1 Benɛ Pentekoste ligbi ɔ su ngɛ otsi kpaago nɛ nyɛɛ Yesu gbenɔ kɛ e si temi ɔ se ɔ, Kristo se nyɛɛli ɔmɛ ya bua a he nya jamɛ a ligbi ɔ ngɛ he kake. 2 Si kake too ɔ, a nu pɛmi ko he kɛ je hiɔwe kaa bɔ nɛ kɔɔhiɔ nɛ nya wa fiaa a, nɛ e yi we ɔ mi he nɛ a kpe ngɛ ɔ. 3 Kɛkɛ nɛ nɔ́ ko kaa la lilɛhi ba ma a yi mi. 4 Nɛ Mumi Klɔuklɔu ɔ ba a ti nɔ tsuaa nɔ nɔ, nɛ e ha a bɔni gbi kpahi nɛ a li tumi.

5 Jamɛ a ligbi ɔ Yuda bi Mawu jali babauu je mahi fuu a mi kɛ ba Yerusalem ngɛ Pentekoste ligbi ɔ yemi he. 6 Lɔ ɔ he je ɔ, benɛ a nu pɛmi ɔ he ngɛ hiɔwe ngɛ jamɛ a we ɔ yi mi ɔ, nihi fuu wo fo kɛ ba lejɛ ɔ nɛ a ba hyɛ nɔ́ nɛ ba. Nɛ benɛ a nu nɛ kaseli ɔmɛ ngɛ mɛ nitsɛmɛ a gbihi tue ɔ, a nya kpɛ a he saminya.

7 Nɛ a kpa ngmlaa nɛ a bi a he ke, "Kɛ e ba kɛɛ? Ejakaa Galilea bi ji ni nɛ ɔmɛ, 8 se a ngɛ wa zugba a nɔ gbi ɔmɛ tsuo tue kaa lejɛ ɔmɛ nɛ a fɔ mɛ ngɛ. 9 Nyɛɛ hyɛ Partia bi kɛ Media bi kɛ Elam bi kɛ nihi nɛ je Mesopotamia kɛ Yudea kɛ Kapadokia, Ponto kɛ Asia, 10 Frigia kɛ Pamfilia, Mizraim kɛ Kirene ngɛ Libia zugba a nɔ́ kɛ nibwɔhi nɛ je Roma, Yuda bi kɛ nihi nɛ plɛ Yuda bi, 11 Kreta bi kɛ Arabia bi ji mɛ se wɔ tsuo wa ngɛ nue nɛ a ngɛ Mawu nyakpɛ ni agbohi jajee kɛ ngɛ wɔ dee ngɛ wɔ nitsɛmɛ wa gbi ɔmɛ a mi."

12 Nɛ mɛ tsuo a nya kpɛ a he nɛ a pee yaa kɛ daa si, nɛ a bi a he ke, "Enɛ ɔ sisi nɛɛ?"

13 Se ni komɛ hu ye a he fɛu nɛ a de ke, "Da nɛ a de."

14 Kɛkɛ nɛ Petro kɛ bɔfo nyɔngma kɛ kake ɔ te si, nɛ Petro wo e gbi nɔ nɛ e de asafo ɔ ke, "Yerusalem bi kɛ nibwɔhi, nyɛ tsuo nyɛɛ bu tue. 15 Pi da nɛ ni nɛ ɔmɛ de kaa bɔ nɛ nyɛ ti ni komɛ ngɛ dee ɔ. E be mi, ejakaa je nɛ, nɛ nɔ ko di da mɔtu ngmlɛ nɛɛ mi. 16 Se mohu nɔ́ nɛ he je mɔtu nɛ ɔ ji nɔ́ ko nɛ Gbalɔ Yoel gba momoomo ke, 17 Mawu de ke, ‘Ngɛ nyagbe ligbi ɔ nɔ ɔ, i ma nɛ ye Mumi Klɔuklɔu ɔ ngɔ pue he lo tsuaa he lo nɔ, nɛ nyɛ binyumu ɔmɛ kɛ nyɛ biyi ɔmɛ maa gba, nihewi ɔmɛ maa na ni namihi, nɛ nikɔtɔma amɛ maa nla nlamihi. 18 Ye Mumi Klɔuklɔu ɔ maa ba ye sɔmɔli nyumu ɔmɛ kɛ yi ɔmɛ tsuo a nɔ nɛ a maa gba. 19 Ma pee nyakpɛ okadihi ngɛ hiɔwe kɛ zugba a nɔ, nɛ a maa na muɔ kɛ la kɛ la su ku nɛ wo kaa bɔ kuu. 20 Pu maa wo diblii, nɛ nyɔhiɔ ma plɛ muɔ loko Nutsɔ ɔ Ligbi nɛ he ngɛ gbeye ɔ maa su. 21 Nɛ e maa ba mi kaa nɔ tsuaa nɔ nɛ ma tsɛ Nutsɔ ɔ biɛ ke e na lɛ mɔbɔ ɔ, a ma he e yi wami.’

22 Nyɛɛ bu tue, Israel bi! Mawu ye Yesu Nazaret no ɔ he odase ngɛ nyakpɛ okadi agbohi nɛ e pee kɛ gu e nɔ ɔ mi, kaa bɔ nɛ nyɛ nitsɛmɛ nyɛ le momo ɔ. 23 Se ngɛ Mawu blɔ nya tomi nya a, e ngmɛ blɔ nɛ nyɛ gu Roma nɔ yemi ɔ nɔ kɛ sɛu lɛ nɛ nyɛ gbe lɛ. 24 Se Mawu kpɔ lɛ kɛ je gbenɔ dɛ nɛ e tle lɛ si kɛ ba wami mi ekohu, ejakaa gbenɔ nyɛ we e nɔ nɛ e ye.

25 Matsɛ David kɛ Yesu de ke, ‘I le kaa Nutsɔ ɔ kɛ mi ngɛ daa. E yeɔ kɛ buaa mi nɛ e he wami ɔ hɛɛ ye mi.

26 Lɔ ɔ he je nɛ ye tsui mi hyi tɔ kɛ bua jɔmi, nɛ i jeɔ e yi ɔ nɛ, ejakaa i le kaa ke i gbo ɔ, i be laae.

27 Ejakaa o be ye klaa he ngmɛɛe ngɛ gbeje, nɛ o be hae nɛ o Bi Klɔuklɔu ɔ nɔmlɔ tso ɔ maa sa hulɔ.

28 O ma tle mi si kɛ ba wami mi ekohu, nɛ ma na bua jɔmi babauu ngɛ o hɛ mi.’

29 Anyɛmimɛ suɔli, nyɛ ha nɛ wa susu munyu nɛ ɔ he. Pi David nitsɛ e he nɛ e ngɛ susue benɛ e tu munyu nɛ ɔmɛ, ejakaa lɛ nitsɛ e gbo nɛ a pu lɛ nɛ e yɔkɔ ngɛ hiɛmɛ nɛ ɔ amlɔ nɛ ɔ. 30 Se gbalɔ ji lɛ nɛ e le klɛdɛɛ kaa Mawu ka kita kɛ wo si kaa David bimɛ nɛ maa ba ngɛ e se ɔ, a ti nɔ ko ma ba hi David matsɛ sɛ ɔ nɔ. 31 David na níhi nɛ maa ba hwɔɔ se ɔ nɛ e tu Mesia a si temi ɔ he munyu nɛ e de ke, e klaa be gbeje tlɔe, nɛ e nɔmlɔ tso hu be sae. 32 Yesu he munyu nɛ e ngɛ tue, nɛ wɔ tsuo wa yeɔ he odase kaa Yesu te si kɛ je gbeje niinɛ.

33 Amlɔ nɛ ɔ, e hii si ngɛ anunyami matsɛ sɛ ɔ nɔ ngɛ hiɔwe ngɛ Mawu hiɔ nine nɔ. Nɛ kaa bɔ nɛ e wo si ɔ, Tsɛ ɔ tsɔ Mumi Klɔuklɔu ɔ kɛ ba, nɛ Mumi ɔ ni tsumihi ji níhi nɛ nyɛ ngɛ nae kɛ níhi nɛ nyɛ ngɛ nue mwɔnɛ ɔ nɛ.

34 Pi David nitsɛ e he munyu nɛ e ngɛ tue, ejakaa e yɛ hiɔwe hyɛ. Nɛ e de hu ke; ‘Mawu de ye Nutsɔ Mesia a ke, hii si ngɛ ye hiɔ nine nɔ 35 kɛ ya si be nɛ ma ye o he nyɛli ɔmɛ a nɔ kunimi.’

36 Lɔ ɔ he je ɔ, i ngɛ hae nɛ nɔ tsuaa nɔ ngɛ Israel nɛ le kaa Mawu pee Yesu nɛ nyɛ sɛu lɛ ɔ Nutsɔ kɛ Yiwamihelɔ."

37 Munyu nɛ ɔmɛ nɛ Petro tu ɔ ta a tsui mi nɛ a bi lɛ kɛ bɔfo kpa amɛ ke, "Anyɛmimɛ, kɛ wa maa pee kɛɛ?"

38 Nɛ Petro ha mɛ heto nɛ e de ke, "Nyɛ ti nɔ tsuaa nɔ nɛ e tsake e tsui nɛ e kpale kɛ ba Mawu ngɔ nɛ e ha nɛ a baptisi lɛ ngɛ Yesu Kristo biɛ mi, konɛ a ngɔ e he yayami kɛ ke lɛ; nɛ e nine maa su Mumi Klɔuklɔu nɔ́ke nɔ ɔ nɔ. 39 Ejakaa Kristo wo si ke e kɛ Mumi Klɔuklɔu ɔ ma ha nyɛ nihi nɛ Nutsɔ wa Mawu ɔ tsɛ ɔ, kɛ nyɛ bimɛ, kɛ hehi nɛ kɛ lokoo tsɛmɛ tete."

40 Enɛ ɔ se ɔ, Petro fiɛ fiɛmi gaga ko nɛ e de e tue buli ɔmɛ níhi nɛ kɔɔ Yesu he. E ya nɔ nɛ e slɔ mɛ kaa a je a he kɛ je a ma a yayami peemi ɔmɛ a mi. 41 Nihi maa pee akpe etɛ nɛ he Petro ye ɔ, a baptisi mɛ. 42 Nɛ a piɛ nihi nɛ he ye momo ɔmɛ a he kɛ buɔ bɔfo ɔmɛ a ni tsɔɔmi ɔmɛ tue daa, nɛ a yeɔ Nutsɔ Niye ni nɛ a kɛ mɛ peeɔ kpe kɛ peeɔ sɔlemi. 43 Se gbeye nu mɛ tsuo, nɛ bɔfo ɔmɛ pee nyakpɛ okadihi fuu.

44 Nihi nɛ he ye ɔ buaa a he nya be fɛɛ be ngɛ he kake, nɛ a yeɔ kɛ buaa a he. 45 A ti nihi nɛ ngɛ nɔ́ ko ɔ, a ya juaa nɛ a kɛ yeɔ kɛ buaa ni nɛmɛ nɛ be nɔ́ ko ɔ. 46 A kpee kɛ jaa Mawu daa ngɛ Sɔlemi We ɔ; nɛ a buaa a he nya bɔɔbɔɔ ngɛ wehi a mi kɛ yeɔ Nutsɔ Niye ni. A dlaa a niye ni ɔmɛ nɛ mɛ tsuo a yeɔ kɛ bua jɔmi babauu kɛ si nami 47 kɛ Mawu yi jemi. A hɛ mi ba nyami ngɛ ma a mi, nɛ Mawu ngɔɔ nihi nɛ a he a yi wami ɔ kɛ piɛɔ a he daa ligbi.