1 Ye suɔli ngɛ Roma, ami Paulo, Yesu Kristo sɔmɔlɔ kɛ Tsɔɔlɔ nɛ a hla kaa e pee Mawu Manye Munyu ɔ fiɛlɔ ɔ, nɛ ngɛ nyɛ Roma nyɛmi ɔmɛ womi nɛ ɔ ngmae.

2 Mawu gbali ɔmɛ wo kikɛmɛ a Manye Munyu nɛ ɔ he si kɛ je blema ngɛ Somi Momo ɔ mi. 3 Manye Munyu nɛ ɔ kɔɔ e Bi, wa Nutsɔ Yesu Kristo, nɔ nɛ a fɔ lɛ nɔmlɔ adesa kɛ wo Matsɛ David weku ɔ mi ɔ he. 4 Nɛ akɛnɛ e te si kɛ je gbeje he je ɔ, a ngɔ lɛ kaa lɛ ji Mawu Bi pe kulaa, nɛ a naa Mawu klɔuklɔu nɛ e ji ɔ ngɛ e he.

5 Nɛ kɛ gu Kristo nɔ ɔ, wɔ yayami peeli po wa nine su Mawu dloomi babauu nɔ. Jehanɛ ɔ, e ngɛ wɔ tsɔe nɛ wa ya ye e he odase kɛ ha nɔ tsuaa nɔ ngɛ je ɔ mi he fɛɛ he konɛ a le níhi agbohi nɛ e pee ha mɛ ɔ nɛ mɛ hu a he e nɔ nɛ a ye nɛ a bu lɛ tue.

6 Anyɛmimɛ suɔli ngɛ Roma, nyɛ hu nyɛ piɛ nihi nɛ e suɔ mɛ ɔ a he. Enɛ ɔ he je nɛ Yesu Kristo ngɛ nyɛ hu tsɛe nɛ nyɛ ba pee Mawu bimɛ kɛ e nihi klɔuklɔuhi ɔ nɛ. 7 Dloomi kɛ he jɔmi nɛ je wa Tsɛ Mawu kɛ Yesu Kristo, wa Nutsɔ ɔ ngɔ ha nyɛ.

8 Kekleekle ɔ, i gu Yesu nɔ kɛ ngɛ Mawu si nae ngɛ nyɛ he, ejakaa a le nɛ a tuɔ nyɛ hemi kɛ yemi ɔ he munyu kpakpa ngɛ je ɔ mi he fɛɛ he nɛ i ya. 9 Mawu nitsɛ le bɔ nɛ i sɔleɔ haa nyɛ, nɛ i kpaa pɛɛ ngɛ nyɛ kɛ nyɛ hiami níhi a he nyɔ kɛ pia kɛ haa nɔ nɛ i sɔmɔɔ kɛ ye he wami kulaa a, nɛ i fiɛɔ e Bi ɔ Manye Munyu ɔ kɛ tsɔɔ nihi.

10 Nɔ́ kake he nɛ i sɔleɔ ngɛ daa ji, ke Mawu maa suɔ ɔ, ma na he blɔ nɛ ma ba nyɛ ngɔ kɛ manye. 11 Ejakaa ye hɛ jaa ngɛ nyɛ he. Nɛ ma suɔ nɛ ma ba nyɛ ngɔ nɛ ma ngɔ mumi dloomi nike ni ɔmɛ eko nɛ maa ye kɛ bua asafo ɔ kɛ pi si ngɛ Nutsɔ ɔ mi ɔ kɛ ba ha nyɛ. 12 Ma suɔ nɛ nyɛ hu nyɛɛ ye kɛ bua mi, ejakaa tsa pi ye hemi kɛ yemi ɔ kɛkɛ nɛ i ngɛ hlae nɛ ma kɛ ha nyɛ, se mohu ma na he wami womi kɛ je nyɛ hu nyɛ ngɔ, nɛ lɔ ɔ maa pee gbaami kɛ ha wɔ tsuo.

13 Anyɛmimɛ, i ngɛ hae nɛ nyɛɛ le kaa behi babauu nɛ be ɔ, a tsi ye nya, se jinɛ i to kaa ma ba nyɛ ngɔ nɛ ma ba tsu ni ngɛ nyɛ kpɛti nɛ ma kɛ hyɛ ha kaa i ma na yiblii kpakpa komɛ ngɛ nyɛ mi kaa bɔ nɛ i na ngɛ ma jeli ɔmɛ a kpɛti ɔ lo. 14 Ejakaa i hɛɛ nyɛ kɛ nɔ fɛɛ nɔ hiɔ, nihi nɛ a hɛ mi tsɔ kɛ nihi nɛ a hɛ mi tsɔ we, kɛ womi mi leli kɛ nihi nɛ a li womi mi tsuo. 15 Lɔ ɔ he je ɔ, kaa e je imi nɔ kake ye he jinɛ i pee klaalo nɛ ma ba nyɛ ngɔ ngɛ Roma nɛ ma ba fiɛ Mawu Manye Munyu ɔ kɛ tsɔɔ nyɛ.

16 Ejakaa Kristo Manye Munyu ɔ he pee we mi zo, ejakaa e ji Mawu blɔ nya tomi agbo nɛ e ma kɛ he nɔ tsuaa nɔ nɛ heɔ yeɔ ɔ, e yi wami. A fiɛ Manye Munyu nɛ ɔ kɛ tsɔɔ Yuda bi ɔmɛ pɛ kekle; se amlɔ nɛ ɔ, a ngɛ nɔ tsuaa nɔ tsɛe nɛ e ba Mawu ngɔ kɛ gu kikɛmɛ a blɔ kake too ɔ nɔ. 17 Manye Munyu nɛ ɔ deɔ wɔ ke Mawu dla wɔ kɛ ha hiɔwe, nɛ e peeɔ wɔ dali ngɛ Mawu hɛ mi ke wa he Kristo nɔ ye kaa e ma he wa yi wami. Mawu dami ɔ jeɔ e he kpo ke wa hemi kɛ yemi ɔ pi si kɛ je sisije kɛ ya su nyagbe, kaa bɔ nɛ Ngmami Klɔuklɔu ɔ ye he odase nɛ e de ke, "Nɔ fɛɛ nɔ nɛ heɔ Mawu nɔ yeɔ ɔ, e yi ma na wami" ɔ.

18 Se Mawu abofu jeɔ hiɔwe kɛ baa yayami peeli nɛ tsiɔ anɔkuale ɔ blɔ ɔ a nɔ. 19 Ejakaa a leɔ Mawu he anɔkuale munyu ɔ nɛ pi nɔ ko nɛ tsɔɔ mɛ. 20 Ejakaa a naa hiɔwe kɛ zugba kɛ nɔ́ fɛɛ nɔ nɛ Mawu bɔ ɔ, nɛ kɛ je blema bebeebe nɛ a na le kaa Mawu ngɛ, nɛ e ngɛ neneene he wami. Lɔ ɔ he je ɔ, a be nya jemi ko ngɛ nyagbe kojomi ligbi ɔ nɔ.

21 Nɛ e ji anɔkuale kaa a le kaa Mawu ngɛ mohu se a kplɛɛ we nɔ, nɛ a ja we lɛ, nɛ a nɛ lɛ si hulɔ kaa nɔ ko nɛ baa a yi daa. A peeɔ e he juɛmi yaya nɛ a susuɔ e he kaa mɛnɔ ji lɛ, nɛ mɛni e ngɛ hlae nɛ a pee ha lɛ. Enɛ ɔ ha nɛ a kuasia juɛmi ɔmɛ wo diblii kanikani nɛ a lu. 22 A tsɛɔ a he ni leli, se akɛnɛ a li Mawu ɔ, kuasiahi mohu ji mɛ. 23 Nɛ ngɛ anunyami kɛ neneene Mawu ɔ mohu nɛ a ma ja a nane mi ɔ, a jaa wɔhi nɛ ji tɛhi kɛ tsohi nɛ a hlɔ kaa nimli kɛ lohwe pɛlitsɛhi kɛ lohwe nane eywiɛtsɛhi kɛ sinɔhi.

24 Enɛ ɔ he je nɛ Mawu ngmɛɛ a he ngɛ konɛ a bɔ ajuama nɛ a pee yakayaka ni nɛ a tsui suɔ kɛ gbe mɛ nitsɛmɛ a he guɛ. 25 A le nɔ nɛ ji Mawu he nile anɔkuale ɔ, se mohu a heɔ nɔ́ nɛ ji lakpa munyu yeɔ. Nɛ lɔ ɔ he je ɔ, a jaa nihi nɛ Mawu bɔ ɔ, nɛ a bui neneene Mawu ɔ nɛ bɔ ni nɛ ɔmɛ mohu tue.

26 Enɛ ɔ he je nɛ Mawu ngmɛɛ a he ngɛ nɛ a di yakayaka nihi a se; nɛ a yi ɔmɛ bɔ ajuama kɛ gbe Mawu adebɔ he guɛ. 27 Ja a nɔuu nɛ nyumu ɔmɛ hu a ke yihi na we bɔmi se mohu a kɛ a he pee yakayaka nihi nɛ a na he hiɔwo nɔ nɛ sa mɛ.

28 Akɛnɛ a kua Mawu, nɛ a bui tue ɔ, lɛ hu e ngmɛɛ a he nɛ a pee yakayaka níhi nɛ a tsui suɔ. 29 A pee yi kpɛti wami kɛ yayami slɔɔtohi, kaa hɛ kɔmi kɛ nyɛmi, nɔmlɔ gbemi kɛ pɛmi, lakpa yemi kɛ mi mi doomi. 30 A pee a he nɔ he munyu yaya tuli, sieku yeli kɛ nihi nɛ a sume Mawu, nɔ buili, he tsɔɔli, fiali kɛ nɔ́ yaya he ga toli kɛ nihi nɛ a bui a fɔli. 31 Nihi nɛ nui nɔ́ sisi, nihi nɛ yi si womi nɔ, kɛ nihi nɛ be suɔmi nɛ a nɛ mɔbɔ. 32 A le Mawu mlaa a, kaa nihi nɛ peeɔ kikɛmɛ a ni nɛ ɔmɛ ɔ, a sa gbenɔ. Se kɛ ɔ, mɛ nitsɛmɛ a peeɔ, nɛ a woɔ nihi nɛ peeɔ kikɛmɛ a nɔ́ nɛ ɔmɛ hu he wami.