1 Nongwa liki chumang'andu yetu nofu yitalama ng'odu,

figonguveli fitalamili fipwililika mufikandilu fyosi fya deha.

2 Fijana va Yelusalemu yivatalamili na yivajumiliwili munu kucha chumang'andu nofu,

yiva wuliwulu ponopa vava kucha chiyungu chiwumbiwiliwi na muwumba fiyungu.

3 Fingekembi vana hoshu ya umama na kuvayongesha vana vawu,

lakini vandu vangu vava hela lusungu, vakugola kucha mbuni.

4 Kwanongwa ya kuyumilwa machi mlomu wuyuma,

vakuluva filivi lakini kwahela yavagayila.

5 Vala yivalyeli filivi fya nyanyi ponopawu vakusova njala mudeha,

na vala yivaleliwili muwutwa ponopawu vakuwonja mulifu.

6 Vandu vangu vagobuleka pitu vandu va mbwani ya Sodoma,

tepu hela mbwani yeni yinyanyiwa na vaweshili ha kuluva utangi.

7 Filongosi va Yelusalemu vaveli mbuletee pitu mbamba nofu, na yivavelili mbuletee pitu masiva na njimba shawu shavelili byuu pitu madini va yakuti, njimba shawu kucha yakuti samawati. 8 Ponopawu wushu wawu mtitu pitu makala,

vakupita munjila na vakumanyika ha.

Njimba shawu sighimata na mingendewu yawu,

yiyuma yiva kucha ngilu.

9 Vala yivawulayiwili mumgoha vava ngiba pitu yivafwili njala,

vakugobuleka kwa njala mbaka vakusova, kwanongwa ya kupota filivi kufitava.

10 Mumbwani ngalilu yaveli ya wafu vamawu yivaveli na lusungu lukomi,

vavatelikili vana vawu vavagola filivi.

11 Bambu Chapanga alangushili maya vaki,

asukulili maya vaki,

akwatili motu aku Sayuni na kugwijusha fikandilu fyaki.

12 Vatwa va milima na vandu vosi valengili ha,

kucha chimdwama wa yivavagobola,

vangaweshili kuyingila mumilyangu ya Yelusalemu.

13 Fyosi afi fyagolikili kwa nongwa ya wafu wa Vambuyi vawu,

fyagolikili kwanongwa ya wafu wa vatambika vawu,

kwanongwa vavawulayili vandu vangajila mbatiwa mumbwani.

14 Filongosi vaki Vayelijili munjila kucha yivangajila mesu,

veni vavelili vakumnowesha Chapanga kwanongwa ya kuwulagha vandu.

Kwahela hata mundu yavelili akuvagufya.

15 Vandu vavakuvilili njowu pavadeta, "Mkopoki yumwi va wafu na mukujumiliwa ha! Mkopoki mkotoo kugufya chindu chochosi chila apa."

Topi vala vandu yivangajila kaya, na vandu va milima yingi vavawombilili vakujakwa ha na davavalibushili ha mumlima wawu.

16 Mweni Bambu davapwililishi na daavavayiholi kandi ha.

Vatambika davatundamiwi kandi ha na vavaha davalemiwi.

17 Twatofyili kugunga mesu kuveta utangi, twagungili mesu kuveta kwa bayililu mlima wungajila kuwesha kutulowola 18 Vafimdwama vetu vatutendilili, mbaka twalemwili kupita mudeha shetu. Majuva vetu vavelili vakwila, mbelu yetu yavelili yifika. 19 Vala vafimdwama yivavelili vakututendela vavelili vapusu pitu makungula, vatudagidagili mufidunda, na vatutendilili mumilima nyilili. 20 Vamkamulili yula yitwimdumbila mungalilu yetu, yula mutwa yashawuliwili na Bambu Chapanga,

yula yitwimwiholili kucha angaweshili kutudima gati ya milima. 21 Muvi na seku yumwi vandu va Edomu, mukuwesha kusekilela yumwi chileli cha Usia.

Lakini mulatuliwi, na kutayiwa chindipa.

22 Yumwi vandu va Siyoni asabu shenu dasipeli, damwikali nendu ha kuluhamila.

Lakini yumwi vandu va Edomu davalatuli kwanongwa ya wafu wenu, na kuvika pawelu sambi shemu.