Bɔfo Ɔmɛ 27

A wo Paulo kɛ ho Roma ya

1 Benɛ a ma nya si kaa a kɛ wɔ maa nyɛɛ wo hɛ mi kɛ ya Roma a, a ngɔ Paulo kɛ ni kpahi fuu nɛ a wo mɛ tsu mi ɔ kɛ wo amlaalo ɔ he buli ɔmɛ a ti nɔ kake nɛ a tsɛɛ lɛ ke Yulio ɔ dɛ mi. 2 Wa sɛ Adramitio lɛ ko nɛ a to kaa e ya da ngɛ Asia wo nya ma amɛ a mi ɔ. Nɛ Aristako nɛ ji Makedonia no ko nɛ je Tesalonika a piɛ wa he.

3 E nɔ jena a, wa ba su Zidon, nɛ akɛnɛ Yulio mi jɔ kɛ ha Paulo he je ɔ, e hɛɛ lɛ saminya. E ha lɛ he blɔ nɛ e kple si kɛ ya ma a mi nɛ e ya slaa e huɛmɛ. 4 Benɛ wa hia ngɛ Zidon ɔ, wa kpee kɔɔhiɔ agbo ko, nɛ lɔ ɔ he je ɔ, wa ya gu Kipro yi nɔ ngɛ wo kpɔ ɔ he. 5 Wa be ngɛ Kilikia kɛ Pamfilia wo nya ma amɛ a nya loko wa ba da si ngɛ Mira ngɛ Likia zugba a nɔ. 6 Lejɛ ɔ nɛ wa asafoatsɛ ɔ na Miztaim lɛ ko nɛ je Aleksandria kɛ yaa Italia, nɛ e kɛ wɔ wo mi. 7 Wa hi wo ɔ hɛ mi be saii, ejakaa wo ɔ he wa, nɛ beble loko ji wa ba su Kido wo kpo ɔ he. Akɛnɛ kɔɔhiɔ ɔ nya wa he je ɔ, wa gu Kreta wo kpo ɔ he kɛ ba su Salmone, 8 nɛ wa hɛɛ mi hluu kɛ ba su he ko nɛ a tsɛɛ ke Lesida he kpakpa ngɛ Lasea kasa nya. 9 Wa ba hi lejɛ ɔ be saii, se loloolo ɔ, wo ɔ he wa ha blɔ gaga hiami, nɛ hwɔ hami be ɔ hu be momo. Lɔ ɔ he je ɔ, Paulo wo lɛ ɔ mi ni tsuli ɔmɛ ga.

10 E de mɛ ke, "Anyɛmimɛ, i he ye kaa wa maa na nɔ́ wawɛɛ ke wa hia ngɛ hiɛ ɔ. Nɛ e maa ba mi tete kaa tsa pi lɛ ɔ kɛkɛ nɛ ma mu, se tlomi ɔmɛ hu maa laa nɛ gbenɔ tete maa je mi." 11 Se asafoatsɛ ɔ nɛ ngɛ a he bue ɔ he lɛ kudɔlɔ ɔ kɛ lɛtsɛ ɔ ye pe Paulo. 12 Nɛ akɛnɛ fiɛ ngɛ yee wawɛɛ jamɛ a be ɔ mi, nɛ Lesida he kpakpa a pi he ko nɛ sa nɛ a yeɔ fiɛ be ngɛ he je ɔ, lɛ ɔ mi ni tsuli ɔmɛ a ti nihi fuu ma nya si kaa a nyɛɛ wo kpo ɔ he dɔdɔɔdɔ kɛ ya Foinike nɛ a ya ye fiɛ be ɔ ngɛ lejɛ ɔ. Ejakaa a ngɛ lɛ dami he kpakpa ko ngɛ lejɛ ɔ, nɛ e jɔ mi blɔ pu si nɔmi he je, kɛ e wo mi blɔ pu si nɔmi he je pɛ ji e hehi nɛ fɔɔ si paa.

13 Jamɛ a be ɔ mi nɔuu ɔ, wo mi blɔ kɔɔhiɔ ko bɔni fiami blɛuu nɛ e pee kaa nɔ́ nɛ je mi ma tsɔ. Lɔ ɔ he je ɔ, a hia nɛ a nyɛɛ wo kpo ɔ he.

14,15 A hia e kɛ we nɛ kɔɔhiɔ nya wawɛ ko nɛ a tsɛɛ ke jɔ mi blɔ pu si temi he je kɔɔhiɔ ba te nɛ e fia lɛ ɔ kɛ ho wo ɔ nɔ je ya. A bɔ mɔde nɛ a kudɔ lɛ ɔ kɛ ba wo kpo ɔ he blɔ, se a nyɛ we, nɛ a ngmɛɛ e he ha kɔɔhiɔ ɔ nɛ e kudɔ lɛ.

16 Nyagbe mi ɔ, kɔɔhiɔ ɔ fia lɛ ɔ kɛ ba je zugba kpɔ nyafii ko nɛ wo bɔle lɛ nɛ a tsɛɛ lɛ ke Klaudia a se je, nɛ wa gbo dengme loko ji wa nine su boto ɔ nɛ a muɔ si ngɛ lɛ ɔ se je ɔ nɔ. 17 Jehanɛ ɔ, wa wo kpahi kɛ fi lɛ ɔ. Se akɛnɛ lɛ ɔ mi ni tsuli ɔmɛ ngɛ gbeye yee kaa a ma ya sa si ngɛ zia nɔ he je ɔ, a gbe hiɔwe abalaa amɛ konɛ kɔɔhiɔ ɔ nɛ kudɔ lɛ ɔ.

18 E nɔ jena benɛ kɔɔhiɔ ɔ nya wa kɛ sa a, a bɔni tlomi ɔ nɔ jemi kɛ wo ɔ mi puemi. 19 E nɔ ligbi etɛ ɔ nɔ ɔ, a je lɛ ɔ mi nɔ́ tsuaa nɔ nɛ a nine su nɔ ɔ kɛ pue he. 20 Benɛ wa ye ligbi babauu ngɛ wo ɔ nɔ, nɛ loloolo kɔɔhiɔ ɔ nya pui nɛ wa nɛ pu loo dodoe ɔ, wa hɛ nɔ kami kulaa ba ta.

21 Wa kpɛti nɔ ko yi ni be saii, nɛ Paulo tsɛ lɛ ɔ mi ni tsuli ɔmɛ kɛ kpe nɛ e de mɛ ke, "Anyɛmimɛ, e ji nyɛ bu mi tue nɛ wa mlɛ ngɛ Lesida he kpakpa a jinɛ amanehlu nɛ ɔ ko bɛ wa nɔ. 22 Se kɛ ɔ, nyɛ na tsui, ejakaa ke lɛ ɔ mu tete po ɔ, wa ti nɔ tsuaa nɔ yi ma na wami.

23 I ngɛ nyɛ enɛ ɔ dee, ejakaa ye Mawu ɔ nɛ i ngɛ jae ɔ tsɔ e bɔfo ko kɛ ba ye ngɔ nyɔ nɛ ɔ mi, 24 nɛ e ba de mi ke, ‘Paulo, koo ye gbeye, ejakaa a maa kojo mo ngɛ Kaisare hɛ mi kokooko! Nɛ nɔ́ nɛ pe kulaa ji, Mawu bu o pɛɛ kpami ɔ tue, nɛ e ma he nɔ tsuaa nɔ yi wami ngɛ lɛ ɔ mi.’ 25 Lɔ ɔ he je ɔ, nyɛ na tsui. Ejakaa i heɔ Mawu yeɔ kaa e maa ye e gbi ɔ nɔ. 26 Se bɔ fɛɛ bɔ nɛ pee ɔ, lɛ ɔ ma ya butu ngɛ zugba kpɔ ko nɛ wo bɔle lɛ ɔ nɔ."

27 Benɛ kɔɔhiɔ ɔ kɛ wɔ ngɛ yae nɛ e kɛ wɔ ngɛ bae ngɛ Adria wo ɔ nɔ ɔ, ligbi nɛ ji nyɔngma kɛ eywiɛ ɔ nɔ nyɔ mi ɔ, lɛ hluili ɔmɛ na kaa wa su kpo he ta. 28 A fɔ nɔ́ susumi kpa a nɛ a na kaa lejɛ ɔ kuɔmi ji nane kami lafa kɛ nyingmi enyɔ. Nɛ wa nyɛɛ bɔɔ se ɔ, a susu nyu ɔ mi kuɔmi ekohu nɛ a na nane kami nyingmi nɛɛ. 29 Enɛ ɔ ha nɛ a na kaa wa su kpo he ta. Se akɛnɛ e peeɔ mɛ kaa tɛ ngua komɛ ngɛ wo ɔ nya blɔ he je ɔ, a fɔ osɛkɛhi eywiɛ ngɛ lɛ ɔ se blɔ nɛ a bɔni je nanɛɛ mlɛmi.

30 Jehanɛ ɔ, lɛ hluili ɔmɛ a ti ni komɛ pee a juɛmi kaa a maa tu fo kɛ je lɛ ɔ he. A je boto ɔ nɛ a pee kaa nɔ́ nɛ a yaa fɔ osɛkɛ ngɛ lɛ ɔ yi blɔ. 31 Kɛkɛ nɛ Paulo de asafoatsɛ ɔ kɛ soja amɛ ke, "Nyɛ tsuo nyɛ yi maa ta ke nyɛ je lɛ ɔ mi." 32 Nɛ soja amɛ po kpa amɛ nɛ a kɛ fi lɛ ɔ, nɛ lɛ ɔ ya nɔ si.

33 Benɛ je mi ngɛ tsɔe ɔ, Paulo kpa mɛ tsuo pɛɛ nɛ a ye nɔ́ ko. E de mɛ ke, "Mwɔnɛ ɔ ji otsi enyɔ sɔuu nɛ nyɛ ti nɔ ko yi nɔ́ ko. 34 I ngɛ nyɛ pɛɛ kpae nɛ nyɛɛ ye nɔ́ ko bɔ nɛ pee nɛ nyɛ yi nɛ na wami. Ejakaa nyɛ ti nɔ ko yi bwɔmi kake tete be laae!"

35 Nɛ Paulo wo abolo nɛ e sɔle kɛ na Mawu si ngɛ mɛ tsuo a hɛ mi, nɛ e ku eko nɛ e ye. 36 Amlɔ ɔ nɔuu ɔ, nɔ tsuaa nɔ hɛ mi tsɔ lɛ nɛ a bɔni ni ɔ yemi. 37 Wa yi bɔ ngɛ lɛ ɔ mi ji lafa enyɔ kɛ nyingmi kpaago kɛ ekpa. 38 Benɛ lɛ hluili ɔmɛ ye ni ɔ ta a, a je blɛfo nɛ a wo ɔ tsuo kɛ pue wo ɔ mi bɔ nɛ pee nɛ lɛ ɔ nɛ pee huyɛhuyɛ bɔɔ.

Lɛ ɔ butumi

39 Benɛ je na a, a nɛ wo ɔ nya blɔ; a na wo ɔ nya kpɔ mi he ko nɛ zia fuu ngɛ. Nɛ a pee a juɛmi kaa a maa bɔ mɔde nɛ a kudɔ lɛ ɔ kɛ nyɛɛ tɛ ɔmɛ a kpɛ kɛ ya lejɛ ɔ. 40 Kɛkɛ nɛ a po osɛkɛ ɔmɛ, nɛ a ngmɛɛ a he kɛ wo wo ɔ mi. A pine akɔfa kpa amɛ nɛ a kɛ kudɔɔ lɛ ɔ; a si hɛ mi abalaa a, nɛ a pue wo ɔ nya blɔ. 41 Se lɛ ɔ ya sa si ngɛ kewu nɔ ngɛ he ko nɛ wo enyɔ kpe ngɛ, nɛ e yi blɔ pu. E supa je kpo nɛ oslɔke ɔmɛ ngɛ lɛ fiae musumusu nɛ e bɔni ywiami.

42 Nɛ soja amɛ ye gbeye kaa ni ɔmɛ nɛ a ngɛ kpakae kɛ yaa a, a ti ni komɛ ma wu nyu nɛ a maa ma fo. Enɛ ɔ he je ɔ, a wo asafoatsɛ ɔ ga kaa e ha nɛ a gbe mɛ. 43 Se akɛnɛ Yulio nɛ ji asafoatsɛ ɔ suɔ nɛ e he Paulo yi wami he je ɔ, e kplɛɛ we mɛ. E de nihi nɛ le nyu wumi ɔ nɛ a wu nyu kɛ ho kpo ya, 44 konɛ nihi nɛ piɛ ɔmɛ a bu gbegbelihi kɛ lɛ kokoe ɔmɛ a nɔ kɛ ya nu kpo. Nɛ a ti nɔ tsuaa nɔ ya nu kpo kɛ manye.