1 Kila mundu kana gobuleku mumlima.

vakudayiliwa kugola chichuku kucha mvanda.

2 Mweni kava kucha mvanda yashuvilia kwikala palumbwepwa,

kucha chibaluwa yavetela ijala yaki.

3 Ndivahela cha kushuvilila mumyesi yosi,

pamihi majuva vosi ngugobuleka munu.

4 Pang'onja ngudeta nguyimuka ndili?

Nongwa saa sha pamihi siva ndali munu,

ngughalafuka ghalafuka pawulili mbaka kuchi!

5 Mvili wangu wumema mifinyi na liku,

njimba yangu yimema ufila na mipu.

6 Majuva vangu va kwikala vakuyenda kalopu,

na veni vakufikila mbelu ngajila kushuvilila.

7 Yuwi Bambu Chapanga kotoo kwivasuwa kucha ngalilu yangu kucha ufuki hela,

na dandivi na seku kandi ha.

8 Mundu yanola ponopa dang'oni kandi ha,

chipindi mesu vaku dawung'oni ng'onja kala.

9 Ngimu wula lifundi wuliva wuniwuni na kuyaghamila,

ndi nawula vandu wuvayenda kumambi ngajila kuwuya.

10 Awuyi kandi ha kwikala,

na vandu vakuvavasuva nakamu.

11 Topi danyamali ha!

dadeti kwa lihingili lya ndima yangu,

danili kwa lihingili livelili mundima yangu.

12 Wuli, nenga ndiva bahali,

awu liwongolu lya mubahali, mbaka kumikila vadimi?

13 Padeta, ng'onji fwamushi ndima yangu,

chigoda changu dachinyangishili gobuleku yangu.

14 Yuwi ukugola ndili kwa kunyeghela milotu,

ukungapusha kwa kunyeghela fila yindifilota,

15 ng'ona ngiba ndiyikongi luwoyi ndimwenii,

ngiba sovi pitu gobuleku asi.

16 Nguyinyekwa ngalilu yangu.

Nguwesha ha kwikala majuva vosi,

muneki weka nongwa majuva vangu chindu ha!

17 Mundu chindu liki mbaka ukujuluka?

Nongwa liki mbaka ukwikimbanisha kwa mweni?

18 Nongwa liki ukwisa kumlola kila pamalavila,

na kila chipindi ukwisa kumuyesha!

19 Dawuyendileli kusheta mbaka ndili,

ngajila kuneka padokwa padokwa?

20 Kwa chiganu ukulola chila chivagola vandu,

hata leki ngugola findu fya wafu,

yingavelili chikandilu ha cha lushoshu kwa yuwi.

Topi nongwa kushaula kunatula nenga?

21 Wuli, mbona ukumbomela ng'odu sambi shangu?

Na kumbomela vifyu yangu?

Kwanongwa tepu hela dang'onji mulifu,

dawutipuki kunsaka lakini dawung'oni ha.