1 Nenga ndi yindipatili gobuleku kwanongwa ya maya va Bambu.

2 Kandola kanyegha muchisi chikomi chingajila ngesha.

3 Kanatula pamusi posi.

4 Kagola njimba na nyama yangu yigogoli, mingendewu yangu kayibena.

5 Kambundangila kwa kushengeteshela lihigili na gobuleku.

6 Kagola ndiyikali mulwisa kucha vala vandu vasovili dayili.

7 Kashengiteshela luviwu ngotoo kunyelepuka, kang'opa kwa mingongola yisitapili.

8 Hata pangemeyi na kulila ili vandangi, lakini Chapanga akulema kupikana dadavu yangu.

9 Deha shangu kasilimba kwa migonguveli mikomi, njila shangu dokwa kasilewusha.

10 Mweni kayifisa kucha dubu yandendela, kava kucha majabi yaifisili.

11 Kanguluwula mudeha yangu, kasatanga na kaneka ngajila utangi.

12 Kakwegha msali waki, kaguma na livanu lyaki.

13 Kakwemula mivanu kufuma mupodu yaki, kasoma nenga mundima.

14 Ndiva chindu cha bedalu kwa vandu vosi, pamusi posi ndiva mundu wa kuyovisheliwa.

15 Kamemesha nenga gobuleku, kagola ndivi na lihingili.

16 Menu vangu kavakundisha muligonguveli, kagola ng'alafuki mulifu.

17 Ndima yangu yiivasuwa kusika, kwa nenga seku chindu chihenja.

18 Nepisiwa nakamu, shuvililu yangu kwa Bambu yiwuka.

19 Ngukumbuka gobuleku yangu na nyelejelu yangu, yikalipa kucha nyongu.

20 Nguyihola afi jola, na ngulila mundima.

21 Hata naha ndiva na ngumbungumbu ya chilongu chimu, na negnga ndiva na shuvililu.

22 Usangi wa Bambu wuva na mbelu ha, lusungu lwaki luvahela mbelu.

23 Utami waki washonu kila pamalavila, unakaka waki mkomi munu.

24 Bambu weka yaki ndi yanyimba kila chindu, topi danyimbi kila chindu chidayila.

25 Bambu msangi kwa vonda kwa vala yivamkombikesha na kumpikana.

26 Yiva nyanyi mundu yayiwunishila kwa nongwa ya ulowolu wuufuma kwa Bambu.

27 Yiva nyanyi kwa mundu kwiwula kwiwunishila, kukandila chipindi paghava chijana.

28 Ngiba kwikala jii weka hela, Bambu kafivika afi kwanongwa mweni.

29 Yikudayiliwa kujumila na kwikala nyanyi tukudayiliwa kufiyanga fyosi.

30 Na atawuli likanja lyaki kwa yula yamdula na kujumila kupikana pamjohola.

31 Bambu datudangi ng'odu majuva vosi.

32 Hata daatugoli tuvi na lung'ong'u, lakini datuwoneli lusungu kandi nga wuvelili usangi waki.

33 Mweni kavahela chishovi cha kuvagobola, wala kuvagola vavi na lung'ong'u.

34 Bambu kamanya yivavelili muchika pavasulumiwa na kugolewa findu fya wafu,

35 Bambu kamanya pavalewusha haki sha vandu,

36 Kumkaja mundu haki yaki Bambu fyosi afi kafimanya.

37 Ghani yawesha kulamula chindu chigoleki, Leki Bambu palema kugola naha.

38 Findu fya nyanyi na fya wafu fikufumbuka kwa kudayila Bambu.

39 Nongwa liki mundu ghavi na lung'ong'u payiva kalatuliwa kwa wafu waki mweni.

40 Tuloleshi unofu ngalilu yetu, ili tumuwuyili Bambu.

41 Tumyinulili ndima shetu pamu na mawoku vetu Chapanga wa kumbindi na kudadava.

42 "Yufwi tukuvifya na kukuleka lakini yuwi kutupomela ha."

43 "Kwigubika umweni kwa maya vaku na kutukovikela, kutuwulagha ngajila lusungu."

44 Kuyikubikisha na lifundi lisitu, ili dadavu shetu sikotoo kukufikila kuuvelili.

45 Kutugola tuvi lifungusi gati ya milima yingi.

46 "Vafimdwama vetu vosi vakutuyovilela.

47 Tugobuleka kwa kutila na shida ya chimbasulila.

48 Mesu vangu vakusulula misosi kucha lweni kwa nongwa vamdwama vavadanganyisha vandu vangu.

49 Mesu vangu vakufuma ngajila kuleka

50 mbaka Bambu Chapanga kufuma kumbindi aloli pasi na kung'ona.

51 Chila chindichiwona chikunyeghela lung'ong'u mundima, kwa nongwa ya vadadala vonda va mbwani yangu.

52 Vafimdwama vangu ngajila nongwa vavinga kucha mbongu.

53 Vadangila mulyowu panduva mkomu, kumbindi yangu vagubikisha migonguveli.

54 Machi vakandili kugubika kumutwi, ndiyihola ayi ndi mbelu yangu."

55 "Pandiveyi mulyowu ndakulilili yuwi Bambu Chapanga.

56 Yuwi kumbikana pandikulilila, kotoo kuleka kupikana pandikulilila undangi.

57 Pandikukemili kunyangula, na yuwi wang'ombilili kotoo kutila."

58 "Yuwi Bambu kundanga mugobuleku yangu, kulowola unofu wangu.

59 Yuwi Bambu kuwuwona uvifyi wuvagolilili, na fila fya wafu fivayilatili vafimdwama vangu.

60 Kuwuwona uvifyi wa vafimdwama vangu, na fila fyonda fivayilatili kugolela."

61 "Bambu kupikana ndambu wuvajowola, na fila fya wafu fivayilatili kugolela.

62 Lijuva lyosi filongu na hoshu sha vafimdwama vangu kwa nenga ndi kung'ulagha.

63 Valoli chipindi chosi pavayikala au kuyendayenda vakunyovishela nenga hela.

64 Uvahighi yuwi Bambu kulinga fivagola, kulinga na fila fivagolili veni.

65 Wuvalapili, na wuvagoli vagobuleki.

66 Kwanongwa kuvakalalila uvakovikeli kwa maya, uvadanganyishi na uvagoli vakotoo kuwoneka kandi mumlima."