1 Jamɛ a be ɔ mi nɛ matsɛ Herode hu te si kɛ wo kaseli ɔmɛ, 2 nɛ e gbe Yohane nyɛmi Yakobo. 3 Benɛ Herode na kaa Yakobo gbenɔ ɔ ngɔ Yuda bi ɔmɛ a nikɔtɔma amɛ a nya a, e nu Petro hu benɛ a ngɛ Hebemi jeha a yee ɔ, 4 nɛ e wo lɛ tsu mi, nɛ e hla he buli nyɔngma kɛ ekpa sɔuu nɛ a bu e he. E pee e juɛmi kaa e ma je Petro he gbi kɛ ha Yuda bi ɔmɛ nɛ a gbe lɛ ke a ye Hebemi jeha a gbe nya a. 5 Se asafo ɔ hɛɛ sɔlemi mi wawɛɛ kɛ a tsui kulaa nɛ Petro yi nɛ na wami ngɛ tsu ɔ mi.

6 Nɛ nyɔ mi nɛ ke je na loko a maa gbe lɛ ɔ, Petro hwɔ mahe nɛ kɔsɔkɔsɔ enyɔ ngɛ e nine. Buli enyɔ daa si ngɛ e he, nɛ buli nɛ piɛ ɔ hu daa si ngɛ sinya a nya. 7 Si kake too ɔ, la ko kpɛ ngɛ tsu ɔ mi, nɛ Nutsɔ ɔ bɔfo ko ba da e kasa nya. Bɔfo ɔ gba Petro ma kɛ tsiɛ lɛ nɛ e de lɛ ke, "O he nɛ sɔ! Moo te si mla!" Kɛkɛ nɛ kɔsɔkɔsɔ ɔmɛ kplɔ ngɛ e nine. 8 Nɛ bɔfo ɔ de lɛ ke, "Moo wo o tade kɛ o tokota amɛ." Nɛ Petro ye bɔfo ɔ gbi nɔ. Jehanɛ ɔ bɔfo ɔ de lɛ ke, "Moo wo o hiɔwe tade ɔ nɛ o nyɛɛ ye se."

9 Petro nyɛɛ bɔfo ɔ se kɛ je kpo ngɛ tsu ɔ mi. Se e li nɔ́ nɛ ngɛ nɔ yae ɔ, ejakaa e ngɛ lɛ pee kaa nlami nɛ e ngɛ nlae. 10 A be kekle buli kɛ enyɔne ɔmɛ a he nɛ a ba su dade agbo nɛ ngɛ kɛ yaa ma a mi ɔ he, nɛ dade agbo ɔ nitsɛ bli ha mɛ nɛ a je kpo kɛ po gbɛjegbɛ kake mi. Kɛkɛ nɛ bɔfo ɔ si lɛ ngɛ lejɛ ɔ.

11 Jehanɛ ɔ loko Petro hɛ mi tɛ paa nɛ e de e he ke, "Kpaloko ji i na paa kaa Nutsɔ ɔ nɛ tsɔ e bɔfo nɛ e ba je mi kɛ je Herode dɛ, kɛ nɔ́ nɛ Yuda bi ɔmɛ to kaa a maa pee mi ɔ mi." 12 Petro susu nɔ́ nɛ ba e nɔ ɔ he saii nɛ e pue nɔ kɛ ho Yohane nɛ a tsɛɛ lɛ ke Marko hu ɔ nyɛ Maria we ɔ mi he nɛ kaseli ɔmɛ bua a he nya nɛ a ngɛ sɔlee ngɛ ɔ ya.

13 Benɛ e si agbo ɔ, jokuɛ yoyo ko nɛ a tsɛɛ lɛ ke Roda a ba bu tue. 14 Nɛ benɛ yoyo ɔ na le Petro gbi mi tso ɔ, e bua jɔ e he nɛ e ma fo ya de ni ɔmɛ ngɛ we ɔ mi ke Petro daa si ngɛ agbo ɔ se. 15 Se a he we lɛ yi nɛ a de lɛ ke, "O ngɛ godo nue!" Se benɛ Roda ngɛ nɔ mi mae ke Petro nɛ daa si ngɛ agbo ɔ se ɔ, a de lɛ ke, "Lɛɛ e kpade i:"

16 Jamɛ a be ɔ mi kulaa a, Petro ngɛ agbo ɔ sie kɛ ya si benɛ a je kpo nɛ a ya bli agbo ɔ. Benɛ a na lɛ ɔ, a nya kpɛ a he. 17 Se Petro bɛ mɛ hɛ ngmɛ ke a ko kpa ngmlaa; nɛ e bɔ mɛ bɔ nɛ Nutsɔ ɔ je lɛ kɛ je tsu ɔ mi. Nɛ e de mɛ ke, "Nyɛɛ ya nɛ nyɛ ya bɔ Yakobo kɛ nyɛmi ɔmɛ amaniɛ." Kɛkɛ nɛ e pue nɔ kɛ ho he kpa ya.

18 Makɛ mi ɔ, tsu womi he ɔ pee basabasa. A li nɔ́ nɛ ba Petro nɔ. 19 Benɛ Herode tsɔ nɛ a ya kpaka Petro kɛ ba se a nɛ lɛ ɔ, e ha nɛ a nuu buli nyɔngma kɛ ekpa amɛ tsuo. A kojo mɛ nɛ a bu mɛ gbenɔ fɔ. Enɛ ɔ se ɔ, Petro pue nɔ kɛ ho Kaisarea ya nɛ e ya hi lejɛ ɔ be saii.

20 Nɛ e ba mi kaa Herode na Tiro kɛ Zidon ma amɛ a he abofu wawɛɛ. Lɔ ɔ he je ɔ, Tiro kɛ Zidon bi ɔmɛ pee kake kɛ tsɔ bɔfohi kɛ ba Herode ngɔ. A ya gu e womi ngmalɔ nɛ a tsɛɛ lɛ ke Blasto nɔ kɛ ba e ngɔ ngɛ Kaisarea nɛ a ba kpa lɛ pɛɛ, ejakaa e zugba a mi nɔ́ nɛ a yeɔ. 21 Benɛ ligbi nɛ a to kɛ ha pɛɛ kpami ɔ su ɔ, Herode wo e matsɛ yemi tade ɔ nɛ e ya hi kojomi sɛ ɔ nɔ nɛ e kɛ mɛ tu munyu. 22 Benɛ Herode nya nɔ si ɔ, ni ɔmɛ kpa ngmlaa nɛ a je e yi ke, "Pi nɔmlɔ adesa gbi ji nɛ ɔ, Mawu gbi i."

23 Amlɔ ɔ nɔuu nɛ Nutsɔ ɔ bɔfo ko wo hiɔ kɛ fɔ Herod nɔ, nɛ e nɔmlɔ tso ɔ tsuo wo gɔgɔ nɛ e gbo. Ejakaa e suɔ nɛ a ja lɛ, nɛ lɔ ɔ he je ɔ, anunyami nɛ sa nɛ a kɛ ha Mawu ɔ, e kplɛɛ nɛ a kɛ ha lɛ.

24 Mawu Manye Munyu ɔ gbɛ fia nɛ nihi fuu ba sɛ asafo ɔ mi. 25 Nɛ e ba mi kaa benɛ Barnaba kɛ Paulo gbe a ni tsumi ɔ nya ngɛ Yerusalem ɔ, a kpale a se kɛ ba Antiokia ekohu, nɛ a ngɔ Yohane nɛ a tsɛɛ lɛ ke Marko ɔ kɛ piɛ a he.