1 Akɛnɛ Mawu nitsɛ nɛ ha wɔ kikɛmɛ a ni tsumi nɛ ɔ ngɛ e mɔbɔ nami ɔ nya kaa waa fiɛ Manye Munyu ɔ ngɔ tsɔɔ ni kpahi ɔ, wa be he ngmɛe kɛ fɔ si gblee. 2 Wa mlɔɔ we nɔ ko kaa e he ye; nɛ wa pee we nɔ ko kuasia, nɛ wa tsɔɔ we nɔ́ ko nɔ́ nɛ Ngmami ɔ de we. Wa tsu we zo ni nɛ ɔmɛ. Se kaa bɔ nɛ nihi nɛ le wɔ ɔ yeɔ wa he odase ɔ, wa daa si kpɛii ngɛ Mawu hɛ mi kɛ tuɔ munyu ɔ, nɛ waa kɛ anɔkuale yemi jeɔ Manye Munyu ɔ kpo ngɔ tsɔɔ. 3 Ke a kɛ Manye Munyu ɔ nɛ wa fiɛɔ ɔ laa nɔ ko tete po ɔ, lɛɛ nɔ nɛ hɛ mi ma kpata a nɛ a kɛ laa. 4 Je nɛ ɔ mi mawu nɛ ji Abosiami ɔ nɛ ha nɛ e hɛ yu konɛ e ko na Manye Munyu ɔ e anunyami la a nɛ ngɛ tsoe ha lɛ ɔ, aloo nɛ e ko nu Manye Munyu ɔ nɛ wa ngɛ fiɛe nɛ kɔɔ Kristo nɛ ji Mawu ɔ e anunyami ɔ sisi. 5 Tsa pi wɔ nitsɛmɛ wa he nɛ wa ngɛ fiɛe, se mohu Kristo Yesu kaa lɛ ji Nutsɔ; nɛ nɔ́ nɛ wa deɔ ngɛ wɔ nitsɛmɛ wa he ji, wɔɔ lɛɛ nyɛ nyɔguɛhi ji wɔ ngɛ nɔ́ nɛ Yesu pee ha wɔ ɔ he. 6 Ejakaa Mawu nɛ de ke, "La nɛ kpɛ ngɛ diblii ɔ mi", nɛ lɛ ji nɔ nɛ ha wa nu sisi kaa e anunyami kpɛmi ɔ ji nɔ́ nɛ a naa ngɛ Yesu Kristo hɛ mi ɔ nɛ.

7 Se wa dla kikɛmɛ a june nɛ ɔ nɛ ji la kɛ he wami nɛ ngɛ kpɛe ngɛ wa mi amlɔ nɛ ɔ ngɛ wa nɔmlɔ tso ɔmɛ nɛ gbɔjɔ nɛ puɛɛ ɔmɛ a mi. Nɔ fɛɛ nɔ maa na kaa Mawu anunyami he wami nɛ ngɛ wa mi se pi wɔ nitsɛmɛ wa nɔ.

8 Wa naa haomi ngɛ he fɛɛ he, se wa yeɔ kunimi; wa yi mi peeɔ wɔ sikɔsikɔ ngɛ níhi nɛ baa wa nɔ ɔmɛ a he, ejakaa wa li nɔ nɛ he je nɛ a baa ngɛ, se wa nine mi gbɔjɔɔ we. 9 A waa wɔ yi mi, se Mawu kua we wɔ; a fiaa wɔ si, se wa gbo we nɛ wa teɔ si ekohu. 10 Daa nɛ ɔ, wa nɔmlɔ tso ɔmɛ kɛ gbenɔ ngɛ kpee kaa bɔ nɛ e ba mi ha Yesu ɔ; nɛ nɔ tsuaa nɔ naa faii kaa Kristo hɛ kalɔ ɔ nɛ ngɛ wa mi ɔ nɛ ha wa ngɛ wami mi.

11 Nɛ daa nɛ ɔ wa ngɛ gbenɔ dɛ mi ngɛ Nutsɔ ɔ nɛ wa ngɛ sɔmɔe ɔ he, se enɛ ɔ haa wɔ he blɔ nɛ wa kɛ jeɔ Yesu Kristo he wami nɛ ngɛ wa nɔmlɔ tsohi nɛ gboɔ ɔmɛ a mi ɔ kpo kɛ tsɔɔ. 12 Wa ngɛ gbenɔ dɛ mi ngɛ Mawu Munyu ɔ nɛ wa fiɛɔ ɔ he, se nyɛɛ lɛɛ e pee neneene wami kɛ ha nyɛ.

13 Wa deɔ wa hemi kɛ yemi ɔ kɛ kã, kaa bɔ nɛ Latsɛ ɔ ngma ke, "I he ye, nɛ ja a he je ɔ, i de" ɔ. 14 Wa le kaa Mawu ɔ nɛ tle Nutsɔ Yesu si kɛ je gbeje ɔ, lɛ nɔuu nɛ e ma tle wɔ kɛ Yesu si, nɛ e kɛ wɔ kɛ nyɛ tsuo ma ha lɛ. 15 Nyɛ he je wa ngɛ amanehlu nɛ ɔmɛ nae ngɛ konɛ e pee dloomi kɛ ha nyɛ; konɛ a gu nihi nɛ a kpɔ kɛ ha Kristo ɔ a nɔ kɛ na Mawu si ngɛ e mi mi jɔmi nɛ hiɛ babauu kɛ be nɔ ɔ he, nɛ a wo e hɛ mi nyami.

16 Enɛ ɔ he je nɛ wa yi tsui ɔ nɛ; nɛ ke wa kpo nɔ blɔ nɔmlɔ tso ɔ ngɛ gboe tete po ɔ, wa mi mi blɔ he wami nɛ wa ngɛ ngɛ Nutsɔ ɔ mi ɔ ngɛ wae daa ligbi. 17 Wa haomi kɛ wa nɔ́ nami nɛ ɔmɛ pi nɔ́ ko kulaa, nɛ a se be kɛe hulɔ; se mohu a maa wo Mawu neneene gbaami yiblii babauu ha wɔ. 18 Lɔ ɔ he je ɔ, wa ngɔɛ wa hɛ kɛ fɔɛ níhi nɛ wa ngɛ nae mwɔnɛ ɔmɛ a nɔ, se mohu Hiɔwe bua jɔmi nɛ wa nɛ lolo ɔ blɔ wa ngɛ hyɛe. Nɛ e be kɛ e nɛ haomi ɔmɛ a se maa po, se bua jɔmi nɛ maa ba a maa hi si kɛ ya neneene.