Bɔfo Ɔmɛ 23

1 Paulo hyɛ Kpe ɔ gaa nɛ e de mɛ ke, "Anyɛmimɛ, i baa ye je mi kɛ juɛmi kpakpa ngɛ Mawu hɛ mi."

2 Paulo nya nɔɛ si nɛ Anania nɛ ji Osɔfo Nɔkɔtɔma a de nihi nɛ daa si ngɛ e kasa nya a ke a gba e nya ma.

3 Kɛkɛ nɛ Paulo de Anania ke, "Mo gbogbo nɛ a sa he kalo, Mawu ma gba mo hu ma. Mɛni kojolɔ mimi ji mo nɛ mo nitsɛ o tɔɔ mlaa a nɔ, nɛ o faa kaa a gba ye nya ma kaa kikɛ ɔ?"

4 Se nihi nɛ daa si ngɛ Paulo he ɔ de lɛ ke, "Ei! Mawu Osɔfo Nɔkɔtɔma a munyu nya nɛ o ngɛ jee kikɛ ɔ?"

5 Paulo ha mɛ heto ke, "Anyɛmimɛ, i li kaa lɛ ji Osɔfo Nɔkɔtɔma a, ejakaa a ngma ngɛ Ngmami Klɔuklɔu ɔ mi ke, ‘Koo tu munyu yaya ko kɛ si ma nɔkɔtɔma ko.’ "

6 Benɛ Paulo na kaa Saduki bi ɔmɛ kɛ Farisi bi ɔmɛ ji kojoli ɔmɛ ɔ, e kpa ngmlaa nɛ e de ke, "Anyɛmimɛ, Farisi no ji mi, nɛ ye nɛmɛ hu Farisi bi ji mɛ, nɛ nyɛ ngɛ mi kojoe mwɔnɛ ɔ ngɛ hiɛ ɔ? Ejakaa i ke i heɔ yeɔ kaa gbogboehi a si temi ko ngɛ."

7 Enɛ ɔ ha nɛ mi gbami ba Farisi bi ɔmɛ kɛ Saduki bi ɔmɛ a kpɛti. 8 Ejakaa Saduki bi ɔmɛ tsɔɔ kaa ni gbogboehi a si temi ko be, nɛ Mawu bɔfohi loo mumi ko be neneene wami. Se Farisi bi ɔmɛ lɛɛ a heɔ ni nɛ ɔmɛ tsuo yeɔ.

9 Kɛkɛ nɛ nya sami wawɛɛ ko te si ngɛ a kpɛti. Nɛ Yuda bi ɔmɛ a kpɛti womi ngmali komɛ fi Paulo se, nɛ a kpa ngmlaa nɛ a de ke, "Wa nɛ yayami ko ngɛ nyumu nɛ ɔ he. Eko piɔ ɔ, mumi ko loo hiɔwe bɔfo ko nɛ e kɛ lɛ tu munyu."

10 Benɛ ngmlaa a nya ba ngɛ wae, nɛ a bɔni Paulo hɛɛmi basabasa a, asafoatsɛ nɔkɔtɔma a ye gbeye kaa e mi ma tsɔ, lɔ ɔ he je ɔ, e ha nɛ soja amɛ ya kpɔ lɛ ngɛ a dɛ, nɛ a kɛ lɛ ya wo tsu mi ekohu.

11 Jamɛ a ligbi ɔ nyɔ mi ɔ, Nutsɔ ɔ ba Paulo ngɔ nɛ e ba de lɛ ke, "Paulo! Koo ye gbeye; bɔ nɛ o ye ye he odase ngɛ Yerusalem ɔ, moo ye ye he odase ja a kɛ ngɛ Roma hu."

12 E nɔ jena a, Yuda bi komɛ ka a he kita kaa a be ni yee, nɛ a be nyu hu nue kɛ ya si be nɛ a maa gbe Paulo. 13 Nihi nɛ ka a he kikɛmɛ a kita nɛ ɔ a yi maa su nyingmi eywiɛ. 14 Nɛ a ho ya de osɔfo nikɔtɔma amɛ kɛ ma nikɔtɔma amɛ kita a nɛ a kã a. 15 A de mɛ ke, "Nyɛ de asafoatsɛ nɔkɔtɔma a nɛ e kpale Paulo kɛ ba Ma Kpe ɔ hɛ mi ekohu, nɛ nyɛɛ bua de lɛ ke nyɛ ngɛ nɔ́ komɛ nɛ nyɛ ma bi lɛ ekohu, bɔ nɛ pee nɛ waa gbe lɛ ngɛ blɔ ɔ nɔ."

16 Se Paulo nyɛmiyo e binyumu ko nu yi mi nɛ a to ɔ he nɛ e ya wo Paulo tue nɔ ngɛ tsu ɔ mi.

17 Kɛkɛ nɛ Paulo tsɛ asafoatsɛ ɔmɛ a ti nɔ kake nɛ e de lɛ ke, "Moo kɛ kikɛmɛ a niheyo nɛ ɔ nɛ ya asafoatsɛ nɔkɔtɔma a ngɔ, ejakaa e ngɛ sɛ wawɛɛ ko nɛ e ma de lɛ."

18 Asafoatsɛ ɔ kplɛɛ nɛ e kpaka Paulo tsɔlɔ ɔ kɛ ho asafoatsɛ nɔkɔtɔma a ngɔ ya nɛ e ya de lɛ ke, "Paulo, nɔ nɛ a wo tsu mi ɔ ke ma kpaka niheyo nɛ ɔ kɛ ba o ngɔ nɛ e ba de mo sane ko."

19 Asafoatsɛ nɔkɔtɔma a nu niheyo ɔ nine si kɛ ba se nɛ e bi lɛ ke, "Mɛni sane nɛ o ngɛ hlae nɛ o de mi ɔ?"

20 Niheyo ɔ he nɔ nɛ e de lɛ ke, "Hwɔɔ ɔ, Yuda bi ɔmɛ ma bi mo nɛ o ngmɛɛ Paulo he konɛ a kɛ lɛ nɛ ba Kojomi he ɔ ekohu. A maa bua kaa a ma bi e nya mi munyu ko. 21 Mo ko kplɛɛ, ejakaa a ti nihi pe nyingmi eywiɛ wo ka ngɛ blɔ ɔ he, nɛ a kã kita kaa a be ni yee, nɛ a be nyu tete nue kɛ ya si be nɛ a maa gbe lɛ. Lɔ ɔ he je ɔ, o nya kɛkɛ nɛ a ngɛ hyɛe nɛ o kplɛɛ."

22 Benɛ asafoatsɛ nɔkɔtɔma a nu kikɛmɛ a sane nɛ ɔ, e bɔ niheyo ɔ kɔkɔ ke, "Mo ko de nɔ ko kaa o wo sane nɛ ɔ nɔ ta de mi."

23 Asafoatsɛ nɔkɔtɔma a tsɛ asafoatsɛhi enyɔ kɛ ba e ngɔ nɛ e fa mɛ ke, "Nyɛ ha nɛ sojahi lafa enyɔ a pee klaalo nɛ a maa ya Kaisarea mwɔnɛ ɔ gbɔkuɛ ngmlɛ nɛɛ. Nɛ nyɛ tsɛ soja akplɔtsɛmɛ lafa enyɔ kɛ okpɔngɔtsɛmɛ hu nyingmi kpaago kɛ piɛ a he kɛ ya. 24 Nyɛ ha Paulo hu okpɔngɔ nɛ e hi nɔ, nɛ nyɛɛ kɛ lɛ ya ha Amlaalo Felike kɛ manye."

25 Nɛ e ngma womi nɛ ɔ kɛ mane amlaalo ɔ ke,

26 "Imi Klaudio Lisia nɛ ngɛ mo Amlaalo Nɔkɔtɔma Felike womi nɛ ɔ ngmae.

I ngaa mo!

27 Yuda bi ɔmɛ nu kikɛmɛ a nyumu nɛ ɔ nɛ a miɔ nɛ a maa tane e yi, se i ha nɛ soja amɛ ya kpɔ lɛ ngɛ a de. Ejakaa i na le kaa Roma no ji lɛ. 28 Jehanɛ ɔ, i kɛ lɛ ya a Kojomi he ɔ konɛ ma le nɔ́ nɛ e pee. 29 Nɛ i na kaa e pee we nɔ́ ko nɛ sa gbenɔ loo tsu womi, se mɛ nitsɛmɛ a mlaa amɛ a he nɛ a ngɛ e nya poe ngɛ. 30 I na le hu kaa a ngɛ hlae nɛ a gbe lɛ kokooko. Enɛ ɔ he je ɔ, i tsɔ nɛ a wo lɛ kɛ ba ha mo konɛ e nya poli ɔmɛ nɛ a ba je a nya ngɛ o hɛ mi."

31 Nɛ soja amɛ kɛ Paulo nyɛɛ nyɔnyɔɔnyɔ nɛ a kɛ lɛ ba Antipatri jamɛ a gbɔkuɛ ɔ kaa bɔ nɛ a fa mɛ ɔ. 32 E nɔ jena mɔtu ɔ, a kpale a se kɛ ba he nɛ a wo Paulo tsu mi ngɛ ɔ ekohu, nɛ okpɔngɔtsɛ ɔmɛ kɛ Paulo tsa nɔ kɛ ho Kaisarea ya.

33 Benɛ a ya su Kaisarea a, a wo Paulo kɛ womi ɔ ya ha amlaalo ɔ. 34 Amlaalo ɔ kane womi ɔ gbe nya pɛ nɛ e bi Paulo he nɛ e je, nɛ Paulo ha heto ke e je Kilikia.

35 Kɛkɛ nɛ amlaalo ɔ de Paulo ke, "Ke o nya poli ɔmɛ ba su si ɔ, loko ma bu mo tue saminya." Nɛ e ha nɛ a ya wo lɛ tsu mi ngɛ Matsɛ Herode mwɔ ɔ mi.