1 Niinɛ, nyɛ ma de ke, "Nimli nɛ a he ngɛ gbeye a he munyu nɛ o ngɛ tue ji nɛ ɔ nɛ!" Se nyɛ hu ja a nɔuu nɛ nyɛ ngɛ. Ke ji nyɛ ke a yi mi wa nɛ e sa kaa a gblaa a tue ɔ, lɛɛ nyɛ nitsɛmɛ nyɛ he nɛ nyɛ ngɛ kojoe, ejakaa nɔ́ nɛ ɔmɛ nɔuu nɛ nyɛ hu nyɛ peeɔ. 2 Nɛ wa le klɛdɛɛ kaa Mawu maa bu nihi nɛ peeɔ kikɛmɛ a tɔmi ni nɛ ɔmɛ fɔ. 3 Anɛ nyɛ susuu kaa Mawu maa ngmɛɛ nyɛ he nɛ e bu nihi nɛ nyɛɛ kɛ mɛ peeɔ kikɛmɛ a tɔmi nɛ ɔmɛ nɔuu fɔ lo? 4 Aloo nyɛ li kaa Mawu na nyɛ he tsui, nɛ e ngɛ nyɛ blɔ hyɛe nɛ nyɛɛ kpale ngɛ nyɛ yayami ɔmɛ a se kɛ ba e ngɔ?

5 Se akɛnɛ nyɛ tsui ti he je ɔ, nyɛ bui tue, nɛ nyɛ ngɛ Mawu kojomi ɔ blɔ hyɛe, ejakaa nyɛ kpa we yayami peemi. Lɔ ɔ he je ɔ, abofu be ma nɛ Mawu maa kojo je ɔ tsuo. 6 Nɛ e maa wo nɔ tsuaa nɔ hiɔ ngɛ e ni tsumi he. 7 Nɔ tsuaa nɔ nɛ peeɔ Mawu suɔmi nya ni kɛ tsui si tomi, nɛ e hlaa e anunyami kɛ bumi kɛ wami nɛ be nyagbe ɔ se blɔ ɔ, e ma ha lɛ neneene wami.

8 Se e ma na nihi nɛ teɔ si kɛ siɔ Mawu anɔkuale ɔ, nɛ a peeɔ yayami ɔ a he abofu. E maa bu mɛ fɔ nɛ e maa gbla a tue wawɛɛ. 9 Yuda bi kɛ ma je li tsuo nɛ ngmɛɛ we yayami he ɔ, a maa na amanehlu nɛ a maa na nɔ 10 Se Yuda bi kɛ ma je li tsuo nɛ buɔ lɛ tue nɛ a peeɔ kpakpa a, a nine maa su Mawu anunyami kɛ he jɔmi ɔ nɔ. 11 Ejakaa Mawu hlɛ nɔ ko mi.

12 Nihi nɛ li mlaa a nɛ a peeɔ yayami ɔ, mɛ hu a hɛ mi ma kpata. Nɛ a maa ngɔ mlaa a kɛ kojo nihi nɛ le mlaa a se a peeɔ yayami ɔ. 13 Ejakaa tsa pi mlaa a leli ji nihi nɛ peeɔ dali ngɛ Mawu hɛ mi, se mohu nihi nɛ yeɔ mlaa a nɔ, nɛ mɛ ji nihi nɛ a maa bu dali. 14 Ke wɔ jali nɛ li mlaa a se a he nile haa a tsuɔ mlaa a nya níhi ɔ, e ngɛ mi kaa a li mlaa a mohu, se mɛ nitsɛmɛ a plɛ mlaa kɛ ha a he. 15 Ejakaa a je mi bami tsɔɔ kaa a ngma nɔ́ nɛ mlaa a ngɛ hlae ɔ ngɛ a tsui mi. A le kpakpa kɛ yayami nɛ a he nile kojoɔ mɛ. 16 Nɛ be ma nɛ Mawu maa gu Yesu Kristo nɔ kɛ kojo nɔ tsuaa nɔ ngɛ laami sanehi kɛ ni peemi níhi a he; nɛ enɛ ɔ piɛ Mawu blɔ nya tomi agbo ɔ nɛ i de nyɛ ɔ he.

17 Nyɛ Yuda bi ɔmɛ nyɛ susuu kaa nyɛɛ kɛ Mawu kpɛti ngɛ saminya, ejakaa nyɛɛ kɛ nyɛ hɛ fɔ e mlaa amɛ a nɔ kɛ ha nyɛ yi wami hemi, nɛ lɔ ɔ he je ɔ nyɛ fiaa kaa e huɛmɛ ji nyɛ. 18 E ji anɔkuale kaa nyɛ le nɔ́ nɛ e ngɛ hlae ngɛ nyɛ dɛ, nɛ nyɛ le nɔ́ nɛ da kɛ nɔ́ nɛ dɛ. Ejakaa a tsɔɔ nyɛ e mlaa amɛ kɛ je nyɛ jokuɛwi a si. 19 Nyɛ le nɛ nyɛ ma nyɛ tsɔɔ hɛ yuyuilɔ tete Mawu ngɔ blɔ; nɛ nyɛ ngɔɔ nyɛ he kaa kane nɛ maa tsɔɔ nihi nɛ laa ngɛ diblii mi ɔ Mawu ngɔ blɔ. 20 E peeɔ nyɛ kaa nyɛ ma nyɛ kpaka nihi nɛ li nɔ́ ko, nɛ nyɛ maa tsɔɔ jokuɛwi tete Mawu he nile, ejakaa nyɛ lɛɛ mlaa amɛ nɛ a ji nile kɛ anɔkuale sɔuu.

21 Mɛni he je nɛ nyɛ tsɔɔ we nyɛ nitsɛmɛ nyɛ he ni se nyɛ tsɔɔ ni kpahi Mawu se blɔ ɔ? Nyɛ deɔ ni kpahi ke a ko ju, anɛ nyɛ nitsɛmɛ nyɛ ju we lo? 22 Nyɛ deɔ ke a ko bɔ ajuama, anɛ nyɛ bɔɛ ajuama lo? Ja a nɔuu nɛ nyɛ deɔ ke, "A ko ja wɔ," se nyɛɛ kɛ sika peeɔ nyɛ Mawu.

23 Nyɛ fiaa kaa nyɛ le Mawu mlaa amɛ, se nyɛ gbee Mawu he guɛ, ejakaa nyɛ tɔɔ e mlaa amɛ a nɔ. 24 Nyɛ tɔmi ɔmɛ a he je nɛ Ngmami Klɔuklɔu ɔ deɔ ke je ɔ tuɔ musu bɔmi munyu kɛ siɔ Mawu ɔ nɛ.

25 Lɔ ɔ he je ɔ, ke Yuda no ji mo nɛ o yeɔ Mawu mlaa amɛ a nɔ ɔ, lɛɛ o he ngɛ se nami; se ke o gboɔ Mawu mlaa amɛ a nɔ tue ɔ lɛɛ o hí pi wɔ jalɔ. 26 Nɛ ke wɔ jali yeɔ Mawu mlaa amɛ a nɔ ɔ, anɛ e sɛ kaa e haa mɛ blɔ nya kɛ anunyami nɛ e to kɛ ha Yuda bi ɔmɛ lo? 27 Niinɛ, e maa hi ha wɔ jali ɔmɛ pe nyɛ Yuda bi ɔmɛ nɛ le Mawu he ni kɛ e si womi ɔmɛ nɛ e wo nyɛ ɔ se nyɛ yi e mlaa amɛ a nɔ ɔ.

28 Ejakaa tsa pi Yuda bi kpakpahi ji nyɛ, ejakaa tsa pi Yuda fɔfɔɛ aloo nɔ nɛ a pee lɛ Yuda bi a kusumi nɛ ji nyumu mi womi ɔ pɛ ji Yuda no. 29 Dabida! Yuda no kasakasa ji nɔ nɛ yeɔ Mawu gbi nɔ. Ejakaa Mawu hla we nihi nɛ a po a he lo kɛ wo mɛ nyumu mi, se mohu nihi nɛ a tsake a juɛmi kɛ a tsui mi nɛ e ngɛ hlae. Kikɛmɛ a nɔmlɔ nɛ tsake e tsui loo e wami si himi mi ɔ be adesa yi jemi nae, se mohu e yi jemi maa je Mawu ngɔ.