1 Nɛ e ba mi kaa benɛ nihi nɛ he ye ɔmɛ a he bɔni hiɛmi ɔ, munyu hwitihwiti ba te si ngɛ Hebri bi ɔmɛ kɛ Hela bi ɔmɛ a kpɛti. Kikɛmɛ a pɛ nɛ ɔ ba a kpɛti, ejakaa Hela bi ɔmɛ na kaa a ha we a kpɛti yihi nɛ a hunohi gbo ɔmɛ a daa niye ni ɔ kaa bɔ nɛ a haa Hebri bi ɔmɛ. Lɔ ɔ he je ɔ, a bua jɔɛ. 2 Enɛ ɔ ha bɔfo nyɔngma kɛ enyɔ ɔ mi tsɛ kaseli asafo ɔ tsuo kpe nɛ a de mɛ ke, "E sɛ kaa waa ngmɛɛ Manye Munyu ɔ fiɛmi ɔ he nɛ wa ya gba niye ni. 3 Lɔ ɔ he je ɔ, anyɛmimɛ suɔli; nyɛɛ hyɛ nyɛ kpɛti nɛ nyɛɛ hla ni leli kpaago nɛ a ngɛ biɛ kpakpa, nɛ Mumi Klɔuklɔu ɔ hyi mɛ tɔ ɔ, konɛ waa kɛ mɛ nɛ to kikɛmɛ a ni tsumi nɛ ɔ nya; 4 bɔ nɛ pee nɛ wa na be kɛ ha sɔlemi kɛ Manye Munyu ɔ fiɛmi kɛ ni tsɔɔmi."

5 Munyu nɛ ɔ ngɔ asafo ɔ tsuo nya nɛ a hla Stefano, nyumu ko nɛ ngɛ hemi kɛ yemi nɛ Mumi Klɔuklɔu ɔ hyi lɛ tɔ ɔ, kɛ Filipo kɛ Prokoro kɛ Nikanora kɛ Timon kɛ Parmena kɛ ma je no ko nɛ ba plɛ Yuda no kɛ Kristo se nyɛɛlɔ, nɛ je Antiokia nɛ a tsɛɛ lɛ ke Nikolao ɔ. 6 A kɛ mɛ ba bɔfo ɔmɛ a hɛ mi nɛ a sɔle ha mɛ nɛ a kɛ a nine pue a nɔ nɛ a jɔɔ mɛ.

7 Mawu Munyu ɔ gbɛ fia ngɛ Yerusalem tsuo, nɛ kaseli ɔmɛ a yi bɔ ba hiɛ fuu, nɛ Yuda bi ɔmɛ a osɔfo ɔmɛ tete a ti nihi babauu he ye. 8 Nɛ Stefano, nɔ nɛ ngɛ hemi kɛ yemi nɛ Mumi Klɔuklɔu he wami ɔ hyi lɛ tɔ ɔ, pee nyakpɛ níhi ngɛ ma a mi.

9 Ligbi ko ɔ, ni komɛ nɛ je Yuda bi ɔmɛ a kuu ko nɛ a tsɛɛ ke "Heyemi Bimɛ" ɔ a kpɛti ɔ ba e ngɔ nɛ a kɛ lɛ ba ngɛ nɔ́ ko he nya sae. E kɛ we nɛ Yuda bi komɛ nɛ je Kireene kɛ Aleksandria ngɛ Mizraim kɛ Kilikia kɛ Asia ba piɛ a he. 10 Se a ti nɔ ko nyɛ we Stefano nile kɛ e mumi nɛ e kɛ ngɛ munyu ɔ tue ɔ nya nɛ e da.

11 Lɔ ɔ he je ɔ, a kɛ ni komɛ ba nɛ a ba po Stefano nya kaa a nu nɛ e ngɛ musu bɔmi munyu tue kɛ ngɛ Mose kɛ Mawu tete sie.

12 Enɛ ɔ ha nɛ ma a tsuo na Stefano he abofu, nɛ Yuda bi ɔmɛ a nikɔtɔma amɛ fa ke a ya nu lɛ kɛ ba a kpe ɔ hɛ mi. 13 Nɛ odase yeli ɔmɛ ba ye lakpa odase kɛ si lɛ nɛ a de ke a nuɔ nɛ e tuɔ musu bɔmi munyu kɛ siɔ Sɔlemi We ɔ kɛ Mose mlaa amɛ daa nɛ.

14 Aya nɔ nɛ a po e nya ke, "Wa nu nɛ e de ke Yesu Nazaret no ɔ maa ywia Sɔlemi We ɔ nɛ e ma tsake Mose mlaa amɛ." 15 Kɛkɛ nɛ nɔ tsuaa nɔ nɛ ngɛ lejɛ ɔ na nɛ Stefano hɛ mi bɔni kpɛmi kaa Mawu bɔfo hɛ mi.