1 Topi ava vandu vatatu Elifasi na Bilidadi na Sofali valekili kumuyangula Ayubu, kwanongwa ayiwonili mweni goleki. 2 Topi Elihu mwana wa Balakeli, wa kabila lya Busi kufuma lukolu lwa Lama aveli bahala, akalalili kwanongwa ayubu amkalalalili Chapanga badili ya mweni Ayubu. 3 Wuwula wulu avakalalili vala vaghanja mundu vatatu, kwanongwa vaweshili ha kuyangula gobuleku sha Ayubu kucha sifuma koti, topi vadetili kucha Ayubu kana mbatiwa. 4 Elihu avelili akuvetela ava vavaha vatatu vaywangi na Ayubu, kwanongwa mweni avelili mdokwa kwa veni. 5 Lakini Elihu pawonili vala vavaha vatatu vavahela cha kumuyangula Ayubu, akalalilili munu. 6 Topi Elihu mwana wa Balakeli wa kabila lya Busi kakanda kuywanga,

Nenga chijana na yumwi vavaha munu,

topi ndatilili kuvawombela hoshu shangu.

7 Ndayidetilili mundima, kucha Wuvaleki vavaha vadeti,

yivavelili na myaka yitangalili vawuli luhunja.

8 Lakini ayu mfuki yavelili mugati ya mundu,

ayu ndi mfuki wa Chapanga yavelili na liwovi lyosi na ndi ayu yamgayila mundu umanyi.

9 Vavaha weka hela ha yivavelili luhunja,

wuwula wula vandu yivavelili na myaka yitangalili weka hela ha ndi yivamanyili findu finofu.

10 Topi ngudeta, mumbikanishi nenga,

muneki na nenga deti hoshu shangu.

11 Nenga ndavetili pamdeteyi, napikanishili chimudeteyi,

pamusakeyi filongu fya kudeta.

12 Ndavapikanishili kwa fisingu, lakini kwahela hata mundu yumu yalangushili kucha Ayubu kanambatiwa,

wala kahela hata mundu yumu yayangulili fyadetili Ayubu.

13 Topi kotoo kudeta kucha, "Yufwi ndi Vamanyi."

Kotoo kudeta, "Chapanga damulangushi Ayubu kucha kavifya, vandu vaweshi ha kugola nahawu."

14 Fyadetili Ayubu fikunata nenga ha,

wala nenga dandimuyanguli nahawu ha kucha wumumuyangulili yumwi.

15 Valunguvala na vangula kandi ha,

vavahela cha kuyangula.

16 Wuli, na nenga meteli kwanongwa mukudeta ng'odu,

kwanongwa munyamala muvahela cha kuyangula.

17 Na nenga wuwula wula danyanguli chindichimanyili,

na nenga dadeti hoshu simelinashu.

18 Ndiva na filongu fitangalili munu fya kudeta,

ndima yangu yikunguvilisha kudeta.

19 Nenga ng'weshi ha kunyamala,

ndiva kucha chijamanda chimemili difwayi ya shonu, ndiva samba baluka ili fyosi fimwayiki.

20 Ngudeta ili siki,

ngudayiliwa kudeta ili nyanguli.

21 Dandivi na lushawu na mundu yoyonda ha,

wala dandiyiwongoli kwa mundu ha.

22 Nenga manya ha kwiwongola,

Chapanga dalopukeshi kundova ngimu wugolili.