1 Nongwa liki Chapanga munaliwovi akuvika ng'odu chipindi chimanyikili cha highilu?

Nongwa liki hata vala yivamumanyili vavamanya ng'odu majuva vaki?

2 Vandu vakusewusha filangushilu fya mbaka,

na vengi vakuvadima vang'ongolu yivavanyayili.

3 Vakuvapoka vangalekwa vafihongu vawu,

vakumvika poni senga wa ngalimlyangu.

4 Vakuvapoka vagaju fila fivadayiliwa kupata,

na kuvagola vagaju va mumlima vatuvi.

5 Vagaju vava kucha chihongu dasi yivaveli kuchivala,

vakusaka filivi kuchivala,

vakupata filivi fya kuvapa vana vawu.

6 Vagaju vakusalala mufitava fya vandu,

vakusamba misabibu mufitava fya vandu vawafu.

7 Pamihi posi vakuwonja ngajila kwigubika,

vavahela cha kwigubika chipindi cha lupepu.

8 Ndonya yitonya kufidunda yikuvagola vavi nyapinyapi,

topi vayififa mumigonguveli mikomi vakotoo kunyapa.

9 Vana vangalekwa vakudanguliwa mufifuva fya vamavawu,

na vengi vakuvahadisha vana va vagaju vahomba mbiya.

10 Vakuyendayenda chipula nongwa vavahela cha kufwala,

vapapa ng'anda kunu vananjala.

11 Pavavakamila vandu vawafu mafuta vawu va misayituni,

na kukama difwayi ya misabibu ngajila kuyonja kunu vayumilwa.

12 Chivembu cha yivasova chikupikanika kufumila aku kumbwani,

na yivakandiwili mivanga vakuluva utangi,

lakini Chapanga akumuwomba womba mundu ha kwa kugola wafu.

13 Vandu vawafu vakulema ngesha,

vasimanya ha deha sha ngesha na vakudayila ha kukola deha shaki.

14 Yawulagha, akuyimuka malavila puti,

avawulaghi vagaju na yivangajila chindu,

pamihi akuhija.

15 Muwoni akuvetela lijuva lidibi,

kunu padeta, kwahela mundu dang'oni, pambeli akugubika wushu waki.

16 Pamihi vefi vakubowola nyumba ili vayingili,

lakini pamusi vakwififa vakutila ngesha.

17 Kwavoseva chisi ndi pamalavila,

nongwa veni ndi vaghanja va chisi chikomi.

18 Mukudeta, vandu vawafu vakutoliwa kalopu na lilava,

makalu vawu valapiliwa,

kwahela yayenda kufitava fyawu fya misabibu.

19 Ngimu seluji wuyiyangaluka palijuva,

ndi wuyivelili kumambi payivatola vandu vawafu.

20 Nongwa vamavau vakuvavasuwa vandu ava,

vandu vawafu davadumuliwi nga libiki na veni vakuva filivi fya mifinyi,

21 Vandu vawafu vakuvasulumu vadadala vawumba,

na vana lusungu ha kwa vangalimlyangu.

22 Chapanga kwa liwovi lyaki akuvadanganyisha vala yivavelili na liwovi,

hata leki vanemunila, vavahela chiganu cha kwikala.

23 Chapanga akulekishela vandu vawafu vayiwoni kucha vava nyanyi,

lakini mesu vaki vakulembesha deha shawu.

24 Vandu vawafu vakunemunila kwa chipindi chidokwa hela,

pambeli hakuwushiwa,

vakunyala na kuva wuniwuni kucha lidasi,

na likudumuliwa kucha lisasa lya nganu.

25 Topi ghani yawesha kutovilela kucha nenga mdesi,

na kulangusha kucha chideta chiva nakaka ha.