1 Paulo nɛ ji Yesu Kristo bɔfo nɛ Mawu, wa Yiwamihelɔ ɔ kɛ Yesu Kristo wa Nutsɔ, nɛ lɛ pɛ ji wa hɛ nɔ kami ɔ tsɔ lɛ ɔ, 2 nɛ ngma womi nɛ ɔ kɛ ya ha Timoteo ke:

Timoteo, o ngɛ kaa ye bi ngɛ Nutsɔ ɔ níhi a mi. Dloomi kɛ mɔbɔ nami kɛ he jɔmi nɛ je wa Tsɛ Mawu kɛ wa Nutsɔ Yesu Kristo dɛ mi ha mo.

3,4 Kaa bɔ nɛ i de mo benɛ i yaa Makedonia a, i kpa mo pɛɛ nɛ o hi Efeso konɛ o bɔ mɔde nɛ o tsi lakpa tsɔɔli ɔmɛ a nya. Nɛ o ha nɛ a jɔɔ nyazia munyu ɔmɛ kɛ juɛmi nɛ a hɛɛ ngɛ bɔfohi babauu a he, kaa a nɔ a maa gu kɛ na yi wami hemi ɔ. Kikɛmɛ a ni nɛ ɔmɛ woɔ nya sami kɛ sane bimihi kɛ baa, nɛ a yí kɛ bua we níhi nɛ a ngɔ Mawu blɔ nya tomi nɛ tsɔɔ kaa a ma na yi wami hemi kɛ gu hemi kɛ yemi nɔ ɔ. 5 Nɔ́ nɛ i ngɛ hlae ji kaa Kristo se nyɛɛlɔ tsuaa Kristo se nyɛɛlɔ nɛ ngɛ lejɛ ɔ nɛ hyi tɔ kɛ suɔmi nɛ je tsui klɔuu kɛ susumi nɛ he tsɔ falefale kɛ hemi kɛ yemi nɛ pi si mi.

6 Se tsɔɔli nɛ ɔmɛ je yi mi tomi nɛ ɔ se nɛ a nyɛɛ nya sami kɛ yaka munyu se. 7 A suɔ kaa a le mɛ kaa Mose mlaa tsɔɔli, be mi nɛ a juɛmi kpi jamɛ a mlaa amɛ a he. 8 Jamɛ a mlaa amɛ hi, ke a tsu a he ni ngɛ Mawu yi mi tomi ɔ nya. 9 Se tsa pi wɔ, nihi nɛ a he wa yi wami ɔ nɛ a wo jamɛ a mlaa amɛ ha; a wo kɛ ha yayami peeli, nihi nɛ a kɛ Mawu yí, atuã tsɔli, nihi nɛ gbiɛɛ nɔ, nɛ a kaa kita, nɛ a tuaa a tsɛmɛ kɛ a nyɛmɛ nɛ a gbee mɛ.

10 A wo mlaa nɛ ɔmɛ nɛ a kɛ le yayami peeli a mi tso, nihi kaa ajuama bɔli kɛ nihi nɛ a he tsɔ we, nyumuhi nɛ a kɛ a he hwɔɔ si, nɔmlɔ juli, lakpatsɛmɛ kɛ nɔ tsuaa nɔ nɛ peeɔ níhi nɛ kɛ anɔkuale tsɔɔmi ɔ kɔ we ɔ. 11 A naa jamɛ a tsɔɔmi ɔ ngɛ Anunyami Mawu nɛ a gbaa lɛ ɔ e Manye Munyu ɔ nɛ a to kɛ wo ye dɛ kaa ma fiɛ ɔ mi.

12 I naa Kristo Yesu, wa Nutsɔ ɔ si kaa e pee mi e tsɔli ɔmɛ a ti nɔ kake, nɛ e wo mi he wami nɛ ma nyɛ ma ye lɛ anɔkuale, 13 tse be ɔ, i ye Kristo he fɛu ngɛ be ko nɛ be ɔ mi nɛ i wa e se nyɛɛli ɔmɛ yi mi, nɛ i ye mɛ awi ngɛ blɔ slɔɔtohi a nɔ. Se kɛ ɔ, Mawu na mi mɔbɔ, ejakaa jamɛ a be ɔ mi ɔ, i li Kristo, nɛ i li nɔ́ nɛ i ngɛ pee ɔ. 14 Wa Nutsɔ ɔ mi mi jɔ, ejakaa e tsɔɔ mi blɔ nɔ nɛ i ma gu kɛ he e nɔ ma ye, nɛ lɔ ɔ ha nɛ i hyi tɔ kɛ Kristo Yesu suɔmi ɔ.

15 E ji anɔkuale munyu, nɛ i suɔ kaa nɔ tsuaa nɔ nɛ le kaa Kristo Yesu ba je nɛ ɔ mi nɛ e ba he yayami peeli a yi wami, nɛ ami ji a kpɛti yayami peelɔ kpanaku. 16 Se Mawu na mi mɔbɔ, bɔ nɛ pee nɛ Kristo nɛ ngɔ mi kɛ pee okadi nɛ e kɛ tsɔɔ nɔ tsuaa nɔ, bɔ nɛ e toɔ e tsui si kɛ haa yayami peeli kpanakuhi tete po, konɛ ni kpahi hu nɛ a na nɛ a le kaa mɛ hu a ma nyɛ ma na neneene wami. 17 A ngɔ anunyami kɛ bumi kɛ ha Mawu kɛ ya neneene. Lɛ ji neneene Matsɛ, nɔ nɛ a nɛ lɛ, nɛ e gbo we, nɛ lɛ pɛ ji Mawu ɔ, nɛ e hyi kɛ nile ɔ. Amen. 18 Jehanɛ ɔ, ye binyumu Timoteo, nɔ nɛ i ngɛ mo fae nɛ o pee ji nɛ ɔ nɛ. Moo hwu Nutsɔ ɔ ta a saminya kaa bɔ nɛ Nutsɔ ɔ wo si kɛ gu gbali ɔmɛ a nɔ kaa o maa hwu ɔ. 19 Nɛ o hɛɛ hemi kɛ yemi ngɛ Kristo mi ɔ mi kpɛii kɛ he nile kpakpa, nɛ o pee nɔ́ nɛ da, ejakaa ni komɛ bui a he nile tue nɛ a je blɔ pee nɔ́ nɛ mɛ nitsɛmɛ a le kaa e dɛ, nɛ a hemi kɛ yemi ngɛ Kristo mi ɔ laa mɛ. 20 Nimli nɛ ɔmɛ a ti ni komɛ ji Himeneo kɛ Aleksandro, nɛ i tu mɛ kɛ wo Abosiami dɛ nɛ e gbla a tue kɛ ya si benɛ a ma kpa Kristo biɛ ɔ he guɛ gbemi.