1 Elihu akumalila kwa kudeta achi,

2 Mung'unishili padokwa, ndikuwombeli chindu,

nongwa kuna fitangalili munu fya kudeta kwilata Chapanga.

3 Dandwuyeghi umanyi wangu kufuma kutali,

na nenga dandimugayili haki Chapanga yanumbili nenga.

4 Nakaka filongu fyangu fyaudesi ha,

yavelili telatela muumanyi kava pamu na yuwi.

5 Chapanga ndi muna liwovi lakini akumbedala mundu ha,

na kwahela changajila kuchimanya.

6 Akumleka ha vavifyi ayendileli kwikala,

ila akuvagayila vagaju haki yawu.

7 Mweni akuvadima vandu goleki,

akuvavika pamu vatavali kucha vatwa mufigoda fya ukomi.

na akuvakwesha jola.

8 Leki vandu pavawopiwa migongola,

vawomela kwa fila fivagola,

9 Chapanga akuvalangusha figoli fyawu fya wafu,

kucha vagola sambi ya kwifuna.

10 Mweni akuvadiwula majeji vawu, vapikani ngayikilu,

na kuvawombela vawuyi na vawuleki wafu wawu.

11 Leki pavampikana na kumkimbanikila,

davanemunili majuva vawu vosi yivasighalili na ngalilu ya kusika.

12 Lakini pavapikana ng'odu, davadanganyishiwi kwa upanga,

na davasovi kwa upufi wawu.

13 Vangajila kumjuma Chapanga vakuvika maya mundima shawu,

hata pavava mugobuleku vakumuluva ha utangi.

14 Vakusova vakali fijana,

ngalilu yawu yikupela kwa chindipa.

15 Ila vala yivagobuleka akuvalowola mugobuleku shawu,

na akuywanga nawu mugobuleku shawu.

16 Mweni akukukema ili uwuki mugobuleku,

akuviki mahali pafwamuku pangajila tabu,

na kukugayila filivi fitanglili.

17 Lakini ponopa kuhighiwa ngimu wuyidayiliwa,

highilu ya haki yikukuwona.

18 Topi wivavali swinda yikotoo kukujanga,

hata hombu ngomi dayilemwi kukugombola.

19 Ulundamali waku na liwovi lyaku likomi fikuwesha kukutanga,

fikotoo kukugola kwingila mugobuleku,

20 ukwipwelesha pamihi pakotoo kufika,

chipindi vandu pavawushiwa mahali pavavelili.

21 Wivavali kotoo kuuwuyila wafu,

wula wukudayila munu wafu pitu ugoleki.

22 Ghani yawesha kumuwula chindu,

ghani yawula nga mweni?

23 Ghani yawesha kumuwombela cha kugola,

awu kumuwombela, yuwi kugola fingajila kuva telatela.

24 Kotoo kwivasuwa kufijuma figoli fyaki,

fila vandu yivafijuma.

25 Kosi vandu vawona chila chagolili Chapanga,

lakini tuvalola kwa kutali.

26 Chapanga ndi mkomi munu,

tolitoli ya myaka yaki yikumanyika ha,

27 Nongwa mweni akukwegha kumbindi machi,

na kufuma mumafundi akuvagola kuva ndoya.

28 Mafundi vakugola vatonyi ndonya,

na ndonya yikuvatonyela vandu vonda.

29 Ghani yamanyili ndambu wuvayala mafundi,

awu lukata wululindima kululanga.

30 Mweni akuyala ngesha kululanga kosi

lakini mihiva ya machi yikulekiwa muchisi.

31 Kwa kutonya ndonya ndi wavagayila vandu filivi,

na akuvagayila filivi fitangalili.

32 Mweni akuwukamula umemi kwa liwoku lyaki,

na akuponya ha kula kwadayila kudangila.

33 Lupanda lukulandula kwisa kwa lingukukumbi,

na vang'ongolu va kufughiwa vakumanya likwisa.