1 Ayubu kayendilela kadeta kandi,

2 Leki ngavelili nga dahili,

chipini chila Chapanga padimeyi,

3 Chapanga aveli chilongosi wangu kucha kakola luliku kunangusha deya,

panyendanyenda muchisi luliku lwaki lukugola nduvi nyanyi.

4 Chipindi cha dahili pandiveyi na liwovi na Chapanga adimili,

na Chapanga aveli ghanja wangu mkomi yadimeyi nyumba yangu.

5 Chapanga munaliwovi paghaveyi pamu na nenga,

vana vangu vashengitela.

6 Majuva vala vasenga na vameni vangu vanyimbili majiva vatangalili,

na misaituni yangu yanemunelili mumigonguveli.

7 Pandang'anili na vavaha mumlyangu mkomi wa mbwani,

ndayikalili na veni,

8 fijana pavang'ona vakuwoloka mumbalimbali,

na vavaha vakutandamuka.

9 Vakomi pavang'onili valekili maywangu,

na vavawombilili vandu vanyamali.

10 Yivamanyikili munu na veni vanyamalili,

na vaywangili ha.

11 Kila yapikanishili filongu fyangu, anywangilili finofu,

na vala yivang'onili vajumili.

12 Kwanongwa ndamtangili mgaju yanuvili utangi,

na ngalekwa yaveli hela mundu wa kumtanga ndamtangili.

13 Yivavelili samba vasova ndavatangili na veni vajumili,

ndagolili ndima sha vangalekwa vasomoli kwa seku.

14 Majuva vosi ngugola ngimu wuyidayiliwa,

yiva kucha lihabiti lyangu na chilemba changu.

15 Nenga ndavalongushili vangalola,

na kwa ndevindevi ndavelili mtangi wau.

16 Nenga ndavelili tati wa vagaju,

ndavatashilili vahenja vapati fivadayiliwa.

17 Ndabenangili wovi sha vandu vawafu,

na ndavalowulili vandu yivapundangiwili.

18 Dayikali kwa fwamuku mumba yangu ndimweni,

na ndandiyikalimajuva vatangalili.

19 Nenga ndiva kucha libiki litandalikili mikigha yaki mumachi,

na pamihi mitungwi yikwikala mutafyi yaki.

20 Ukomi wangu dawuvi washonu kwa nenga,

majuva vosi dandivi na liwovi kucha msali na livani lya shonu.

21 Vandu vampikanishili na kuvetela,

vayikalili jii kupikana kucha ndadeta liki.

22 Pamalilili kudeta vavelili hela cha kudetela,

vapikanilili kila chilongu na kwihola.

23 Vandu vametilili kucha yivavetela ndonya,

vavelili vakumeta kucha ndonya ya mbinga.

24 Pavalepisiwili ndavalangushili seku,

seku ya wushu wangu yvakola mawoku.

25 Ndavalongushili deha na ndavelili nga mkomi wawu,

ndavelili kucha mutwa mulipinga lyaki,

ndavelili mundu yavakola mawoku yivavelili na chivembu.