Bɔfo Ɔmɛ 21

Paulo nyagbe Yerusalem yami

1 Benɛ waa kɛ Efeso asafo nikɔtɔma amɛ ye se gbe nya a, wa sɛ lɛ kɛ ba Koo. E no jena a, wa je Koo kɛ ba Rodo, nɛ wa je lejɛ ɔ hu kɛ ba Patara. 2 Nɛ wa ba sɛ lɛ ko ngɛ lejɛ ɔ nɛ yaa Foinike ngɛ Siria zugba a nɔ. 3 Wa na Kipro wo kpɔ ɔ paa mohu, se wa po lɛ ngɔ fɔ wa muɔ nɔ je, nɛ wa ya wa ngɛ Tiro lɛ dami he ɔ ngɛ Siria zugba a nɔ, nɛ a ba je tlomi ngɛ lejɛ ɔ. 4 Wa kple si nɛ wa ya hla kaseli nɛ ngɛ Tiro ɔmɛ a se blɔ, nɛ wa hi a ngɔ otsi kake. Nɛ Mumi Klɔuklɔu ɔ de kɛ gu a nɔ nɛ a de Paulo ke e ko ya Yerusalem. 5 Otsi ɔ nyagbe ɔ, Tiro kaseli ɔmɛ kɛ a yihi kɛ a bimɛ kulaa ba je wɔ blɔ ngɛ lɛ dami he ɔ. Benɛ waa kɛ mɛ sɔle gbe nya a, wa ye sɛ. 6 Wa sɛ lɛ ɔ nɛ mɛ hu a kpale a se.

7 Jehanɛ ɔ, wa ya wa ngɛ Pitolemai nɛ wa ya nga kaseli nɛ ngɛ ma a mi ɔ, nɛ wa ye ligbi kake ngɛ a ngɔ, 8 loko wa je kɛ ho Kaisarea ya nɛ wa ya to Filipo nɛ ji Mawu Munyu fiɛlɔ, kɛ nimli kpaago nɛ a hla kɛ to nihi a nya a, a ti nɔ kake ɔ ngɔ. 9 Filipo ngɛ biyiwi eywiɛ nɛ gba we, nɛ Mawu mumi ngɛ a mi nɛ a naa ni.

10 Benɛ wa ye be saii ngɛ Kaisarea a, Yuda no gbalɔ ko nɛ a tsɛɛ lɛ ke Agabo ɔ je Yudea kɛ ba, 11 nɛ e ba slaa wɔ. Kɛkɛ nɛ Agabo ba wo Paulo mlɛ mi fimi nɔ́ ɔ nɛ e kɛ fi lɛ nitsɛ e ninehi kɛ e nanehi nɛ e de ke, "Mumi Klɔuklɔu ɔ ngɛ dee ke, ‘Kikɛ ɔ nɔuu nɛ Yuda bi ɔmɛ ma ya fi mlɛ mi fimi nɔtsɛ nɛ ɔ ngɛ Yerusalem nɛ a kɛ lɛ ma ha Roma bi ɔmɛ.’ " 12 Kikɛmɛ a munyu nɛ ɔ ngɔɛ wa nya. Lɔ ɔ he je ɔ, waa kɛ lejɛ ɔ kaseli ɔmɛ kpa Paulo pɛɛ nɛ e ko hia nane kɛ ya Yerusalem.

13 Se Paulo he nɔ nɛ e de ke, "Mɛni he je nɛ nyɛ ngɛ ya foe kɛ ngɛ ye tsui yee kikɛ ɔ? I dla ye he, pi kɛ ha tsu nɛ a maa wo mi ngɛ Yerusalem ɔ kɛkɛ, se mohu kɛ ha gbenɔ tete nɛ i ma gbo ngɛ Nutsɔ Yesu biɛ ɔ he." 14 Benɛ wa na kaa Paulo muɔ e yi mi kpɔ nɛ e bui wa slɔmi ɔ tue ɔ, wa ngmɛɛ e he nɛ wa de ke, "A pee nɔ́ nɛ Nutsɔ ɔ suɔ."

15 Kɛkɛ nɛ wa fi wa tlomi ɔmɛ nɛ wa pue Yerusalem blɔ. 16 Kaisarea kaseli ɔmɛ a ti ni komɛ piɛ wa he kɛ ba su Yerusalem, nɛ wa ya to Mason nɛ ji kekleekle kaseli ɔmɛ a ti nɔ kake nɛ je Kipro ɔ ngɔ. 17 Nɛ Yerusalem kaseli ɔmɛ tsuo ba nya wa he saminya.

18 E nɔ jena a, Paulo kɛ wɔ piɛ e he nɛ wa ya nga Yakobo kɛ Yerusalem asafo ɔ nikɔtɔma amɛ. 19 Benɛ wa nga mɛ se ɔ, Paulo bɔ mɛ nihi babauu nɛ Mawu tsu ngɛ ma je li ɔmɛ a kpɛti kɛ gu e nɔ ɔ.

20 A je Mawu yi se a de Paulo ke, "Suɔlɔ anyɛmi, o le, Yuda bi abɔ he Manye Munyu ɔ ye, se mohu a ngmɛɛ we a mlaa amɛ kɛ a kusumi ɔmɛ a he. 21 A ba de Yuda bi nɛ he ye ngɛ Yerusalem ɔ ke o sume Mose mlaa amɛ kɛ Yuda bi ɔmɛ a kusumi ɔmɛ; nɛ o bɔ mɛ kɔkɔ hulɔ kaa a ko wo a bimɛ nyumu mi. 22 Lɔ ɔ he je ɔ, kɛ wa ngɛ pee kɛɛ? Ejakaa a maa nu he kaa o ba.

23 Wa maa suɔ nɛ waa wo mo ga nɛ ɔ. Wa ngɛ nyumuhi eywiɛ ngɛ hiɛmɛ nɛ ɔ nɛ dla a he nɛ a ma kpa a yi nɛ a kã kita komɛ. 24 Kɛ mɛ nɛ ya Sɔlemi We ɔ nɛ mohu o ya kpa o yi ɔ nɛ o wo hiɔ ha mɛ.

Enɛ ɔ ma ha nɛ nɔ tsuaa nɔ nɛ na kaa o de we Yuda bi ɔmɛ a ti nihi nɛ he ye ɔ kaa a ko ye a kusumi kɛ a mlaa amɛ a nɔ. Ejakaa mo nitsɛ tete o yeɔ a mlaa amɛ a nɔ.

25 Se ma je li nɛ he ye ɔmɛ lɛɛ wa de we mɛ ke a ye Yuda bi ɔmɛ a kusumi ɔmɛ a nɔ, pe níhi nɛ wa ngma mɛ ɔ, kaa a ko ye wɔ nya niye ni kɛ lohwehi nɛ a ki a kuɛ; nɛ a ko bɔ ajuama hulɔ."

26 Kɛkɛ nɛ Paulo kplɛɛ a ga womi ɔ nɔ, nɛ e nɔ jena a, e kɛ ni ɔmɛ ho ya tsukɔ a he nɛ a sɛ Sɔlemi We ɔ. Enɛ ɔ tsɔɔ kaa a gbe he tsukɔmi be ɔmɛ a nya nɛ e piɛ bɔ sami nɛ a maa sa kɛ ha a ti nɔ tsuaa nɔ ngɛ ligbi kpaago ɔ se. 27 Se benɛ e piɛ bɔɔ nɛ ligbi kpaago ɔ maa su ɔ, Yuda bi komɛ nɛ je Turkia a ba na lɛ ngɛ Sɔlemi We ɔ, kɛkɛ nɛ a sɔ kɛ wo e he nɛ a nu lɛ. 28 A kpa ngmlaa nɛ a de ke, "Nyɛ ba ye kɛ bua wɔ, Israel bi! Nyɛ nɛ nyumu ɔ nɛ ngɛ fiɛe ngɛ he fɛɛ he ke a ko bu wa ma a kɛ wa mlaa amɛ ɔ ngɛ hiɛ ɔ! E tuɔ musu bɔmi munyu kɛ siɔ Sɔlemi We ɔ nɛ e kɛ ma je li tete baa Sɔlemi We ɔ nɛ e ba woɔ Sɔlemi We ɔ he mu." 29 A po Paulo nya ja, ejakaa a na e kɛ Trofimo, ma je no nɛ je Efeso ngɛ Turkia jamɛ a ligbi ɔ ngɛ ma a mi, nɛ a susu kaa Paulo kɛ lɛ ya Sɔlemi We ɔ.

30 Enɛ ɔ ha nɛ ma a mi tsuo pee gidigidi nɛ a nu Paulo nɛ a sa lɛ kɛ je kpo ngɛ Sɔlemi We ɔ nɛ a ngmɛ Sɔlemi We ɔ agbo ɔmɛ a mi amlɔ nɔuu. 31 Nɛ e ba mi kaa benɛ a ngɛ hlae nɛ a gbe lɛ ɔ, Roma asafoatsɛ nɔkɔtɔma a nu he kaa Yerusalem tsuo pee gidigidi. 32 Amlɔ ɔ nɔuu nɛ e je sojahi kɛ asafoatsɛmɛ nɛ a wo fo kɛ ya sɛ asafo kpɛti. Nɛ benɛ ni ɔmɛ na soja amɛ ɔ, kɛkɛ nɛ a jɔɔ Paulo gbemi. 33 Asafoatsɛ nɔkɔtɔma a nu lɛ nɛ e ha nɛ a wo lɛ kɔsɔkɔsɔhi enyɔ. Jehanɛ ɔ, e bi ni ɔmɛ nɔ nɛ e ji, kɛ nɔ́ nɛ e pee. 34 Se mɛ tsuo a ngɛ ngmlaa kpae nɛ a ngɛ níhi slɔɔtohi dee. Nɛ akɛnɛ asafoatsɛ nɔkɔtɔma a nɛ nɔ́ pɔtɛɛ nɛ a ngɛ dee, nɛ lejɛ ɔ tsuo pee hoo he je ɔ, e ha nɛ a ngɔ Paulo kɛ ya wo mwɔ mi. 35 Se benɛ a kɛ Paulo su atlakpe ɔ nya a, ni ɔmɛ a gidigidi peemi ɔ nya ba wa. Lɔ ɔ he je ɔ, a wo lɛ ngɔ fɔ a konɔ bɔ nɛ pee nɛ ni ɔmɛ a nine nɛ ko su e he. 36 Se kɛ ɔ, ni ɔmɛ nyɛɛ e se kɛ ngmlaa ke, "A gbe lɛ, a gbe lɛ!"

37 Benɛ a kɛ Paulo yaa wo tsu ɔ mi ɔ, e bi asafoatsɛ nɔkɔtɔma a ke, "Anɛ i ngɛ he blɔ nɛ i kɛ mo tuɔ munyu lo?" Enɛ ɔ pee asafoatsɛ nɔkɔtɔma a hɛ mi yaa, nɛ e bi Paulo ke, "Anɛ o nu Hela gbi lo? 38 Anɛ pi mo ji Mizraim no atuã tsɔlɔ nɛ ba nu awi yeli akpe eywiɛ nɛ o kpaka mɛ kɛ ho nga a nɔ ya be ko nɛ be ɔ mi lo?"

39 Nɛ Paulo ha lɛ heto ke, "Dabi! Yuda no ji mi, nɛ i je Tarso ngɛ Kilikia ma agbo ko mi. I kpa mo pɛɛ nɛ o ha mi he blɔ nɛ ma tu munyu kɛ tsɔɔ nimli nɛ ɔmɛ."

Paulo je e nya

40 Asafoatsɛ nɔkɔtɔma a kplɛɛ nɔ nɛ Paulo da si ngɛ atlakpe ɔ nɔ nɛ e fɔ ni ɔmɛ nine ke a pee dii nɛ a bu lɛ tue. Benɛ lejɛ ɔ jɔ klanaa a, Paulo tu munyu ngɛ Hebri gbi mi nɛ e de ke,