topi Ayubu kamyangula Bambu Chapanga kadeta,

2 Manya ukuwesha kugola kila chindu,

chochosi chiwilata kugola kwahela wa kukulimba.

3 Ghani yawesha kufifa chilongu changu ngajila umanyi?

Nakaka deta filongu ningajila kufimanya,

findu fya kwikang'anika munu yindifimanyili ng'odu.

4 Wadetili, mbikani dawung'ombeli,

dandikudashi na yuwi dawunyanguli.

5 Ndapikanishili filongu vyaku kwa majeji hela,

lakini ponopa ngukuwona kwa mesu vangu ndimweni.

6 Nguwona chindipa kwa fila figolili na kupomela kwa lifu na lifu lya pachikoshu.

7 Bambu pamuywangili kala na Ayubu, kamuwombela Elifwasi mundu wa Temani, "Ndina maya kwa yuwi na vaghanja vaku, nongwa yumwi mwanywangilili finofu ha ngimu wadetili ndumindumi wangu Ayubu. 8 Topi ponopa mtoli mikambaku saba ya senga na vafungami saba muyendeli kwa ndumindumi wangu Ayubu, mukatawuli litambiku lya kunyanya tinigu kwanongwa ya mwaveni. Na ndumindumi wangu Ayubu davadadavili yumwi na nenga dandimpikani, dandivagoli ha ngimu wuvelili upufi wenu."

9 Topi Elifwasi mundu wa Temani na Bilidadi mundu wa Shushi pamu na Sofali mundu wa Naamati vagolili ngimu Bambu Chapanga wavawombilili, na mweni Bambu Chapanga ajumilili dadavu ya Ayubu.

10 Ayubu pavadadavilili kala vaghanja vaki, Bambu kamsangila kandi Ayubu kavili pitu dahili. 11 Valongu vonda va Ayubu na vosi yivammanyili dahili vamtyangila kayaki na kulya pamu filivi. Vamkola mawoku kwanongwa ya gobuleku shosi Chapanga shamupili. Kila mundu yayisili amupili Ayubu madini va mbiya na peti ya chumang'andu.

12 Pambeli Bambu kamnemela munu Ayubu chipindi cha mbelu cha ngalilu yaki pitu pakwandi. Ayubu aveli na vafungami alufu lilongu na mchechi na ngamiya alufu sita na vasenga va kulimila alufu mbili na fihongu alufu yimu. 13 Wuwowu avelili na vana valulumi saba na vadadala vatatu. 14 Yula kamwali wa kwaa kamkema Yemima na wa pili Kesia na wa tatu Kelini Hapuki. 15 Mumlima wula wosi kwavelili ha vadadala vavayilili nga vala vana va Ayubu, na tati wawu avapili mbala ngimu wavapili vala vana valulumi.

16 Pafipitili afi Ayubu ayikalili myaka mya na milongu mchechi, avawonili vayisukulu na fiwughuyu fyaki fyosi mbaka chileli cha mchechi. 17 Topi Ayubu asovili mgogolu munu mundu yamemili myaka yitangalili.