1 Stefano gbenɔ ngɔ Saulo nya saminya. Nɛ kɛ je jamɛ a ligbi ɔ nɔuu nɔ ɔ, a bɔni asafo ɔ nɛ ngɛ Yerusalem ɔ yi mi wami. Enɛ ɔ ha nɛ mɛ tsuo a gbɛ fia ngɛ Yudea kɛ Samaria nɛ e piɛ bɔfo ɔmɛ pɛ. 2 Mawu gbeye yeli komɛ kɛ aywilɛho ba wo Stefano gbogboe ɔ nɛ a ya pu. 3 Se Saulo hɛ tsu kɛ wo asafo ɔ he nɛ e ma kpata e hɛ mi. E yaa wehi a mi nɛ e ya saa nyumuhi kɛ yihi tsuo kɛ ya woɔ tsu.

4 Se mohu asafo ɔ nɛ gbɛ fia a ya fiɛ Yesu he Manye Munyu ɔ ngɛ he fɛɛ he. 5 A ti nɔ kake nɛ a tsɛɛ lɛ ke Filipo ɔ je kɛ ho Samaria ma a mi ya nɛ e ya fiɛ Yesu he sane ɔ ngɛ lejɛ ɔ. 6 Nɛ nihi babauu bu lɛ tue saminya ngɛ nyakpɛ níhi nɛ e pee ɔ he. 7 E hia mumi yayamihi kɛ je nihi a mi kɛ ngmlaa, nɛ e tsa nihi nɛ ku pue si kɛ akpaketsɛhi, 8 nɛ lɔ ɔ he je ɔ, bua jɔmi ba jamɛ a ma a mi.

9 Wɔtsɛ ko ngɛ Samaria ma a mi nɛ a tsɛɛ lɛ ke Simon. Kɛ je blema a, e woɔ e he nɔ, 10 nɛ a buu lɛ kaa lɛ ji Yiwamihelɔ ɔ aloo nɔ ko nɛ hɛɛ Mawu he wami agbo ko, 11 ejakaa e peeɔ nyakpɛ níhi. 12 Se benɛ a nu Filipo fiɛmi ɔ kaa Yesu ji Yiwamihelɔ ɔ, nɛ a nu Mawu Matsɛyemi ɔ he Manye Munyu ɔ, a he ye nɛ a ti nyumuhi kɛ yihi fuu ha a baptisi mɛ. 13 Kɛkɛ nɛ Simon hu he ye nɛ a baptisi lɛ nɛ e bɔni Filipo se nyɛɛmi, nɛ e hɛ mi pee lɛ yaa ngɛ nyakpɛ nihi nɛ e ngɛ pee ɔmɛ a he.

14 Benɛ Yerusalem bɔfo ɔmɛ nu kaa Samaria bi ɔmɛ he Mawu Munyu ɔ ye ɔ, a tsɔ Petro kɛ Yohane a ngɔ. 15 Benɛ a ya su Samaria nɔuu pɛ nɛ a bɔni sɔlemi ha mɛ bɔ nɛ pee nɛ a na Mumi Klɔuklɔu ɔ; 16 ejakaa kɛ ba si jamɛ a be ɔ mi ɔ, e bɛ a ti nɔ ko nɔ lolo. Ejakaa Nutsɔ Yesu biɛ mi kɛkɛ nɛ a baptisi mɛ ngɛ. 17 Kɛkɛ nɛ Petro kɛ Yohane kɛ nine pue a nɔ nɛ a na Mumi Klɔuklɔu ɔ.

18 Se benɛ Simon na kaa Mumi Klɔuklɔu ɔ ba nihi a nɔ benɛ Petro kɛ Yohane wo nine kɛkɛ kɛ pue a nɔ ɔ, e je sika kpo ke e ma he he wami ɔ.

19 Nɛ e de mɛ ke, "Nyɛ ha ami hu kikɛmɛ a he wami nɛ ɔ eko konɛ nɔ tsuaa nɔ nɛ i kɛ ye nine ma pue e nɔ ɔ, e na Mumi Klɔuklɔu ɔ."

20 Se Petro de lɛ ke, "O kɛ o sika a kulaa hɛ mi ma kpata, ejakaa o susu kaa sika nɛ a kɛ heɔ Mawu nɔ́ke nɔ ɔ. 21 O be he blɔ ko ngɛ kikɛmɛ a ni tsumi nɛ ɔ mi, ejakaa o tsui mi tsɔ we ngɛ Mawu hɛ mi. 22 Lɔ ɔ he je ɔ, moo kpale ngɛ o yayami ɔmɛ a se, nɛ o kpa Mawu pɛɛ kaa alinɔ, e kɛ o yayami ɔmɛ maa ke mo lo. 23 Ejakaa i na hɛ kɔ kɛ yayami ngɛ o tsui mi."

24 Simon tsui po nɛ e kpa mɛ pɛɛ nɛ e de ke, "Nyɛɛ sɔle nɛ nyɛ kpa Mawu pɛɛ kɛ ha mi konɛ gbeye nɔ́ nɛ ɔmɛ nɛ nyɛ de ɔ nɛ a ko ba ye nɔ."

25 Benɛ Petro kɛ Yohane ye odase nɛ ɔmɛ, nɛ a fiɛ Manye Munyu ɔ ngɛ Samaria a, a kpale a se nɛ a ya fiɛ ngɛ Samaria kɔpe ɔmɛ nɛ ngɛ blɔ he ɔ tsuo a mi loko ji a ba su Yerusalem ekohu.

26 Nɛ Mawu bɔfo ko ba de Filipo lɛɛ ke, "Mo sa o he nɛ o ya gbɛjegbɛ nɛ je Yerusalem kɛ yaa Gaza nga a nɔ ɔ, nɛ o ma ya su lejɛ ɔ kaa piani be." 27 Kɛkɛ nɛ Filipo pue nɔ kɛ ho nɛ e ya na Etiopia bi a manye Kandake sɔmɔlɔ nɔkɔtɔma nɛ a ta lɛ ɔ, nɛ lɛ ji e sika nɔ hyɛlɔ nɛ a buu lɛ ɔ. E ya ja Mawu ngɛ Yerusalem Sɔlemi We ɔ, 28 nɛ e kpale e se nɛ e ngɛ trɔke mi kɛ yaa. Nɛ benɛ e yaa a, e nu nɛ e ngɛ Gbalɔ Yesaia womi ɔ kanee kɛ ngmlaa.

29 Kɛkɛ nɛ Mumi Klɔuklɔu ɔ de Filipo ke, "Yaa nɛ o ya nyɛɛ trɔke ɔ kasa nya."

30 Benɛ Filipo ya su trɔke ɔ kasa nya nɛ e nu kaa Gbalɔ Yesaia womi ɔ nɛ e ngɛ kanee ɔ, e bi lɛ ke, "Anɛ o nu nɔ́ nɛ o ngɛ kanee ɔ sisi lo?"

31 Nɛ Etiopia no ɔ ha lɛ heto ke, "Dabi! I nui sisi ja nɔ ko tsɔɔ mi sisi." Kɛkɛ nɛ e kpa Filipo pɛɛ nɛ e ba hi e kasa nya ngɛ trɔke ɔ mi.

32 Nɛ Ngmami Klɔuklɔu ɔ he nɛ e ngɛ kanee ɔ ji: "A kpaka lɛ kɛ ho kaa jijɔ nɛ a ya gbe lɛ, nɛ e kpɛ we e kuɛ si se e pee kpoo kaa bɔ nɛ jijɔ bi peeɔ kpoo ke a ngɛ e he bwɔmi nɔ sae ɔ. 33 Nɛ ngɛ e he si bami he je ɔ, a yi e sane ɔ ngɛ dami nya. Se mɛnɔ ma nyɛ jamɛ a yi nɔ bi ɔmɛ a yayami nɛ a pee ɔ ma de? Ejakaa a ngɔ e wami ɔ kɛ je zugba nɛ ɔ nɔ."

34 Kɛkɛ nɛ Etiopia no ɔ bi Filipo kɛ he si bami ke, "Anɛ Gbalɔ Yesaia nitsɛ e he munyu nɛ e ngɛ tue aloo nɔ kpa ko?"

35 Nɛ Filipo je sisi kɛ Ngmami Klɔuklɔu ɔ he nɛ e kane ɔ nɔuu kɛ he kpa komɛ, nɛ e de lɛ Yesu he sane.

36 Nɛ benɛ a ma hluu ɔ, a ba su nyu ko he, nɛ Etiopia no ɔ bi Filipo ke, "O nɛ nyu. Mɛni ngɛ ye baptisimi nya tsie?"

37 Filipo he nɔ nɛ e de lɛ ke, "Ma nyɛ ma baptisi mo ke o he ye kɛ o tsui kulaa." Nɛ e ha Filipo heto ke, "I he ye kaa Yesu Kristo ji Mawu Bi ɔ nɛ."

38 E ha nɛ trɔke ɔ da si nɛ a sɛ nyu ɔ mi, nɛ Filipo ya baptisi lɛ. 39 E ba mi kaa benɛ a je kpo ngɛ nyu ɔ mi ɔ, Nutsɔ ɔ Mumi ɔ ba sa Filipo kɛ je nɛ e nɛ lɛ hu. Se e pue nɔ kɛ ho kɛ bua jɔmi. 40 Se Filipo ya je Azoto nɛ e fiɛ Manye Munyu ɔ ngɛ lejɛ ɔ ma amɛ a mi kɛ ba su Kaisarea.