1 Benɛ Paulo kɛ Barnaba ya su Ikonium ɔ, a pue nɔ kɛ ho Yuda bi ɔmɛ a kpe he ɔ ya nɛ a ya fiɛ Mawu Munyu ɔ kɛ ka nɛ nya wa, nɛ Yuda bi ɔmɛ kɛ ma je li fuu he ye.

2 Se Yuda bi tue gboli ɔmɛ nɛ ngɛ Yudea puɛ ma je li ɔmɛ a tue nɛ a tu munyu yayahi kɛ si Paulo kɛ Barnaba. 3 Se kɛ ɔ, a hi lejɛ ɔ be saii nɛ a fiɛ Mawu Munyu ɔ kɛ tsɔɔ, nɛ Nutsɔ ɔ hu ye a fiɛmi ɔ he odase nɛ e ha mɛ he wami nɛ a tsu nyakpɛ ni nguahi. 4 Ma mi bi ɔmɛ a mi gba enyɔ, a ti ni fa kɛ Yuda bi ɔmɛ a nikɔtɔma amɛ ya pee kake, nɛ fa bi hu piɛ bɔfo ɔmɛ a he.

5 Benɛ Paulo kɛ Barnaba nu kaa ma je li komɛ kɛ Yuda bi komɛ kɛ Yuda bi ɔmɛ a nikɔtɔma komɛ to yi mi kaa a maa pee mɛ haihai nɛ a fiaa mɛ tɛ ɔ, 6 a tu fo kɛ ho Likaonia kɛ Listra kɛ Derbe kɛ a kasa mi ma amɛ a mi ya, 7 nɛ a ya fiɛ Manye Munyu ɔ ngɛ lejɛ ɔmɛ.

8 Benɛ a ngɛ Listra a, a na nyumu ko nɛ nyɛɛ we hyɛ kɛ je benɛ a fɔ lɛ ɔ. 9 Nɛ Paulo ngɛ fiɛe ɔ, nyumu ɔ ngɛ lɛ tue bue. Paulo na lɛ ngɛ ni ɔmɛ a kpɛti nɛ e nu he kaa e ngɛ hemi kɛ yemi nɛ a ma nyɛ kɛ tsa lɛ. 10 Lɔ ɔ he je ɔ, e kpa ngmlaa nɛ e de lɛ ke, "Tee si!" Amlɔ ɔ nɔuu nɛ nyumu ɔ tu da si nɛ e bɔni nyɛɛmi. 11 Asafo ɔ nɛ ngɛ Paulo tue bue ɔ na nɔ́ nɛ e pee ɔ nɛ a kpa ngmlaa nɛ a de ngɛ a gbi mi ke, "mawuhi nɛ a plɛ a he nimli adesahi pɛ ji mɛ!" 12 Nɛ a tsɛ Barnaba ke Dio; nɛ a wo Paulo ke Herme, ejakaa lɛ titli ji nɔ nɛ ngɛ munyu tue ɔ nɛ. 13 Kɛkɛ nɛ lejɛ ɔ Dio wɔ ɔ nɛ maa si ngɛ a ma a nya a e wɔnɔ ɔ wo nahi kɛ mɔmɔhi kɛ ba agbo ɔmɛ a nya ke e maa sã bɔ kɛ ha mɛ ngɛ asafo ɔ hɛ mi.

14 Benɛ Barnaba kɛ Paulo na nɔ́ nɛ a ngɛ pee ɔ, a gba a tadehi ngɛ a he nɛ a sa fo kɛ sɛ ni ɔmɛ a kpɛti kɛ ngmlaa ke, 15 "Anyɛmimɛ, mɛni nyɛ ngɛ pee ɔ? Nimli adesahi ji wɔ kaa nyɛ nɔuu. Wa ba nɛ wa wo Manye Munyu ɔ kɛ ba ha nyɛ bɔ nɛ pee nɛ nyɛɛ kpale ngɛ yaka nɔ́ ɔmɛ a jami se, nɛ nyɛɛ sɔle ha Mawu hɛ kalɔ ɔ, nɔ nɛ bɔ hiɔwe kɛ zugba kɛ wo kɛ nɔ́ tsuaa nɔ nɛ ngɛ a mi ɔ. 16 Ngɛ be nɛ be ɔ mi ɔ, Mawu ngmɛ majemaje ɔ tsuo blɔ nɛ a pee níhi nɛ a suɔ. 17 Se e peeɔ nihi kpakpahi fuu nɛ wa kɛ yeɔ e he odase. E haa nɛ hiɔmi nɛɛ, nɛ niye ni baa nɛ wa naa bua jɔmi."

18 Enɛ ɔ kulaa se ɔ, Paulo kɛ Barnaba nyɛ we ni ɔmɛ a nya nɛ a tsi kɛ a bɔ sami ɔ.

19 Pee se ɔ, Yuda bi komɛ nɛ je Antiokia kɛ Ikonium kɛ ba a, a ba puɛ asafo ɔ tue nɛ a ha nɛ a plɛ se kɛ wo Paulo nɛ a fiaa lɛ tɛ, nɛ a sa lɛ si kɛ je ma a mi, nɛ a susu kaa e gbo. 20 Se benɛ kaseli ɔmɛ ba bɔle lɛ ɔ kɛkɛ nɛ e te si nɛ e ho ma a mi ya ekohu. E nɔ jena nɔ ɔ, e kɛ Barnaba si lejɛ ɔ kɛ ho Derbe ya. 21 Benɛ a ya fiɛ Manye Munyu ɔ ngɛ Derbe ma a mi nɛ nihi fuu tsake ɔ, a kpale se ekohu kɛ ba Listra kɛ Ikonium kɛ Antiokia. 22 A ba wo kaseli ɔmɛ a mumi he wami bɔ nɛ pee nɛ a suɔ Mawu kɛ mɛ nitsɛmɛ a he. A wo mɛ bua nɛ a pɛtɛ a hemi kɛ yemi ɔ he wawɛɛ nɛ a ko ye gbeye ngɛ yi mi nɛ a ngɛ mɛ wae ɔ he. Nɛ a kai mɛ kaa amanehluhi ji níhi a mi nɛ a maa gu kɛ sɛ Mawu Matsɛyemi ɔ mi. 23 Paulo kɛ Barnaba hla nikɔtɔmahi kɛ to asafo fɛɛ asafo nya; nɛ a ha hwɔ kɛ sɔle nɛ a to mɛ kɛ wo Nutsɔ, nɔ nɛ a he e nɔ ye ɔ dɛ mi.

24 A po mi kɛ je Pisidia kɛ ba Pamfilia, 25 nɛ a ba fiɛ ngɛ Perge ekohu loko ji a pue nɔ́ kɛ ba Atalia.

26 A sɛ lɛ mi ngɛ Atalia kɛ ba Antiokia, he nɛ a blɔ hiami ɔ je sisi kɛ je, kɛ he nɛ a to mɛ kɛ wo Mawu dɛ mi ngɛ, kɛ ha ni tsumi nɛ a tsu gbe nya nɛ ɔ.

27 Benɛ a ba su Antiokia a, a bua kaseli ɔmɛ a nya kɛ kpe nɛ a bɔ mɛ a blɔ hiami ɔ mi amaniɛ. A de mɛ bɔ nɛ Mawu bli hemi kɛ yemi sinya a nya kɛ ha ma je li ɔmɛ hu ɔ; 28 nɛ a kɛ kaseli ɔmɛ hi si ngɛ Antiokia be saii.