1 Yuwi Bambu Chapanga wuvi na ngumbungumbu fila yifitufikili.

Loli wututayiwili chindipa!

2 Mlima wetu vagayiliwa vahenja,

na vakwikala munyumba shetu.

3 Tuva vangalekwa,

vamavetu valekiwa kucha vangalimlyangu.

4 Machi va kulanda tukugola kuhemela,

na ngilu kuhemela.

5 Vakutung'ang'anika kugola fichuku kucha vafihongu,

tutofya lakini vakutujumisha ha kupumuli.

6 Tugola fichiku kwa Vamisili na Vaashulu,

ili tupati filivi fitangalili.

7 Vavaha vetu vagolili sambi ponopawu vavakandi ha na yufwi,

tukugobuleka kwa wafu wawu. 8 Vavanda ndi yivatutavala,

kwahela wa kutugombola tuvi pekesu.

9 Tukupata filivi kwa kwivika munjifwa,

kwanongwa ya mgoha aku kicheja.

10 Njimba shetu siva sha wupyu kucha chikoshu,

kwanongwa ya njala yikutunyanya.

11 Vadadala vetu vakuvang'ang'anika kuchidunda Sayuni

na vakavali vetu vakuvang'ang'anika vawonji nawu mufijiji fya Yuda.

12 Filongosi vetu vavakonga luwoyi,

na vavaha vetu vavagolilili wafu.

13 Vakuvang'ang'anika fijana vakulibula vivelekwa mumigonguveli,

vasongolu vakushengeta shengeta panji na misiwu ya ngilu.

14 Vavaha valeka kuhigha mumlyangu wa mbwani,

fijana valeka kusomola na kukuva misambu yawu.

15 Ndima shetu sivahela seku,

ng'oma shetu sighalambuka kuva gobuleku.

16 Mutwa yitumwidumbileyi kawuka.

Kwanongwa tugola wafu.

17 Kwanongwa ayi tukung'ong'uteka mundima,

kwa findu afi mesu vetu vava wuniwuni.

18 Nongwa chidunda Sayuni chivahela chindu,

vang'ongolu vakushengeta shengeta amu.

19 Lakini yuwi Bambu Chapanga ukutavala jola,

na utavala waku wukwikala fileli fyosi.

20 Nongwa liki kutuleka chipindi chitali?

nongwa liki ukutwivasuwa majuva vatangalili?

21 Wutugoli kandi Bambu Chapanga tuwuyi kwa yuwi,

Wutugoli tuvi kucha pakwandi.

22 Wuli, kutulema nakamu?

Wuli, kutukalalila munu?