1 Ami Paulo nɛ i ngɛ nyɛ pɛɛ kpae kɛ he si bami kaa bɔ nɛ Kristo nitsɛ maa pee. Se kɛ ɔ, nyɛ ti ni komɛ deɔ ke, ke Paulo ngɛ womi ngmae ngɛ se kɛ mane nyɛ ɔ, e ngmaa kɛ ka. Se ke e na ba su nyɛ ngɔ ɔ lɛɛ e yee gbeye kaa e maa tu munyu.

2 I he ye kaa ke i ba nyɛ ngɔ ɔ, nyɛ be hae nɛ ma hia ka ngɔ wo nyɛ, ejakaa i be suɔe nɛ ma je ye subai kpo ngɔ tsɔɔ nyɛ ti nihi nɛ susuu kaa nɔmlɔ gu ji mi ngɛ ni peemi kɛ munyu tumi mi ɔ. 3 E ngɛ mi kaa nɔmlɔ gu ji mi ngɛ he lo mi mohu, se tsa pi nɔmlɔ blɔ nya tomi nɔ nɛ i guɔ kɛ hwuɔ ye ta amɛ nɛ i yeɔ kunimi. 4 Ejakaa i kɛ he lo mi ta hwumi níhi hwui ta, se mohu Mawu ta hwumi ni ngua amɛ nɛ a kɛ yeɔ Abosiami nɔ ɔ nɛ i kɛ hwuu ta. 5 Ta hwumi ni nɛ ɔmɛ kuɔ he nɔ womi munyuhi nɛ a kɛ siɔ Mawu nya, kɛ nɔ́ fiaa nɔ nɛ tsiɔ Mawu se blɔ nami nya. Nɛ i kɛ ta hwumi ni nɛ ɔmɛ kpakaa atuã tsɔli kɛ baa Mawu ngɔ, nɛ i tsakeɔ mɛ nɛ a peeɔ Kristo tue buli. 6 I kɛ ta hwumi ni nɛ ɔmɛ ma tsu atuã tsɔli tsuo nɛ maa piɛ ɔmɛ a he ni, se ja i kɛ tsu nyɛ he ni kekle nɛ nyɛ ngɔ nyɛ he kɛ ha Kristo.

7 Kpo nɔ níhi kɛkɛ nɛ nyɛ ngɛ hyɛe. Se, ke nɔ ko ngɔ e hɛ fɔ e he nɔ́ kaa Kristo nɔ́ ji lɛ ɔ, lɛɛ e susu he ekohu kaa wɔ hu Kristo níhi ji wɔ kaa lɛ nɔuu. 8 E pee we mi zo ke nyɛ ma susu kaa i ngɛ fiãe ngɛ he blɔ nɛ Nutsɔ ɔ ngɔ ha mi nɛ ma kɛ ye kɛ bua nyɛ ɔ he. I be he blɔ nɛ ɔ woe kɛ kpata nyɛ hɛ mi, se mohu i kɛ maa ye kɛ bua nyɛ nɛ nyɛɛ hi kɛ pi si. 9 I ngɛ nyɛ enɛ ɔ dee konɛ nyɛ ko susu kaa nyɛ he gbeye kɛkɛ nɛ i woɔ ngɛ ye womi ɔmɛ a mi.

10 Nyɛ ti ni komɛ deɔ ke, "E womi ɔmɛ nɛ ko hao nyɛ, ejakaa a mi munyuhi jiɔ, nɛ a mi wa mohu, se ke lɛ nitsɛ e ba hiɛ ɔ, nyɛ maa na kaa e pi nɔmlɔ agbo ko, nɛ e munyu ɔmɛ hu a he be se nami." 11 Jamɛatsɛ ɔ nɛ le kaa mi gbami ko be womihi nɛ wa ngmaa mɛ kɛ jee se ɔmɛ, kɛ wa ni peemi nihi ngɛ a hɛ mi ɔ mi.

12 E ko hao nyɛ, ejakaa i be nyɛ nyɛe ma de ke i hi kaa ni komɛ nɛ kɔɔ mɛ nitsɛmɛ a he ɔ, ejakaa mɛɛ lɛɛ a kɛ a he toɔ mɛ nitsɛmɛ a he, nɛ a kɛ a hɛ fɔɔ a nile nɛ pi ɔ nɔ. A ji nihi nɛ be juɛmi.

13 Se wɔɔ lɛɛ wa be fiãe kɛ fɔ he blɔ nɛ wa be nɔ, se mohu nɔ́ nɛ ngɛ wa hɛ mi ji kaa wa gbo susumi nɛ Mawu to kɛ ha wɔ kɛ wa ni tsumi ngɛ nyɛ ngɔ ɔ he dengme. 14 Nɛ ke wa de ke wa ngɛ nyɛ nɔ he wami ɔ, wa ngɔɛ nya, ejakaa wɔ ji kekle nihi nɛ kɛ Kristo Manye Munyu ɔ ba su nyɛ ngɔ. 15 Tsa pi kaa wa ngɛ fiãe ngɛ nɔ kpa ko ni tsumi nɛ e tsu he. Se mohu wa hɛ ngɛ nɔ kaa nyɛ hemi kɛ yemi ɔ maa wa, nɛ wa ma tsu ni tsumi nguahi ngɛ nyɛ kpɛti kaa bɔ nɛ Mawu susu nɛ e to kɛ ha wɔ ɔ.

16 Enɛ ɔ se ɔ, wa ma ya fiɛ Manye Munyu ɔ ngɛ nyɛ se je ma kpa amɛ a mi, hehi nɛ nɔ kpa ko tsu we ni ngɛ ɔ, konɛ e ko ba mi kaa wa ngɛ ni tsue ngɛ hehi nɛ nɔ kpa ko tsu ni ngɛ momo. 17 Kaa bɔ nɛ Ngmami ɔ de ɔ, "Nɔ nɛ fĩaa a, e ko fĩa ngɔ fɔ lɛ nitsɛ e nɔ, se mohu e fĩa ngɔ fɔ nɔ́ nɛ Nutsɔ ɔ tsu ɔ nɔ." 18 Ejakaa ke nɔ ko fĩa nɛ e je lɛ nitsɛ e yi ngɛ nɔ́ nɛ e tsu he ɔ, e he be se nami, se mohu ke Nutsɔ ɔ ji nɔ nɛ je e yi ɔ, lɔ ɔ ji nɔ́ nɛ hi.