1 Nɛ nyɛ yigbayi ɔmɛ hu, nyɛɛ ba nyɛ he si kɛ ha nyɛ huno ɔmɛ konɛ ke a ti ni komɛ he we Nutsɔ ɔ munyu ɔ yi tete po ɔ, nyɛ je mi bami nɛ tsake mɛ nɛ a he nɛ a ye. 2 Ejakaa nyɛ je mi bami kpakpa a ma tsake mɛ pe munyu tumi.

3 Nyɛ ko ngɔ yi hɔɔmi, he dlami kɛ sika tsu níhi, bo kɛ tade nguahi a womi kɛ pee nyɛ kɔmɔ. 4 Se mohu nyɛ ha nɛ a na nyɛ he fɛu ɔ ngɛ nyɛ tsui kɛ mumi nɛ hejɔ nɛ ngɛ daa, nɛ he jua wa ngɛ Mawu hɛ mi ɔ mi. 5 Kikɛmɛ a mumi mi he dlami nɛ ɔ nɛ blema yi klɔuklɔu ɔmɛ nɛ ngɔ a hɛ kɛ fɔ Mawu nɔ ɔ kɛ dla a he kɛ hi si kɛ ha a hunohi.

6 Sara, Abraham yo ɔ hu bu e huno ɔ tue nɛ e tsɛ lɛ e nutsɔ. Ke nyɛ hu nyɛ pee ja a, kaa biyihi kpakpahi nɛ peeɔ nɔ́ nɛ da a, lɛɛ e hia we kaa nyɛɛ ye gbeye.

7 Nyɛ nyumu ɔmɛ, ja a nɔuu nyɛɛ kɛ nyɛ yi ɔmɛ nɛ hi si saminya, nɛ nyɛɛ le kaa a he wɛ tsɔ. Nyɛɛ bu mɛ, bɔ nɛ pee nɛ a ko tsi nyɛ sɔlemi kɛ pɛɛ kpami ɔmɛ blɔ, ejakaa Mawu dloo nyɛɛ kɛ mɛ tsuo neneene wami kake.

8 Nyagbe ɔ, nyɛ tsuo nyɛɛ hɛɛ juɛmi kake, nyɛɛ nu nyɛ bi a sisi, nyɛɛ suɔ nyɛ he kaa nyɛmimɛ, nyɛ mi mi nɛ jɔ ha nyɛ bi, nɛ nyɛɛ ba nyɛ he si. 9 Nyɛɛ kɛ yayami nɛ ko to yayami nane mi, aloo jɛmi ngɛ jɛmi nane mi; se mohu nyɛɛ gbaa mɛ, ejakaa enɛ ɔ he nɛ a tsɛ wɔ ngɛ, konɛ wa nine nɛ su Mawu jɔɔmi ɔ nɔ.

10 Nɔ nɛ ngɛ hlae nɛ e na bua jɔmi nɛ e se nɛ kɛ ngɛ je mi ɔ, e kɔ e lilɛ mi, nɛ e ko ye lakpa. 11 E je e he kɛ je yayami he nɛ e pee kpakpa. E hla tue mi jɔmi nɛ e pɛtɛ he. 12 Ejakaa Nutsɔ ɔ hɛ ngɛ e bimɛ a he nɛ e buɔ a sɔlemi tue, se e kɛ yayami peeli yi.

13 Nɔ ko pee we kpakpa peelɔ yayami. 14 Se ke kpakpa peemi he je nɛ nyɛ ngɛ amanehlu nae ɔ, lɛɛ Mawu maa gbaa nyɛ. Nyɛ ko ye nimli gbeye, nɛ nyɛ ko hao hulɔ. 15 Nyɛɛ ngɔ nyɛ hɛ kɛ fɔ Kristo nɔ nɛ nyɛɛ bu lɛ kaa nyɛ Nutsɔ. Nyɛ dla nyɛ he kɛ to be fɛɛ be konɛ ke nɔ ko bi nyɛ hɛ nɔ kami nɛ nyɛ ngɛ ɔ he sane ɔ, nyɛ nyɛ lɛ heto nɛ nyɛ ha; se nyɛɛ pee enɛ ɔ ngɛ kpoo peemi kɛ bumi mi.

16 Nyɛɛ pee nɔ́ nɛ da, konɛ ke a tu munyu ke si nyɛ, nɛ a tsɛ nyɛ biɛ yaya a, zo nɛ gbe mɛ nitsɛmɛ kaa kpakpa peemi he je nɛ a gbe nyɛ he guɛ ngɛ. 17 Ke e ji Mawu suɔmi nya kaa nyɛɛ na amanehlu ɔ, nyɛɛ na amanehlu ngɛ kpakpa peemi he je, pi ngɛ yayami peemi he.

18 Ejakaa Kristo nitsɛ hu na amanehlu si kake pɛ ngɛ wa yayami ɔmɛ a he. Lɛ nɛ ji dalɔ ɔ, e gbo ngɛ nimli yayami peeli a nane mi konɛ e ngɔ wɔ kɛ ba Mawu ngɔ kɛ manye. A gbe lɛ ngɛ nɔmlɔ tso blɔ fa mi mohu, se e ngɛ wami mi ngɛ mumi blɔ fa mi. 19 Nɛ e gu mumi ɔ nɔuu mi kɛ ya slaa mumihi nɛ a wo mɛ tsu mi ɔ, nɛ e fiɛ kɛ tsɔɔ mɛ. 20 Nimli nɛ ɔmɛ ji nihi nɛ a bui Mawu tue be mi nɛ Noa ngɛ lɛ ngua a kpɛe ɔ, nɛ a kpata a hɛ mi ngɛ nyu jeje ɔ mi, nɛ a he nimli kpaanyɔ pɛ a yi wami kɛ je nyu ɔ mi. 21 Nyu nɛ ɔ ji baptisimi nɛ a kɛ he nyɛ yi wami. Baptisimi pi nɔmlɔ tso he mu fɔmi, se he nile kpakpa somi nɛ a kɛ Mawu so kɛ gu Yesu Kristo si temi ɔ nɔ. 22 Amlɔ nɛ ɔ, Kristo ho hiɔwe ya nɛ e hii si ngɛ Mawu hiɔ nɔ, nɛ a ngɔ hiɔwe bɔfohi kɛ he blɔhi kɛ he wamihi tsuo ngɔ wo e sisi.