1 Ye suɔlɔ kpakpa Tiofilo, i de mo ngɛ ye kekle womi nɛ i ngma mo ɔ mi, nihi nɛ kɔɔ Yesu wami kɛ e ni tsɔɔmi ɔmɛ a he, 2 kɛ sɛ nɛ je Mumi Klɔuklɔu ɔ ngɔ nɛ e kɛ ha e kaseli ɔmɛ loko e kpale kɛ ho hiɔwe ya a. 3 Benɛ a sɛu Yesu nɛ e te si se ɔ, e hi si hɛ kalɔ ligbi nyingmi eywiɛ sɔuu, nɛ e je e he si si abɔ kɛ tsɔɔ e bɔfo ɔmɛ ngɛ he lo mi kaa lɛ i, nɛ e kɛ mɛ sɛɛ Mawu Matsɛyemi ɔ he ni.

4 Ligbi ko nɛ e ba a ngɔ ɔ, e de mɛ ke a mlɛ ngɛ Yerusalem ma a mi kɛ ya si be nɛ Mumi Klɔuklɔu ɔ maa ba a nɔ kaa bɔ nɛ e de mɛ momo ngɛ Tsɛ ɔ si womi nya a.

5 E ya nɔ nɛ e kai mɛ ke, "Yohane baptisi nyɛ kɛ nyu, se ngɛ ligbi bɔɔ se ɔ, a maa baptisi nyɛ kɛ Mumi Klɔuklɔu ɔ."

6 Be kpa ko hu nɛ e je e he si kɛ tsɔɔ mɛ ɔ, a bi lɛ ke, "Nutsɔ, anɛ o ngɛ Israel kpɔe, amlɔ nɛ ɔ nɛ o pee wɔ ma nɛ ngɛ e he yee ɔ lo?"

7 Nɛ e ha mɛ heto ke, "Tsɛ ɔ to jamɛ a be ɔmɛ, se e pi nyɛ blɔ nya kaa nyɛɛ le. 8 Se ke Mumi Klɔuklɔu ɔ ba nyɛ nɔ ɔ, e maa wo nyɛ he wami kɛ fiɛ Manye Munyu ɔ nɛ kɔɔ ye gbenɔ kɛ ye si temi ɔ he ngɛ Yerusalem kɛ Yudea zugba a tsuo nɔ kɛ Samaria kɛ ya si zugba a nyagbe hehi."

9 Nɛ e ba mi kaa benɛ e de mɛ enɛ ɔ se ɔ, a ngɔ lɛ kɛ ho hiɔwe ya, nɛ e laa mɛ ngɛ bɔ kuu ɔ mi. 10 Benɛ a pee yaa kɛ ngɛ hiɔwe hyɛe gaa a, nyumuhi enuɔ nɛ wo tade futa ba da a kpɛti tlukaa, 11 nɛ a de mɛ ke, "Galilea bi, mɛni he je nɛ nyɛ daa si ngɛ hiɔwe hyɛe gaa kikɛ ɔ? Yesu ɔ je kɛ ho hiɔwe ya, nɛ bɔ nɛ e plɛ kɛ je ɔ, e maa kpale kɛ ba ja a nɔuu ligbi ko."

12 Enɛ ɔ ba mi ngɛ Nuyoku ɔ nɛ kɛ Yerusalem kɛmi maa pee si tomi he fa a; lɔ ɔ he je ɔ, a kpale a se kɛ ba Yerusalem, 13 nɛ a ba pee sɔlemi kpe ngɛ hiɔwe tsu ko mi ngɛ we ɔ mi he nɛ a ba to ɔ.

14 Nihi nɛ ngɛ lejɛ ɔ ji: Petro, Yohane, Yakobo, Andrea, Filipo, Toma, Bartolomeo, Mateo, Yakobo nɛ ji Alfeo bi ɔ kɛ Simon nɛ a tsɛɛ lɛ ke Zelote ɔ kɛ Yuda, Yakobo bi ɔ kɛ Yesu nyɛminyumu ɔmɛ. Yihi fuu nɛ Yesu nyɛ hu piɛ a he ɔ ngɛ lejɛ ɔ. 15 Sɔlemi kpe nɛ ɔ ya nɔ ligbi babauu. Se ligbi ko benɛ a ngɛ kpe ɔ mi, nɛ nimli maa pee lafa kɛ nyingmi enyɔ ngɛ lejɛ ɔ, Petro te si da si ngɛ a kpɛti nɛ e de mɛ ke,

16 "Anyɛmimɛ, e sa kaa nɔ́ nɛ a ngma nɛ kɔɔ Yuda he, nɔ nɛ tsɔɔ Yesu se blɔ nɛ a gbe lɛ ɔ, e ba mi kaa bɔ nɛ Mumi Klɔuklɔu ɔ wo si momo kɛ gu Matsɛ David nɔ ɔ. 17 Yuda ji wa ti nɔ kake nɛ a hla lɛ ngɔ pee bɔfo kaa bɔ nɛ wɔ hu wa ngɛ ɔ nɔuu. 18 Se e ya he abɔɔ kɛ yayami nɛ e pee ɔ mi sika, nɛ e plɛ e yi kɛ ma si ngɛ lejɛ ɔ, nɛ e mi mi pɛ nɛ e muklii mi níhi tsuo je pue si. 19 A nu e gbenɔ ɔ he ngɛ Yesuralem tsuo, nɛ a wo he nɛ e gbo ngɛ ɔ biɛ ke ‘Muɔ Abɔɔ’. 20 Si nɛ Matsɛ David wo ngɛ enɛ ɔ he ɔ ngɛ La womi ɔ mi, Lejɛ ɔ nɛ e de ngɛ ke, ‘Ha nɛ e we ɔ nɛ pee we doku nɛ nɔ ko ko hi mi; nɛ a ngɔ e ni tsumi ɔ kɛ ha nɔ kpa nɛ e tsu.’

21 Lɔ ɔ he je ɔ, e sa nɛ waa hla nɔ ko nɛ e kɛ wɔ kɛ Nutsɔ ɔ je sisi 22 kɛ je benɛ Yohane baptisi lɛ kɛ ya si benɛ a ngɔ lɛ kɛ ho hiɔwe ya a, kɛ to Yuda nane mi konɛ e piɛ wa he kɛ ye e si temi ɔ he odase."

23 Nɛ kpe ɔ gbɔ nyumuhi enyɔ a he tso. Mɛ ji Yosef Yusto nɛ a tsɛɛ lɛ ke Barsaba kɛ Matia. 24,25 Kɛkɛ nɛ mɛ tsuo a sɔle konɛ Mawu nɛ hla nɔ́ nɛ sa ha mɛ. Bɔ nɛ a sɔle nɛ a de ji, "Nutsɔ, mo nɛ o le adesa fɛɛ adesa tsui mi. Moo tsɔɔ wɔ nimli enyɔ nɛ ɔmɛ a ti nɔ nɛ o hla kaa bɔfo ngɛ Yuda, nɔ se blɔ tsɔɔlɔ nɛ ho sihi he nɛ sa lɛ ɔ ya a nane mi."

26 Kɛkɛ nɛ a fɔ sɔ nɛ e ya nɔ Matia nɔ, nɛ a hla lɛ kaa bɔfo kɛ piɛ nimli nyɔngma kɛ kake ɔmɛ a he.