1 Benɛ Paulo kɛ Barnaba ngɛ Antiokia a, Yuda bi komɛ je Yudea kɛ ba lejɛ ɔ nɛ a ba tsɔɔ kaseli ɔmɛ ni ke, loko ji a ma he a yi wami ɔ, ja a wo mɛ nyumu mi ngɛ Yuda bi ɔmɛ a kusumi ɔ nya. 2 Paulo kɛ Barnaba kɛ ni ɔmɛ sa nya ngɛ he. Nyagbe mi ɔ, kaseli ɔmɛ tsɔ Paulo kɛ Barnaba kɛ a ti ni komɛ kɛ ho Yerusalem ya nɛ a kɛ bɔfo ɔmɛ kɛ nikɔtɔmahi nɛ ngɛ lejɛ ɔ nɛ a ya susu kikɛmɛ a tsɔɔmi nɛ ɔ he. 3 Benɛ asafo ɔ je mɛ blɔ ɔ, tsɔli ɔmɛ tsa nɔ nɛ a ya gu kaseli nɛ ngɛ Foinike kɛ Samaria mahi nɛ ngɛ Yerusalem blɔ he ɔ a ngɔ, nɛ a bɔ mɛ amaniɛ kaa ma je li ɔmɛ hu ngɛ tsakee, nɛ a na bua jɔmi babauu.

4 Benɛ Paulo kɛ Barnaba ya su Yerusalem ɔ, bɔfo ɔmɛ kɛ asafo nikɔtɔma amɛ tsuo kpe nɛ Paulomɛ bɔ mɛ ni tsumihi nɛ Mawu ngɛ tsue kɛ gu a nɔ ɔ he amaniɛ. 5 Se Farisi bi komɛ nɛ tsake ɔ kɛ mɛ kpa we gbi. A de ke e sa nɛ a wo ma je li ɔmɛ nɛ he Mawu Manye Munyu ɔ ye ɔ nyumu mi nɛ a ha nɛ a ye Yuda bi ɔmɛ a kusumi ɔmɛ kɛ mlaa amɛ tsuo nɔ. 6 Enɛ ɔ ha nɛ bɔfo ɔmɛ kɛ asafo nikɔtɔma amɛ tsɛ kpe kpa konɛ a hyɛ kikɛmɛ a munyu nɛ ɔ mi.

7 Benɛ a ya kpe nɛ a hyɛ munyu ɔ mi hluu ɔ, Petro te si nɛ e de mɛ ke, "Anyɛmimɛ, nyɛ tsuo nyɛ le kaa Mawu hla mi ngɛ nyɛ kpɛti nɛ ma ya fiɛ Manye Munyu ɔ kɛ tsɔɔ ma je li ɔmɛ konɛ mɛ hu a he nɛ a ye. 8 Nɛ Mawu, nɔ nɛ le tsui fɛɛ tsui mi ɔ, e kɛ Mumi Klɔuklɔu ɔ ha ma je li ɔmɛ hu kaa bɔ nɛ e kɛ ha wɔ ɔ, nɛ e kɛ ma nɔ mi kaa e he mɛ hu. 9 Mawu gba we waa kɛ mɛ wa mi, ejakaa e tsukɔ a he kɛ gu hemi kɛ yemi nɔ kaa bɔ nɛ e pee wɔ hu ɔ. 10 Anɛ nyɛ ngɛ hlae nɛ nyɛɛ ka Mawu, nɛ lɔ ɔ he nɛ nyɛ wo tlomi nɛ wɔ kɛ wa tsɛ ɔmɛ nyɛ we nɛ waa tloo ɔ kɛ ngɛ ma je li ɔmɛ tlooe lo? 11 Anɛ nyɛ he we yi kaa blɔ kake ɔ nɔuu nɛ ji Nutsɔ Yesu dloomi nɔ́ke nɔ ɔ nɔ nɛ a guɔ kɛ heɔ nɔ tsuaa nɔ yi wami lo?"

12 Kɛkɛ nɛ a kpa munyu ɔ nya hlami ɔ, nɛ a bu Paulo kɛ Barnaba tue nɛ a bɔ mɛ nyakpɛ níhi nɛ Mawu pee kɛ gu a nɔ ngɛ ma je li ɔmɛ a kpɛti ɔ.

13 Benɛ Barnaba kɛ Paulo a nya nɔ si ɔ, Yakobo te si nɛ e de kpe ɔ ke, "Anyɛmimɛ, nyɛɛ bu mi tue! 14 Petro tsɔɔ nyɛ be kekle nɛ Mawu ba slaa ma je li ɔmɛ nɛ e hla a ti ni komɛ kɛ wo e hɛ mi nyami ɔ. 15 Nɛ ma je li ɔmɛ a tsakemi ɔ ba mi kaa bɔ nɛ gbali ɔmɛ gba kɛ fɔ si ɔ, nɛ Gbalɔ Amos womi ɔ de ke, 16 ‘Nɛ ma kpale kɛ ba ekohu ngɛ nɔ́ nɛ ɔmɛ a se, nɛ ma ba ma David Sɔlemi Tsu ɔ nɛ ywia a, 17 konɛ ma je li ɔmɛ kɛ nihi tsuo nɛ a wo ye biɛ kɛ wo mɛ ɔ nɛ a hla ye se blɔ.’ 18 Nutsɔ, nɔ nɛ jeɔ e yi mi tomi kpo kɛ tsɔɔ kɛ je sisije ɔ, nɛ ngɛ enɛ ɔ dee.

19 Lɔ ɔ he je ɔ, nɔ́ nɛ i ngɛ dee ji, wa ko nyɛ ma je li ɔmɛ nɛ ngɔ a he ke ha Mawu ɔ a nɔ, kaa a ye wɔ Yuda bi ɔmɛ wa mlaa amɛ a nɔ. 20 Se mohu; nyɛ ha nɛ waa ngma mɛ womi nɛ wa de mɛ ke a ko ye lohwehi nɛ a gbe kɛ ha wɔhi, nɛ a kpa ajuama bɔmi. 21 Ejakaa nɔ́ nɛ ɔmɛ ji níhi nɛ a bɔɔ mɛ kɔkɔ ngɛ he daa Hejɔɔmi Ligbi ɔ nɔ kɛ je blema ngɛ Yuda bi ɔmɛ a kpe he ɔmɛ ngɛ ma fɛɛ ma nɔ ke a ko pee."

22 Kɛkɛ nɛ bɔfo ɔmɛ kɛ nikɔtɔma amɛ kɛ asafo ɔ tsuo kplɛɛ nɔ kaa a je a ti nihi kɛ piɛ Paulo kɛ Barnaba he kɛ ya Antiokia nɛ a ya bɔ kaseli nɛ ngɛ lejɛ ɔ a susumi nɛ ɔ. Nɛ asafo nikɔtɔmahi enyɔ nɛ a je kɛ piɛ a he ɔ ji Yuda nɛ a tsɛɛ lɛ ke Barsaba kɛ Sila.

23 Nɛ womi nɛ a ngma kɛ ha tsɔli ɔmɛ nɛ a kɛ ya ha ma je li ɔmɛ ji enɛ ɔ nɛ:

"Bɔfohi kɛ nikɔtɔmahi kɛ nyɛmimɛ nɛ ngɛ Yerusalem ɔ biɔ nyɛ nyɛmimɛ ma je li nɛ ngɛ Antiokia kɛ Siria kɛ Kilikia a saminya.

24 Wa na le kaa wa ti kaseli komɛ ba nyɛ ngɔ ba puɛ nyɛ juɛmi nɛ a hao nyɛ susuma. Wa ngɛ hae nɛ nyɛɛ le kaa pi wa gbi nɔ nɛ a ba ngɛ. 25 Lɔ ɔ he je ɔ, wa susu he nɛ wa ma nya si kɛ gbi kake kaa e sa nɛ wa je wa nane mi dali enyɔ kɛ piɛ suɔli Paulo kɛ Barnaba he kɛ ba nyɛ ngɔ. 26 Nɛ wa nane mi dali ɔmɛ nɛ ji Yuda kɛ Sila a, a ji nimli nɛ ngɔ a wami kɛ ha ngɛ Nutsɔ Yesu Kristo he.

27 Nɛ a maa ma nɔ́ nɛ wa susu ngɛ nyɛ sane ɔ he ɔ nɔ mi kɛ ha nyɛ. 28 Ejakaa e sa Mumi Klɔuklɔu ɔ hɛ mi kɛ wɔ hu wa hɛ mi kaa a ko ngɔ Yuda bi ɔmɛ a mlaa kpa ko kɛ ha nyɛ ke nyɛɛ ye nɔ, pe kɔhi nɛ a he hia amɛ kɛkɛ, 29 kaa nyɛ ko ye lohwe nɛ a gbe kɛ ha wɔ, kɛ lohwe nɛ a ki e kuɛ; nɛ nyɛ ko bɔ ajuama hulɔ. Ke nyɛ ye kɔ nɛ ɔmɛ a nɔ ɔ, kɛkɛ e hiɛ. Nyɛɛ hi si saminya."

30 Kɛkɛ nɛ tsɔli eywiɛ ɔmɛ pue nɔ amlɔ ɔ nɔuu kɛ ho Antiokia ya nɛ a ya bua asafo ɔ tsuo nya, nɛ a kɛ womi ɔ ha mɛ. 31 Nɛ asafo ɔ na bua jɔmi babauu benɛ a kane womi ɔ.

32 Akɛnɛ Yuda kɛ Sila a nya mi tsɔ kɛ munyu tumi he je ɔ, a fiɛ Mawu Munyu ɔ nɛ e nya kɛ, kɛ ha Antiokia asafo ɔ, nɛ a kɛ wo mɛ he wami. 33 Yuda kɛ Sila kɛ Antiokia asafo ɔ hi si be saii loko ji a kpale kɛ ba Yerusalem he nɛ a tsɔ mɛ ke je ɔ kɛ manye. 34,35 Se Paulo kɛ Barnaba tlɔ Antiokia nɛ a ye kɛ bua nihi fuu ngɛ Mawu Munyu ɔ fiɛmi kɛ ni tsɔɔmi mi.

36 Se benɛ a ye be saii ngɛ Antiokia a, Paulo de Barnaba ke a kpale kɛ ba Turkia ekohu nɛ a ya slaa kaseli ɔmɛ ngɛ ma fɛɛ ma mi he nɛ a fiɛ Manye Munyu ɔ ngɛ ɔ, konɛ a hyɛ bɔ nɛ a ngɛ nɔ yae ha. 37 Barnaba kplɛɛ, se e suɔ kaa a ngɔ Yohane Marko kɛ piɛ a he. 38 Se Paulo kplɛɛ we nɔ, ejakaa Yohane kpale ngɛ a se ngɛ Pamfilia. 39 Akɛnɛ a bɛ gbi kake ngɛ enɛ ɔ he he je ɔ, a mi gba enyɔ, nɛ Barnaba ngɔ Marko kɛ piɛ e he nɛ a gu lɛ mi kɛ ho Kipro ya. 40,41 Paulo hu ngɔ Sila kɛ piɛ e he; nɛ benɛ kaseli ɔmɛ to mɛ kɛ wo Mawu dɛ nɛ a gbaa mɛ ɔ, a pue nɔ kɛ ho Siria kɛ Kilikia ya konɛ a ya wo asafohi nɛ ngɛ lejɛ ɔmɛ he wami.