1 Se nami ko be fiami nɛ ɔ he. Se kɛ ɔ, ma de nyɛ ni namihi kɛ Nutsɔ ɔ kpo jemihi nɛ i na. 2,3 I le nyumu Mawu jalɔ ko nɛ jeha nyɔngma kɛ eywiɛ ji nɛ ɔ, a sa lɛ kɛ ho hiɔwe lokoo ya. Se i li kaa nɔmlɔ tso mi nɛ e ngɛ aloo mumi mi nɛ e ngɛ kɛ ho lo, Mawu nɛ le. A sa lɛ kɛ ho Paradeiso ya, 4 nɛ e ya nu munyuhi nɛ nɔmlɔ adesa juɛmi sui he, nɛ e be he blɔ nɛ e tsiɔ tã deɔ nɔ ko tete. 5 Ma fĩa ngɛ nɔmlɔ kaa kikɛ ɔ nɔ, se i be fiãe ngɛ ami nitsɛ ye nɔ, kaa ja ngɛ ye gbɔjɔmi ɔmɛ a he, kɛ bɔ nɛ Mawu guɔ ye gbɔjɔmi ɔ nɔ kɛ woɔ e hɛ mi nyami. 6 Ke ma fĩa a, i ngɛ níhi fuu nɛ ma fĩa ngɛ he, se i be kuasia jee, ejakaa i be suɔe nɛ nɔ ko nɛ bu mi pe bɔ nɛ e naa mi, aloo nɔ́ nɛ e nuɔ ngɛ ye nya.

7 Bɔ nɛ pee nɛ ma ko wo ye he nɔ ngɛ nyakpɛ kpo jemi níhi agbo nɛ ɔmɛ a he heje ɔ, a to mi okadi ko, kaa mio nɛ ji Abosiami tsɔlɔ ɔ, e hi ye he womi mi konɛ e gbɔɔ mi nɛ e hao mi. 8 I kpa Mawu pɛɛ si etɛ sɔuu nɛ i bi lɛ konɛ e ha nɛ ma na he wami ekohu.

9 Se ngɛ eko fɛɛ eko mi ɔ, e de mi ke, "Dabi! I kɛ mo ngɛ, nɛ lɔ ɔ ji nɔ́ nɛ he hia mo, ejakaa ye he wami ɔ jeɔ e he si ngɛ nihi nɛ gbɔjɔ ɔmɛ a mi." Lɔ ɔ he je ɔ, e ngɔɔ ye nya saminya kaa ma fĩa kɛ fɔ ye gbɔjɔmi ɔ nɔ mohu konɛ ma na Kristo he wami ɔ ngɛ ye mi nɛ e bu ye he. 10 Akɛnɛ i le kaa Kristo he je nɛ i ngɛ haomi nae ngɛ ɔ, ye bua jɔ "mio ɔ" kɛ jɛmi ɔmɛ kɛ nɔ nami ɔmɛ kɛ yi mi wami ɔmɛ a he, ejakaa i naa he wami kɛ guɔ gbɔjɔmi ɔ mi, nɛ si abɔ nɛ e fi mi ɔ, si abɔ nɛ i ngɔɔ ye hɛ kɛ fɔɔ e nɔ ji lɔ ɔ nɛ. 11 Nyɛ nɛ nyɛ ha nɛ i je kuasia kɛ fiami nɛ ɔ nɛ; nyɛ ji nihi nɛ sa nɛ nyɛ ngmaa kɛ jeɔ ye yi, se pi ami nitsɛ, ejakaa i be nɔ́ ko mi mohu, se e piɛ we nɔ́ ko nɛ bɔfo nɛ ɔmɛ ngɛ nɛ i be eko. 12 Ejakaa i ha nɛ nyɛ na paa ngɛ okadihi kɛ nyakpɛ nihi kɛ he wami ni tsumihi nɛ i kɛ tsui si tomi tsu ngɛ nyɛ kpɛti ɔ kaa Mawu nitsɛ bɔfo nɛ e tsɔ nyɛ ngɔ ji mi. 13 Se nɔ́ kake nɛ i pee ngɛ asafo kpa amɛ a mi se i pee we ngɛ nyɛ ngɔ ji kaa i bi we nyɛ ke nyɛɛ ye kɛ bua mi. I kpa nyɛ pɛɛ nɛ nyɛɛ kɛ kikɛmɛ a tɔmi nɛ ɔ nɛ pa mi.

14 I ma nyɛ ngɔ ekohu nɔ́ nɛ ji si etɛ, nɛ i kɛ ye he ba be nyɛ nɔ fɔe ja a nɔuu, ejakaa tsa pi nyɛ sika nɛ i ngɛ hlae, se mohu nyɛ nitsɛmɛ. Ye bimɛ ji nyɛ, nɛ e sɛ kaa bimɛ woɔ a fɔli a niye ni he hiɔ, se mohu fɔli nɛ sa kaa a hlaa niye ni kɛ haa a bimɛ. 15 E ngɔ ye nya kaa ma ngɔ ye he kɛ nɔ́ tsuaa nɔ nɛ i ngɛ kɛ ha nyɛ klaa amɛ a yi wami hemi. Anɛ ke i suɔ nyɛ saminya kikɛ ɔ, e sɛ kaa nyɛ hu nyɛɛ suɔ mi ja a lo?

16 Nyɛ ti ni komɛ ngɛ dee ke, "Jamɛ a Paulo ɔ, e hɛ mi tɛ; e ji anɔkuale sane kaa ke e ba wa ngɔ ɔ, e kɛ e hɛ fɔɛ wa nɔ mohu, se e sisiɔ wɔ nɛ e naa nɔ́ ko kɛ kɛ jee wa ngɔ."

17 Se kɛ nyɛ ngɛ tsɔɔe kɛɛ? Anɛ i gu tsɔli nɛ i tsɔɔ nyɛ ngɔ ɔ a ti nɔ ko nɔ kɛ sisi nyɛ lo? 18 Benɛ i kpa Tito pɛɛ nɛ i tsɔ lɛ kɛ wa nyɛmi ɔ kɛ mane nyɛ ngɔ ɔ, anɛ a ba ye nyɛ se lo? Dabi, i he we yi, ejakaa Mumi Klɔuklɔu kake ɔ nɛ ngɛ wɔ tsuo wa mi, nɛ wa ngɛ wa si bi a nane mami he ɔmɛ a mi nyɛɛe, nɛ wa ngɛ ni tsue ngɛ blɔ kake nɔ.

19 Eko ɔ, nyɛ ma susu kaa wa nya nɛ i ngɛ jee. Pi ja i kulaa, Mawu hɛ mi nɛ i ngɛ dee ngɛ kaa Kristo we bi. Suɔli, i ngɛ ni nɛ ɔmɛ tsuo pee, pi nɛ ma kɛ ye kɛ bua ami nitsɛ ye he, se bɔ nɛ pee nɛ nyɛ nane nɛ pi si ngɛ mumi ɔ mi. 20 Ejakaa i ngɛ gbeye yee kaa eko ɔ, ke i ba nyɛ slaami ɔ, i be nɔ́ nɛ ma ba na a suɔe, nɛ nyɛ hu nyɛ be bɔ nɛ ma pee ɔ suɔe. I ngɛ gbeye yee kaa i ma ba na nyɛ nɛ nyɛ ngɛ pɛe, nyɛ ngɛ nyɛ bi nyɛe, nyɛ ngɛ nyɛ bi a mi mi la woe, nyɛ ngɛ nyɛ he nɔ woe, kɛ sieku yemi, munyu hwitihwiti tumi, nɛ kake peemi be nyɛ kpɛti. 21 I ngɛ gbeye yee kaa ke i ba a, ye Mawu ɔ maa ba mi si ekohu ngɛ nyɛ hɛ mi, nɛ ye ni maa pee mɔbɔ nɛ i ma ye kɔmɔ, ejakaa nihi nɛ pee yayami sa a, a tsakee we a tsui. A ti nihi fuu ngɛ a yi kpɛti wami kɛ a mu ni ɔmɛ nɛ ji ajuama bɔmi kɛ yahomi ɔmɛ a mi lolo.