1 Bungunyuka fisingu,

na majuva vangu va kwikala pamlima vapela,

njifwa yangu samba yiva.

2 Nakaka yivadanila vashengitela,

vakudanila lipala hela.

3 Ngujumiliwa na Chapanga, akujumila chideta.

kwahela mundu yayilumba na nenga kwa chila chideta.

4 Nongwa kudiva hala sha vaghanja vangu,

topi valeki vang'weshi.

5 Mundu yavashengeta vaghanja vaki ili apati ijala,

mesu va vana vaki davatojoki.

6 Chapanga kagola nenga chiloja kwa kila mundu,

kila mundu akundemela mita kuwushu.

7 Mesu vangu vava wuniwuni kwanongwa ya misosi,

fisingu fyangu fyosi fiva kucha chimbwepwa.

8 Vandu goleki vosi vakwikang'anika pavalola gobuleku yangu,

na vangajila mbatiwa vakuvagola vakalali, na vangajila kumdadava Chapanga.

9 Hata naha, vandu goleki davalemileli kukola deha shawu,

na vosi yivagola fya usangi davayendileli kuva na liwovi munu.

10 Lakini mwavosi mwisi,

gati ya yumwi dandimuwoni ha munaluhunja.

11 Majuva vangu vapela, na fila fidayilili kugola fifika mbelu,

shuvililu ya ndima yangu yiwuka.

12 Kwa vaghanja vangu ava pamihi yiva pamusi,

kwa veni vamanya ha gati ya ngesha na chisi.

13 Kucha kumambi ndi nyumba yangu,

na ulili wangu wuva muchisi.

14 Leki ndiyikema sembi tati wangu,

na mifinyi ndi mawangu awu muhajawangu,

15 topi shuvililu yangu yiva koti?

Ghani yawesha kulola chila chishuvilila?

16 Panyenda kumlima wa vandu yivasovili, shuvililu yangu yosi dayipeli.

Fyosi yifishuvililili dafiyendi na nenga mulyowu.