Bɔfo Ɔmɛ 11

Petro bɔ asafo ɔ amaniɛ

1 E yi be ko nɛ bɔfo ɔmɛ ke nyɛmi ɔmɛ nɛ ngɛ Yudea a nu kaa ma je li ɔmɛ hu he Manye Munyu ɔ ye. 2 Se benɛ Petro kpale kɛ ba Yerusalem ɔ, Yuda bi ɔmɛ nɛ ji nyɛmi ɔmɛ kɛ lɛ sa nya.

3 A po e nya nɛ a de ke, "O kɛ ma je li ɔmɛ ya bɔ huɛ nɛ o kɛ mɛ ye ni tete po."

4 Kɛkɛ nɛ Petro je sisi nɛ e bɔ mɛ nɔ́ nɛ ba a tsuo. E de mɛ ke, 5 "Ligbi ko benɛ i ngɛ sɔlee ngɛ Yopa a, a je ni nami ko kpo kɛ tsɔɔ mi. I na bo ngua ko nɛ a nu e kɔ nya eywiɛ ɔmɛ kɛ je Hiɔwe kɛ kple si. 6 Nɛ i na lohwehi slɔɔtohi ngɛ mi, sinɔhi kɛ lohwe pɛlitsɛhi. 7 Nɛ i nu gbi ko nɛ de mi ke, ‘Gbee a ti nɔ́ nɛ o suɔ nɛ o ye.’

8 Nɛ i ha heto ke, Dabi, Nutsɔ, ejakaa i yi nɔ́ ko nɛ wɔ Yuda bi ɔmɛ wa mlaa amɛ ha we wɔ blɔ kaa waa ye!

9 Se gbi ɔ de ekohu ke, ‘Ní ko nɛ Mawu ke a ye ɔ, mo ko de ke e hí.’

10 A je kikɛmɛ a ni nami nɛ ɔ kɛ tsɔɔ mi si etɛ loko ji bo ngua kɛ e mi nɔ́ fɛɛ nɔ ɔ kpale kɛ ho hiɔwe ya ekohu. 11 Nɛ amlɔ ɔ nɔuu ɔ, tsɔli etɛ nɛ je Kaisarea ba su we mi he nɛ i to ɔ agbo ɔ nya. 12 Nɛ Mumi Klɔuklɔu ɔ de mi ke i kɛ mɛ nɛ ho, nɛ ma ko di kaa ma je li ji mɛ. Nyɛmimɛ ekpa nɛ ɔmɛ piɛ ye he kɛ ho nɔ nɛ tsɔ kɛ ba tsɛ mi ɔ ngɔ ya. 13 E bɔ wɔ bɔ nɛ bɔfo ko je e he si ha lɛ nɛ e de lɛ ke e tsɔ nɔ Yopa nɛ a ya tsɛ Simon Petro kɛ ba ha lɛ ɔ. 14 Nɛ bɔfo ɔ de lɛ ke, ‘E maa tsɔɔ mo bɔ nɛ a maa pee kɛ he o kɛ o we ɔ tsuo yi wami ha.’

15 Se benɛ i bɔni mɛ Manye Munyu ɔ tumi pɛ nɛ Mumi Klɔuklɔu ɔ ba a nɔ kaa bɔ nɛ e ba wa nɔ kekle ɔ. 16 Enɛ ɔ ha nɛ i kai Nutsɔ ɔ munyu ɔ nɛ e tu ke, ‘Yohane baptisi kɛ nyu, se nyɛɛ lɛɛ a maa baptisi nyɛ kɛ Mumi Klɔuklɔu ɔ.’ 17 Nɛ akɛnɛ Mawu nitsɛ ji nɔ nɛ ha ma je li ɔmɛ nɔ́ke nɔ nɛ ɔ, kaa bɔ nɛ e ha wɔ hu benɛ wa he Nutsɔ Yesu Kristo nɔ ye ɔ, mɛnɔ ji mi nɛ e sa kaa ma sa nya ngɛ he?" 18 Benɛ Petro bɔ mɛ kikɛmɛ a amaniɛ nɛ ɔ, a nɛ nɔ́ ko nɛ a de hu. A je Mawu yi nɛ a de ke, "Mawu ha ma je li ɔmɛ hu tsui tsakemi he blɔ nɛ a ma kɛ he a yi wami!"

Antiokia Kristo se nyɛɛli ɔmɛ

19 Nɛ e ba mi kaa kaseli ɔmɛ nɛ gbɛ fia kɛ je Yerusalem benɛ a gbe Stefano se ɔ, ekomɛ je kɛ ho tsitsaa Foinike kɛ Kipro kɛ Antiokia ya, nɛ a ya ngɛ Manye Munyu ɔ fiɛe ha Yuda bi ɔmɛ pɛ nɛ ngɛ lejɛ ɔ. 20 Se a ti ni komɛ nɛ je Kipro kɛ Kireene kɛ ba Antiokia a fiɛ Yesu he sane ɔ kɛ tsɔɔ Hela bi ɔmɛ ekomɛ. 21 Nɛ Nutsɔ ɔ jɔɔ a fiɛmi ɔ nɔ nɛ ma je li babauu he ye.

22 Benɛ Yerusalem asafo ɔ nu a he ɔ, a tsɔ Barnaba nɛ e ya ye kɛ bua Antiokia asafo he ɔ. 23 Benɛ Barnaba ya su Antiokia nɛ e na nyakpɛ ni nɛ Mawu ngɛ tsue ngɛ lejɛ ɔ, e bua jɔ e he, nɛ e wo mɛ he wami nɛ e de ke, bɔ fɛɛ bɔ nɛ e ma ji ha a, a pɛtɛ Nutsɔ ɔ he wawɛɛ. 24 Barnaba ji nɔ ko nɛ e mi jɔ, nɛ Mumi Klɔuklɔu kɛ hemi kɛ yemi nɛ mi wa hyi lɛ tɔ. E subai kpakpa he je ɔ, nihi babauu ba sɛ Nutsɔ ɔ asafo ɔ mi.

25 Jehanɛ ɔ Barnaba po mi kɛ ho Tarso ya nɛ e ya hla Paulo. 26 Nɛ benɛ e ya na lɛ ɔ, e kɛ lɛ kpale kɛ ba Antiokia nɛ mɛ ni enyɔ ɔmɛ a ba hi lejɛ ɔ nɛ a ye kɛ bua asafo ɔ nɛ a tsɔɔ nihi babauu ni jeha mluku. Antiokia ji he kekle nɛ a wo kaseli ɔmɛ biɛ ngɛ ke "Kristo se nyɛɛli."

27 Nɛ e ba mi jamɛ a be ɔ mi kaa gbali komɛ je Yerusalem kɛ ba Antiokia; 28 nɛ a ti nɔ kake nɛ a tsɛɛ lɛ ke Agabo ɔ gba ngɛ Mumi Klɔuklɔu ɔ mi nɛ e de ke hwɔ ngua ko maa ba ngɛ Israel zugba a nɔ, nɛ e ba mi ja ngɛ Klaudio yi nɔ. 29 Lɔ ɔ he je ɔ, kaseli ɔmɛ to nɛ a ma tsu nɔ́ ko bɔɔbɔɔ bɔ nɛ nɔ tsuaa nɔ ma nyɛ, nɛ a kɛ ya ye kɛ bua Yudea asafo ɔ. 30 A tsu a yi mi tomi ɔ he ni, nɛ a ngɔ nike ni ɔmɛ kɛ mane Barnaba kɛ Paulo nɛ a kɛ ya ha asafo ɔ nikɔtɔma amɛ ngɛ Yerusalem.