Atos 26

Paulo fa e he

1 Kɛkɛ nɛ Agripa de Paulo ke, "A ha mo blɔ, moo jaje o sane ɔ." Paulo je nine nɛ e de ke,

2 "Matsɛ Agripa, ye he ngɛ ni kaa i na he blɔ nɛ i ma je ye nya ngɛ o hɛ mi. 3 Ejakaa i le kaa o le Yuda bi ɔmɛ a mlaa kɛ kusumi ɔmɛ kɛ pi si. Lɔ ɔ he je ɔ, i kpa mo pɛɛ nɛ o bu mi tue kɛ tsui si tomi.

4 Kaa bɔ nɛ Yuda bi ɔmɛ le ɔ, i na Yuda bi a tsɔsemi kɛ je ye jokuɛ mi ngɛ Tarso nɛ ji ye ma mi, kɛ Yerusalem. Nɛ i yeɔ tsɔsemi nɛ ɔmɛ a nɔ pɛpɛɛpɛ. 5 Ke a maa tu anɔkuale ɔ, a ma de kaa imi ji Farisi no nɛ yeɔ Yuda bi ɔmɛ a mlaa kɛ kusumi ɔmɛ a nɔ veveeve. 6 Se anɔkuale mi ɔ, nɔ́ nɛ he nɛ a ngɛ ye nya poe ngɛ ji kaa i ngɛ si nɛ Mawu wo wa tsɛmɛ ɔ blɔ hyɛe. 7 Kikɛmɛ a si womi nɛ ɔ nɔuu nɔ nɛ Israel wɛtso nyɔngma kɛ enyɔ ɔmɛ hu ngɔ a hɛ kɛ fɔ nɛ a ngɛ Mawu jae nyɔ kɛ pia konɛ a nine nɛ su nɔ. Oo Matsɛ! Enɛ ɔ ji musu nɛ a ke i bɔ nɛ a ngɛ ye nya poe. 8 Anɛ musu bɔmi sane ji kaa nɔ ko ma de ke e ngɛ hemi kɛ yemi ngɛ gbogboehi a si temi mi lo? Anɛ nyɛ he we yi kaa Mawu ma nyɛ tle gbogboehi si kɛ je gbeje lo?

9 Be ko nɛ be ɔ, ye hemi kɛ yemi ji kaa ma pee Yesu, Nazaret no ɔ se nyɛɛli ɔmɛ nihi nɛ sɛ. 10 Lɔ ɔ he je ɔ, osɔfo nikɔtɔma amɛ ha mi he wami nɛ i wo ni klɔuklɔuhi fuu tsu mi ngɛ Yerusalem, nɛ i piɛɛ a he nɛ a buu mɛ gbenɔ fɔ. 11 I nu Kristo se nyɛɛli ɔmɛ a he godo. I nyɛɛ a se kɛ yaa mahimahi a nɔ, nɛ i ya nuu mɛ, nɛ i waa mɛ yi mi bɔ nɛ pee nɛ a tu musu bɔmi munyu kɛ si Kristo.

12,13 E ba mi kaa ligbi ko piani katakata benɛ osɔfo nikɔtɔma amɛ ha mi he blɔ nɛ i pue nɔ kɛ yaa Damasko ngɛ kikɛmɛ a ni tsumi nɛ ɔ nɔuu he ɔ, la ko nɛ nya wa pe pu kpɛ kɛ je hiɔwe kɛ ba bɔle i kɛ nihi nɛ piɛ ye he ɔ. 14 Kɛkɛ nɛ wɔ tsuo wa nɔ si, nɛ i nu gbi ko nɛ ngɛ mi dee ngɛ Hebri gbi mi ke, ‘Saulo, Saulo, mɛni he je nɛ o ngɛ mi yi mi wae? O ngɛ mo nitsɛ o he awi yee.’ "

15 "Nɛ i bi ke, ‘Nutsɔ, mo mɛnɔ i?’ Nɛ Nutsɔ ɔ ha heto ke, ‘Ami Yesu, nɔ nɛ o ngɛ lɛ yi mi wae ɔ i. 16 Moo te si nɛ o da si, ejakaa i je ye he kpo kɛ tsɔɔ mo bɔ nɛ pee nɛ ma pee mo ye tsɔlɔ kɛ ye he odase yelɔ. O ma de je ɔ níhi nɛ o na nɛ ɔ, kɛ ní kpahi nɛ ma je ke tsɔɔ mo ɔ. 17 Ma bu o he kɛ je mo nitsɛ o ma mi bi ɔmɛ kɛ je mi bi ɔmɛ a dɛ. I ma tsɔ mo kɛ ya ma jeli ɔmɛ a ngɔ, 18 nɛ o ma ya bli a hɛ ngmɛ, konɛ a tsake a tsui nɛ a kpale ngɛ abosiami diblii ɔ mi kɛ ba Mawu la a he nɛ a ngɔ a he yayami ɔmɛ kɛ ke mɛ, nɛ a nine nɛ su Mawu gbosi ni nɛ e to kɛ ha nihi kulaa nɛ a tsukɔ a he kɛ je a he yayami ɔmɛ a mi ɔ nɔ. Nihi nɛ a hemi kɛ yemi nɛ a ngɛ ngɛ ye mi he je ɔ, a ngɔ mɛ kɛ to banee ɔ.’

19 Lɔ ɔ he je ɔ, Matsɛ Agripa, i gbo we kikɛmɛ a hiɔwe ni nami nɛ a je kpo kɛ tsɔɔ mi nɛ ɔ nɔ tue. 20 I fiɛ Manye Munyu ɔ ngɛ Damasko kekle loko i pue nɔ kɛ ho Yerusalem ya. I ya gu Yudea zugba a nɔ kɛ ba su ma je li ɔmɛ a ngɔ, nɛ i tsɔɔ kaa a kpale ngɛ a yayami ɔmɛ a se nɛ a ba Mawu ngɔ. Nɛ a tsu ni tsumi kpakpahi nɛ maa tsɔɔ kaa a tsake a tsui. 21 Enɛ ɔ he je nɛ Yuda bi ɔmɛ nu mi ngɛ ngɛ Sɔlemi We ɔ nɛ a miɔ nɛ a tane ye yi. 22 Se Mawu bu ye he nɛ i ngɛ wami mi kɛ ba si mwɔnɛ ɔ nɛ i ngɛ nɔ́ nɛ ɔmɛ a he odase yee kɛ ngɛ nɔ tsuaa nɔ tsɔɔe, nikɔtɔmahi kɛ jokuɛwi tsuo. I tsɔɔ we tsɔɔmi kpa ko pe níhi nɛ gbali ɔmɛ kɛ Mose de ke, 23 Kristo maa na amanehlu nɛ e maa pee kekle no nɛ maa te si kɛ je gbeje, nɛ e kɛ la maa ba ha Yuda bi kɛ ma je li tsuo ɔ."

24 Kɛkɛ nɛ Festo kpa ngmlaa si kake nɛ e de ke, "Paulo, o ngɛ godo nue. Womi kasemi sɔuu ha nɛ o yi mi ngɛ puɛe!"

25 Paulo he nɔ nɛ e de lɛ ke, "Amlaalo Festo, tsa pi godo nɛ i ngɛ nue, anɔkuale munyu nɛ i ngɛ tue. 26 Matsɛ Agripa le kikɛmɛ a sane nɛ ɔmɛ tsuo. Nɛ i he ye kaa a kɛ eko laa we lɛ, ejakaa tsa pi diblii mi nɛ a pee nɔ́ nɛ ɔmɛ ngɛ. 27 Matsɛ Agripa, tse o heɔ gbali ɔmɛ yeɔ? I le kaa o heɔ mɛ yeɔ."

28 Paulo nya nɔɛ si nɛ Agripa de lɛ ke, "Anɛ o susu kaa munyu bɔɔ nɛ ɔ nɛ o tu ɔ kɛkɛ ma tsake mi ngɔ pee Kristo se nyɛɛlɔ lo?"

29 Nɛ Paulo ha lɛ heto ke, "I na nɛ Mawu ha nɛ e ba mi ja, kaa e piɛ bɔɔ jio, e piɛ fuu jio, pi mo kɛkɛ, se nihi kulaa nɛ ngɛ mi tue bue mwɔnɛ nɛ ɔ hu a pee kaa ami, se pi nɛ a wo mɛ kɔsɔkɔsɔ."

30 Kɛkɛ nɛ matsɛ ɔ kɛ amlaalo ɔ kɛ Bernike kɛ ni kpa amɛ tsuo te si nɛ a je. 31 Pee se ɔ, a ya kpe yi nɛ a ma nya si kaa, "Nyumu nɛ ɔ pee we nɔ́ ko nɛ sa nɛ a bu lɛ gbenɔ fɔ loo a wo lɛ tsu mi."

32 Nɛ Agripa de Festo ke, "Kaa e ngɔɛ munyu ɔ kɛ ya ha we Kaisare jinɛ a ko ngmɛɛ e he."