1 Ejakaa wa le kaa ke a ku bo tsu nɛ wa ngɛ mi ngɛ zugba nɛ ɔ nɔ, aloo ke wa gbo nɛ wa si wa nɔmlɔ tso po ɔ, wa ngɛ nɔmlɔ tso he, nɛ ji we nɛ pi nine nɛ a kɛ ma, se Mawu nitsɛ nɛ po ha wɔ ngɛ hiɔwe, nɛ hii si kɛ yaa neneene. 2 Amlɔ nɛ ɔ, wa ngɛ nɔ́ nae ngɛ nɔmlɔ tso nɛ ɔ mi, nɛ lɔ ɔ he je ɔ, wa ngɛ hiɔwe nɔmlɔ tso he ɔ nɛ a ma kɛ bu wɔ kaa bo ɔ blɔ hyɛe. 3 Ejakaa ke a ngɔ bu wɔ ɔ, wa be pee kaa mumihi nɛ be nɔmlɔ tso. 4 Wa ngɛ nɔ́ nae nɛ wa ngɛ kɔmɔ yee ngɛ wa nɔmlɔ tso nɛ ɔ mi; se wa be suɔe kaa ke wa gbo ɔ, wa ko hi nɔmlɔ tso mi. Wa maa suɔ nɛ waa sɛ wa nɔmlɔ tso he ɔmɛ a mi, konɛ neneene wami nɔmlɔ tso ɔ nɛ e mi nɔ́ nɛ gbo ɔ. 5 Enɛ ɔ ji blɔ nya nɛ Mawu to ha wɔ, nɛ e ha wɔ Mumi Klɔuklɔu ɔ kaa se dami ní.

6 Amlɔ nɛ ɔ, wa ngɛ hiɔwe nɔmlɔ tso ɔ blɔ hyɛe kɛ hɛ nɔ kami, ejakaa wa le kaa si abɔ nɛ wa ngɛ nɔmlɔ tso nɛ ɔ mi ɔ, waa kɛ wa neneene we ɔ, he nɛ waa kɛ Yesu maa hi si ngɛ ɔ kpɛti kɛ. 7 Wa le kaa anɔkuale munyuhi ji nɛ ɔ nɛ, ejakaa hemi kɛ yemi nya nɛ wa ngɛ nyɛɛe ngɛ, se pi ni nami nya. 8 Nɛ wa yi gbeye, se mohu wa ngɛ gbenɔ he tsui, ejakaa ja wa gbo loko wa ma ya su Nutsɔ ɔ ngɔ ngɛ e we ɔ mi. 9 Lɔ ɔ he je ɔ, nɔmlɔ tso nɛ ɔ mi wa ngɛ jio, pe wa ho hiɔwe ya ngɛ e ngɔ jio, nɔ́ kake nɛ sa wɔ peemi ji kaa waa sa e hɛ mi be fɛɛ be ngɛ wa ni peemi níhi a mi. 10 Ejakaa ja wɔ kulaa wa ya da Kristo kojomi sɛ ɔ hɛ mi, nɛ e kojo wɔ konɛ wa ti nɔ tsuaa nɔ nɛ e na níhi nɛ e pee ngɛ zugba nɛ ɔ nɔ ngɛ nɔmlɔ tso mi ɔ he hiɔwo, kpakpa nɛ e pee jio, yayami i jio, kulaa kɛ e hiɔwo.

11 Nutsɔ ɔ gbeye yemi nɛ ngɛ wa mi ɔ he je nɛ wa gboɔ nihi a tsakemi he dengme ngɛ ɔ nɛ. Mawu le kaa nɔ́ nɛ wa ngɛ dee nɛ ɔ je wa tsui mi, nɛ i he ye kaa ngɛ nyɛ he ni lemi mi ɔ, nyɛ hu nyɛ le ja.

12 Tsa pi wɔ nitsɛmɛ wa he nɛ wa ngɛ kɔe ha nyɛ ekohu, se mohu waa kɛ nyɛ ngɛ blɔ nɛ hi nɔ fɔe konɛ nyɛɛ fĩa kɛ to wa nɔ, nɛ nyɛ na nɔ́ ko nɛ nyɛ de ni nɛmɛ nɛ fĩaa kɛ toɔ bɔ nɛ a ngɛ ha a nɔ, se pi a tsui mi ɔ. 13 Ke godo nɛ wa ngɛ nue ɔ, Mawu hɛ mi nyami nɛ wa kɛ ngɛ woe; nɛ ke pi godo i hu ɔ, e ji se nami kɛ ha nyɛ. 14 Tsa pi wɔ nitsɛmɛ wa he dengme nɛ wa ngɛ gboe. Wa ngɛ ni nɛ ɔmɛ tsue, ejakaa Kristo suɔmi ɔ nɛ ngɛ wɔ kpakae amlɔ nɛ ɔ. Nɛ akɛnɛ wa he ye kaa Kristo gbo kɛ ha wɔ tsuo he je ɔ, e sa nɛ wa he ye hu kaa wa gbo kɛ ha he lo nya si himi momo ɔ nɛ wa hi ɔ. 15 E gbo nihi kulaa a yi gbenɔ konɛ a na neneene wami kɛ je e gbenɔ ɔ mi. A ko hi si kɛ ha mɛ nitsɛmɛ a he hu, se mohu a ba a je mi saminya kɛ wo Kristo nɛ gbo nɛ a tle lɛ si kɛ je gbeje ngɔ ha mɛ ɔ hɛ mi nyami. 16 Lɔ ɔ he je ɔ, kɛ je be nɛ ɔ mi kɛ yaa nɛ ɔ, wa ko kojo Kristo se nyɛɛli ɔmɛ ngɛ he lo nya hu, ngɛ nɔ́ nɛ je ɔ susuu ngɛ a he aloo bɔ nɛ wa naa a kpo nɔ blɔ ha a he. Be ko nɛ be ɔ, i susu Kristo he ngɛ he lo nya, se amlɔ nɛ ɔ, i susuu we e he ja a hu. 17 Ke nɔ ko ngɛ Kristo mi ɔ, jamɛ a nɔ ɔ plɛ nɔmlɔ he, e pi nɔ́ nɛ e ji kekle ɔ hu, ejakaa e je wami he sisi.

18 Ní he nɛ ɔmɛ kulaa je Mawu ngɔ. Lɛ ji nɔ nɛ gu Kristo Yesu nɔ kɛ dla waa kɛ lɛ nitsɛ wa kpɛti. Nɛ e ha wɔ he blɔ kaa wa tsɛ nɔ tsuaa nɔ kɛ ba e mɔbɔ nami ɔ mi nɛ a kɛ lɛ nɛ ba tsa. 19 Nyakpɛ munyu nɛ e kɛ ha wɔ kaa waa fiɛɛ kɛ ha ni kpahi ji, Mawu gu Kristo nɔ nɛ e kɛ je ɔ ngɛ huɛ bɔe, nɛ e kojo we mɛ ngɛ a yayami ɔmɛ a he hu. 20 Kristo tsɔli ji wɔ, nɛ Mawu gu wa nɔ nɛ e kɛ nyɛ ngɛ munyu tue. Wa daa si ngɛ Kristo nane mi nɛ wa ngɛ nyɛ pɛɛ kpae ke, nyɛɛ pɛtɛ Mawu suɔmi ɔ he, nɛ nyɛ ha nɛ a dla nyɛɛ kɛ lɛ nyɛ kpɛti. 21 Ejakaa yayami ko be Kristo he, se ngɛ wa he ɔ, Mawu ha nɛ e plɛ yayami peelɔ konɛ kɛ gu e nɔ ɔ, wa plɛ dali ngɛ Mawu hɛ mi.