Bɔfo Ɔmɛ 25

1 Nɛ e ba mi kaa benɛ Festo ba ye Felike nane mi ngɛ Kaisarea ligbi etɛ se ɔ, e ya slaa Yerusalem. 2 Osɔfo nikɔtɔma amɛ kɛ Yuda bi ɔmɛ a nikɔtɔma amɛ ya po Paulo nya kɛ ha lɛ; 3 nɛ a kpa lɛ pɛɛ kaa e ha nɛ a kɛ Paulo nɛ ba Yerusalem. Ejakaa a pee a juɛmi kaa a maa wo ka nɛ a gbe lɛ ngɛ blɔ ɔ nɔ. 4,5 Se Festo de mɛ ke, akɛnɛ Paulo ngɛ tsu mi ngɛ Kaisarea, nɛ lɛ nitsɛ hu e se be kɛe ngɛ Yerusalem ɔ he je ɔ, e maa suɔ nɛ e kɛ a nikɔtɔma amɛ nɛ a ho Kaisarea ya konɛ a ya ye Paulo sane ɔ ngɛ lejɛ ɔ.

Paulo kojomi

6 Benɛ Festo ye ligbi kpaanyɔ loo nyɔngma se ɔ, e kpale e se kɛ ba Kaisarea, nɛ e nɔ jena nɔ ɔ, e tsɛ Paulo munyu ɔ.

7 Benɛ Paulo ba su kojomi he ɔ, Yuda bi ɔmɛ nɛ je Yerusalem ɔ ba bua a he nya nɛ a po e nya gbeyegbeye. Se a nyɛ we e nya pomi ɔmɛ a nya nɛ a tsɔɔ. 8 Nɛ Paulo de ke nya pomi ɔmɛ be mi. E de ke, "I yi fɔ, ejakaa i tɔ we Yuda bi ɔmɛ a mlaa ko nɔ, nɛ i wui Sɔlemi We ɔ he mu, nɛ i tsɔ we Roma amlaalo ɔ a hɛ mi atuã."

9 Se akɛnɛ Festo ngɛ hlae nɛ e pee Yuda bi ɔmɛ a suɔmi nya ni he je ɔ, e bi Paulo ke, "Anɛ o suɔ kaa ma ya kojo mo ngɛ Yerusalem lo?"

10 Paulo ha lɛ heto ke, "Dabi. Ma suɔ nɛ a kojo mi ngɛ amlaalo ngua a nitsɛ hɛ mi. Mo nitsɛ o le klɛdɛɛ kaa i yi fɔ. 11 Nɛ ke i pee nɔ́ ko nɛ sa gbenɔ ɔ, i kua we ke a ko gbe mi. Se ke i yi fɔ ɔ, mo loo nɔ ko be he blɔ nɛ e ngmɛɛ ye he kɛ haa nimli nɛ ɔmɛ ke a ya gbe mi. Ma suɔ nɛ Kaisare nɛ ye ye sane ɔ."

12 Kɛkɛ nɛ Festo kɛ e ga woli ɔmɛ ya kpe yi nɛ e ba ha Paulo heto ke, "Si abɔ nɛ o kɛ sane ɔ ha Kaisare ɔ, Kaisare ngɔ nɔuu o maa ya." 13 Be bɔɔ se ɔ, Matsɛ Agripa kɛ e nyɛmiyo ko nɛ a tsɛɛ lɛ ke Bernike ɔ ba slaa Festo. 14 Benɛ a ye be saii ɔ, Festo bɔ matsɛ ɔ Paulo sane ɔ. E de lɛ ke, "Felike wo nyumu ko tsu mi ngɛ hiɛ ɔ nɛ e si e sane ɔ ha mi nɛ ma kojo. 15 Nɛ benɛ i ya Yerusalem ɔ, osɔfo nikɔtɔma amɛ kɛ Yuda bi ɔmɛ a nikɔtɔma amɛ a ti ni komɛ bɔ mi e he amaniɛ, nɛ a de mi ke ma tane e yi. 16 Se i ha nɛ a le kaa Roma mlaa ngmɛ we blɔ kaa a buu nɔ ko fɔ benɛ a kojo we lɛ. Se mohu a kɛ nɔ nɛ pee tɔmi ɔ yaa kojomi he nɛ e ya jeɔ e nya ngɛ nihi nɛ wo e he munyu ɔ a hɛ mi.

17 Lɔ ɔ he je ɔ, benɛ a ba su hiɛ ɔ nɛ a ba ye sane ɔ, i tsɛ munyu ɔ nɔuu e nɔ jena, nɛ i ha nɛ a kɛ Paulo ba kojomi he ɔ. 18 Se munyuhi nɛ i susu kaa a kɛ maa wo e he ɔ, e nya poli ɔmɛ kɛ ekoeko bɛ. 19 A po e nya ngɛ mɛ nitsɛmɛ a jami kɛ nɔ ko nɛ a tsɛɛ lɛ ke Yesu nɛ e gbo, se Paulo ngɛ nɔ mi mae ke e gbo we ɔ he. 20 I nɛ bɔ nɛ ma kojo jamɛ a munyu ɔ kɛ ha. Nɛ i bi Paulo ke e maa suɔ nɛ a ya kojo e munyu ɔ ngɛ Yerusalem lo? 21 Paulo kplɛɛ we, nɛ e je sane ɔ ke Kaisare nɛ e ya ye ha lɛ. Lɔ ɔ he je ɔ i ha nɛ a kpale lɛ kɛ ya wo tsu ɔ mi kɛ ya si be nɛ i ma ngɔ lɛ kɛ ya ha Kaisare."

22 Nɛ Agripa de Festo ke, "Ma suɔ nɛ ami nitsɛ ma nu e nya mi gbi." Festo ha lɛ heto ke, "Ma ha nɛ o bu lɛ tue hwɔɔ."

23 Lɔ ɔ he je ɔ, benɛ je na a, Agripa kɛ Bernike dla a he saminya, nɛ asafoatsɛmɛ kɛ ma nikɔtɔma amɛ piɛ a he kɛ ba kojomi he ɔ konɛ a ba bu Paulo tue. Nɛ Festo ha a ya kpaka Paulo kɛ ba kojomi he ɔ.

24 Festo tu munyu kɛ je sisi nɛ e de tue buli ɔmɛ ke, "Matsɛ Agripa kɛ nyɛ nihi tsuo nɛ nyɛ ngɛ hiɛ ɔ, nyumu nɛ ɔ ji nɔ nɛ Yuda bi ngɛ ma nɛ ɔ mi kɛ Yerusalem ngɛ e gbenɔ hlae ɔ nɛ. 25 Ami lɛɛ i nɛ kaa e pee nɔ́ ko nɛ sa gbenɔ. Nɛ akɛnɛ lɛ nitsɛ e bi nɛ Kaisare nɛ ye e munyu ɔ he je ɔ, i be nɔ́ ko nɛ ma de. I kɛ lɛ ma ya ha lɛ. 26 Se akɛnɛ i nɛ nya pomi titli ko ngɛ e he ɔ, mɛni ma ngma kɛ piɛ e he kɛ ya ha Kaisare? Enɛ ɔ he nɛ i kɛ lɛ ba nyɛ hɛ mi ngɛ, titli ɔ, mo Matsɛ Agripa, konɛ o hyɛ e sane ɔ ha nɛ o wo mi ga ngɛ nɔ́ nɛ sa kaa ma ngma a he. 27 Ejakaa e sɛ kaa a kɛ nɔ ko nɛ a nu lɛ maneɔ Kaisare nɛ a tsɔɔ we nɔ́ nɛ e pee ɔ."