1 Benɛ wa ya nu kpo ɔ, e yi be ko nɛ wa na le kaa Melita wo kpɔ ɔ he ji he nɛ wa ba je. 2 Lejɛ ɔ bi ɔmɛ pee wɔ nubwɔ saminya. A slɛ la ha wɔ nɛ wa hlui, ejakaa fie ngɛ yee nɛ hiɔmi ngɛ nɛe hulɔ.

3 E ba mi kaa benɛ Paulo ya ngɛ lɛ nya buae kɛ ba wo la a mi ɔ, sinɔ duɔtsɛ ko nɛ la fie lɛ ɔ tu nɛ e koklo kɛ wo e kɔni he. 4 Benɛ lejɛ ɔ bi ɔmɛ na nɛ sinɔ ɔ kpla Paulo kɔni he ɔ, a de a he ke, "Awi yelɔ agbo ko ji nyumu nɛ ɔ. E ngɛ mi kaa e je wo ɔ mi slɔkee lɛɛ, se oslaa tɛ e he, nɛ e yi be wami nae."

5 Se Paulo huanya sinɔ ɔ kɛ wo la a mi nɛ e yi lɛ awi ko. 6 Ni ɔmɛ le kaa Paulo he ma bɔni fuumi aloo e maa nɔ si nɛ e ma gbo tlukaa. Se nɛ a hyɛ blɔ hluu nɛ jamɛ a nɔ́ ko pee we lɛ ɔ, a tsake a juɛmi nɛ a de ke jemɛ a wɔ ko ji lɛ.

7 Lejɛ ɔ amlaalo nɛ a tsɛɛ lɛ ke Publio ɔ po we ngɛ he nɛ wa ya nu kpo ngɛ ɔ kasa mi. E he wɔ atuu nɛ e baa wa yi ligbi etɛ sɔuu. 8 Se e ba mi kaa asla kɛ muklii mi pa ngɛ nɔ́ dee ha Publio tsɛ, nɛ Paulo ya sɔle ha lɛ nɛ e kɛ e nine pue e nɔ nɛ e tsa lɛ. 9 Benɛ zugba kpɔ ɔ nɔtsɛmɛ na kaa Paulo tsa Publio tsɛ ɔ, hiɔtsɛhi tsuo nɛ ngɛ lejɛ ɔ ba e ngɔ nɛ e tsa mɛ. 10 Enɛ ɔ ha nɛ a wo wa hɛ mi nyami. Nɛ loko wa ma si lejɛ ɔ, a ke wɔ níhi babauu nɛ he maa hia wɔ ngɛ blɔ ɔ nɔ.

11 Wa ye nyɔhiɔ etɛ sɔuu loko ji wa tsa blɔ hiami ɔ nɔ kɛ Aleksandria lɛ ko nɛ a tsɛɛ lɛ ke "Hawi Nyumuhi" nɛ ba ye fiɛ be ngɛ wo kpɔ ɔ nɔ. 12 Wa ya da si ngɛ Sirakus a lɛ dami he ɔ nɛ wa ye ligbi etɛ ngɛ lejɛ ɔ. 13 Nɛ wa hia a, wa bɔle si kɛ ya je Regio. E nɔ jena a, wo yi je kɔɔhiɔ bɔni fiami, nɛ lɔ ɔ he je ɔ, wa ye ligbi enyɔ loko ji wa ya su Putueli, 14 nɛ wa na nyɛmimɛ kaseli komɛ ngɛ lejɛ ɔ. A kpa wɔ pɛɛ nɛ waa hi a ngɔ ligbi kpaago. Jehanɛ ɔ wa hia ngɛ Putueli kɛ pue Roma blɔ.

15 Benɛ Roma nyɛmimɛ ɔmɛ nu he kaa wa ma a, a ba kpee wɔ ngɛ Apia blɔ ɔ nɔ. A ti ni komɛ hu ba na wɔ ngɛ Tretaberna. Nɛ e ba mi kaa benɛ Paulo na mɛ ɔ, e na Mawu si nɛ ka ba e mi.

16 Benɛ wa ya su Roma a, a ngɛ Paulo he bue mohu, se a ha lɛ he blɔ nɛ e ya to he nɛ e suɔ. 17 Nɛ benɛ wa ye ligbi etɛ ɔ, Paulo tsɛ Yuda bi ɔmɛ a nikɔtɔma amɛ kɛ kpe nɛ e de mɛ ke, "Anyɛmimɛ, i yi nɔ ko awi ko, nɛ i tɔ we wa tsɛmɛ a kusumi ɔmɛ eko hu nɔ, se Yerusalem Yuda bi ɔmɛ nu mi kɛ ha Roma amlaalo ɔ ke a kojo mi. 18 Roma bi ɔmɛ hyɛ sane ɔ mi nɛ a suɔ nɛ a maa ngmɛɛ ye he, ejakaa a nɛ gbenɔ fɔ bumi nɔ́ ko ngɛ ye he kaa bɔ nɛ Yuda bi ɔmɛ a nikɔtɔma amɛ ngɛ hlae ɔ. 19 Se Yuda bi ɔmɛ kplɛɛ we kaa i ye bemi nɛ e sa nɛ a ngmɛɛ ye he. Enɛ ɔ he je ɔ, i je sane ɔ nɛ Kaisare nɛ ye ha mi. Nɛ enɛ ɔ tsɔɔ we kaa i na a he dɔmi ko. 20 I tsɛ nyɛ kɛ ba hiɛ ɔ mwɔnɛ ɔ nɛ waa le wa he, nɛ nyɛɛ le kaa Israel hɛ nɔ kami nɛ ji Mesia a nɛ i he ye ɔ he je nɛ a wo mi kikɛmɛ a kɔsɔkɔsɔ nɛ ɔ ngɛ."

21 A ha lɛ heto nɛ a de ke, "Wa nine sui womi ko nɔ kɛ ji Yudea ngɛ o he, nɛ nyɛmi ɔmɛ nɛ je Yerusalem ɔ hu a ti nɔ ko ba de we wɔ o he munyu yaya ko. 22 Se e hi kaa mo nitsɛ o ba, lɔ ɔ he je ɔ, wa maa suɔ nɛ waa nu kikɛmɛ a hemi kɛ yemi nɛ ɔ kɛ je o nya. Ejakaa nɔ́ nɛ pɛ nɛ wa le ngɛ Kristo se nyɛɛli nɛ ɔmɛ a he ji kaa a tuɔ munyu kɛ siɔ mɛ ngɛ he fɛɛ he."

23 Enɛ ɔ he ɔ a to be; nɛ benɛ be ɔ su ɔ, nihi fuu ba e ngɔ ngɛ we mi he nɛ e ngɛ ɔ, nɛ e tsɔɔ mɛ Mawu Matsɛyemi ɔ he ni, kɛ níhi nɛ kɔɔ Yesu he kaa bɔ nɛ Mose kɛ Gbali ɔmɛ ngma ngɛ Ngmami Klɔuklɔu ɔ mi ɔ. Nɛ e kɛ mɛ tu munyu kɛ je mɔtu kɛ ya si gbɔkuɛ.

24 A ti ni komɛ he e munyu ɔ ye, se ni komɛ hu he we yi. 25 Enɛ ɔ ha we nɛ a nya nɛ pee kake, se loko ji a gbɛ ɔ, Paulo wo mɛ blɔ kɛ munyu ko ke, "Anɔkuale munyu nɛ Mumi Klɔuklɔu ɔ tu kɛ gu Gbalɔ Yesaia nɔ ke,

26 ‘Yaa de Yuda bi ɔmɛ ke, Nyɛ maa nu kɛ nyɛ tue nɛ nyɛ maa na kɛ nyɛ hɛ ngmɛ se nyɛ be sisi nue; 27 ejakaa nyɛ tsui ti, nɛ nyɛ tue wa, nɛ nyɛ ma nyɛ hɛ ngmɛ, ejakaa nyɛ sume kaa nyɛ maa na nɛ nyɛɛ nu konɛ nyɛɛ nu sisi nɛ nyɛɛ ba ye ngɔ nɛ ma tsa nyɛ.’ 28 Lɔ ɔ he je ɔ, i ngɛ hae nɛ nyɛɛ le kaa a ngɔ Mawu yi wami hemi nɛ ɔ kɛ ya ha ma je li ɔmɛ hu, nɛ mɛɛ lɛɛ a ma he munyu ɔ atuu." 29 Benɛ Paulo tu munyu nɛ ɔmɛ ɔ, mi gbami ba Yuda bi ɔmɛ a kpɛti nɛ a gbɛ. 30 Nɛ Paulo hi we mi he nɛ e ya to ɔ jeha enyɔ, nɛ e nyaa nɔ tsuaa nɔ nɛ ba slaa lɛ ɔ e he. 31 Nɛ e kɛ ka fiɛ Mawu Matsɛyemi ɔ he sane, nɛ e jaje Nutsɔ Yesu Kristo he munyu ɔ ngɔ tsɔɔ mɛ, nɛ nɔ ko tsi we e nya.